মালেমগী থাক্তা মণিপুরী শৈরেং অমসুং ৱারী মচা ওনলাইন হিদান্নবগী থৌরম মঙারকশুবা ওইনা পাংথোকখ্রে
অনলাইন ডেস্ক, আগষ্ট ২১ : ফেসবুক লিটারেরী গ্রুপ "শৈরেংগী ইরেনবুং" অমসুং 'ৱারীমচাগী তাইবং" না মালেমগী থাক্তা মণিপুরী শৈরেং অমসুং ৱারী মচা ওনলাইন হিদান্নবগী থৌরম মঙারকশুবা ওইনা পাংথোকখ্রে। কুমসি কুমজা ২০২৬গী রিজাল্ট ঙরাং আগষ্ট ২০ দা ৩৫ শুবা মণিপুরী লোনগী নুমিৎকি হরাও নুংঙাইবা ফোংদোকপগী থৌরমগা মরী লৈননা ওনলাইনগী খুত্থাংদা লাওথোকখ্রে।
মনিপুরী শৈরেং হিদানবা ২০২৬ কী অহেন -অথোই তাদুনা "ইরেনবুং পোইত্রি মনা" ফংখ্রবা অইবশিংদুদি - "রাম মাঙখ্রবা লমদমসিদা" শৈরেংগী অইবা মোইরাংথেম নেত্রজিৎ মীতৈ, থাঙ্গাদগী "থিরি ঐনা" মিংথোনবা শৈরেংগী অইবা জয়শঙ্কর হৈস্নাম অমসুং "থৌদাং" শৈরেংগী অইবা তোনী তেলহৈবা তৌরাংবমনি।
অদুগা ৱারীমচাদনা শগোলবন্দ, মোইরাং হনুবা, মমাঙ লৈরক্তগী শ্যামা তোংব্রমগী "পুন্সিনা পুন্সিবু"দা থৌনাওজম ধনীবাবু শোর্ট ষ্টোরি এৱার্দ-২০২৬ অমদি রাকেশ নাওরেমগী "করি মতৌনো ইমা?"দা সিনাম তনুবাবু শোর্ট ষ্টোরি এৱার্দ-২০২৬ অমসুং রিতা থোকচোমগী "নুমিৎ তরেৎনিদো" হায়না মীংথোনবা ৱারী মচাদা 'থৌনাওজম জাতি শোর্ট ষ্টোরি এৱার্দ- ২০২৬' লানথোকখ্রে।
পনবা য়াবদি হিদান্নবা অসি অহানবা ওইনা হৌখিবা ইংকুমজা ২০২০ দগী মীতৈলোনগী লোয়নশিল্লোন্দা মতিং লৈবা খুৎই পুথোকপা অমদি নৌনা হৌগৎলক্লিবা অইবা/অইবীশিংবু পূক্নীং থৌগৎপগী পান্দমদা চত্থজরিকখিবনি হায়রি।
হন্দক্কী হিদান্নবা অসিদা শৈরেংগী ওইনা লাইরেনলাকপম শ্রুতিকুমার (সাহিত্য ভূষণ, হোজাই), ডঃ মঙ্গলা লাইশ্রম (এম সি দি কলেজ, সোনাই) অমসুং প্রোফেসর হাওরোংবম রাজমণি ( আসাম য়ুনিবর্সিতী, মণিপুরী মশঙ)না ইকাই খুম্নজরিবা জুরী মেম্বর ওইখি। অদুগা ৱারীগী ওইনা ওইনা নাওরেম অমুয়াইমা (সাহিত্য ভূষণ,গুৱাহাটি ), ক্ষেত্রি বীর (সাহিত্য একাদেমি এৱার্দি, মণিপুর) অমসুং বীমাবতী থিয়াম ওংবী ( সেনিয়র লেকচারার, মণিপুর)না ইকাই খুম্নজরিবা জুরী মেম্বর ওইখি।
হাইরিবা মনাসিং অসিদা সাইটেশনগা লোয়ননা শেলগী মনাসু য়াওরী হায়না গ্রুপ এডমিন থৌনাওজম শ্যামগী চেরোল অমদা ফোংদোরকখি।
0 কমেন্ট:
কমেন্ট তৌবিয়ু