আপডেট:
image

মাউন্ত মণিপুরদা মহারাজ কুলচন্দ্রগী মীতম য়াওনা অতৈ শেমগৎ-শাগৎনবা প্রাইম মিনিস্তরদা তকশিনখ্রে

ইম্ফল, সেপ্তেম্বর ২৩: আন্দামান নিকোবর আইলেন্দসকী মউন্ত মণিপুরদা ইং ১৮৯১গী এঙ্গলো-মণিপুরী ৱারদা মফম অদুদা লানফ ওইনা পুখিবা মতম অদুগী নিংথৌ মহারাজ কুলচন্দ্র ধজ সিংহগী লাইফ সাইজ মীতম অমা থম্বগা লোয়ননা অতৈ শেমগৎ-শাগৎপীনবা রৈবাক অসিগী প্রাইম মিনিস্তরদা মেমোরেন্দম অমা য়ৌহন্দুনা তকশিনখ্রে হায়না য়ু সি এমগী প্রেসিদেন্ত জয়চন্দ্র কোন্থৌজমনা ফোঙদোকখ্রে।

ঙসি ম্ফৈলপাৎতা লৈবা য়ু সি এম (য়ুনাইতেদ কমিতি মণিপুর) হেদক্বার্তারদা পাউমীশিংগা উনবদা জয়চন্দ্রনা হায়খি, খা-নোংপোক এসিয়াদা নীঙতম্বা লৈবাক অমা ওইনা হাইনা-হুম্না পাল্লম্বা মণিপুরনি। পুৱারীবী তাঙ্কক অমদা বৃটিশশিংনা লমদম অসিগী লৈঙাক্লোন্দা খূৎ থিংজিল্লকপদগী ঐখোয়গী কোনুং ওইরম্বা কংলাদা বৃটিশ অফিসার মঙা অদুগা ময়াংখাংদা অনী পূন্না বৃটিশ তরেৎ হাৎখি। মসি হাৎলুবদগী ইং ১৮৯১গী মার্চ ৩১দা এঙ্গলো-মণিপুরী ৱার লাউথোকখি। লান শোক্নরবা মতুং চহী অসিগী এপ্রিল ২৭ কংলাদা বৃটিশনা য়ুনিয়ন জেক য়েকপা ফীরাল চিংখৎতুনা মণিপুর মীখা পোনখি।

মহাক্না হায়, মতম অদুদা বৃটিশ অফিসার তরেৎ হাৎখিবগা মরী লৈননা শেম্বা বৃটিশকী মী অহুম্ননা শাবা ত্রাইবুনেলনা ৱারেপ লৌরবা মতুং মতম অদুগী মণিপুরগী নিংথৌ মহারাজ কুলচন্দ্র য়াওনা মী ২৩ কলাপানী (আন্দমান এন্দ নিকোবর আইলেন্দস) দা লো্ থাখি। লান মায়থিজরবসু ঐখোয়গী ইপা-ইপুশিং অদুনা কৈদৌনুংদা সরেন্দর তৌখিদে। অদুগুম্বা ইপা-ইপু অথৌবশিং অদুগী মফমদা মীরোল অসিনা ইকায়খুম্নবা হায়বসি তঙাই ফদবা অমনি।

জয়চন্দ্রনা মখা তানা হায়, আন্দামান এন্দ নিকোবর আইলেন্দসতা লৈবা মাউন্ত হেরিত হৌজিক্না মাউন্ত মণিপুরী ওনখ্রবা মফম অদুদা মফম অদুদা চৎখিবা ইপা-ইপুশিং অদুবু তুংগী মীরোল কয়ানসু নীংশিংহৌনবা শেমগৎ-শাগৎপা চঙই। মসি খল্লগা য়ুসি এমনা প্রাইম মিনিস্তরদা মেমোরেন্দম অমা ঙসি নুংথিল য়ৌহনখ্রে। হায়রিবা মেমোরেন্দম কোপি অসিমক য়ুনিয়ন হোম মিনিস্তর, আন্দমান এন্দ নিকোবর আইলেন্দসকী এম পিদসু য়ৌহনখি।

য়ু সি এম (য়ুনাইতেদ কমিতি মণিপুর) গী মায়কৈদগী য়ৌহনখিবা মেমোরেন্দম অদুদা য়াওরিবা ৱাফমশিংদি ইং ১৮৯১ এঙ্গলো-মণিপুরী ৱারদা বৃটিশনা লোই থাখিবা লমদম অসিগী মতম অদুগী নিংথৌ মহারাজ কুলচন্দ্র সিংহগী লাইফ সাইজ মীতম অমা মাউন্ত মণিপুরদা থম্বা, মহাক্কা লোয়নখিবা লমদম অসিগী অথৌবা ইপা-ইপুশিং অদুগী নীংশিং খুভম শেমগৎপা, মণিপুর য়াওনা য়ুমথংনবা স্তেতশিংগী ভিজিতরশিং অমসুং অথৌবশিং অদুগী মচা-মশুশিংনা চৎলুবদা লৈবগী খুদোংচাবা ফংহন্নবা মফম অদুদা রেস্ত হাউস অমা শাবা, অদুগা হৌজিক হৌজিক মফম অদুদা ‘মণিপুর পর্বত নেসনেল পার্ক’ হায়না সাইনবোর্দ থেৎলিবা অদু ‘মাউন্ত মণিপুর নেসনেল পার্ক’ হায়না ওন্থোক্নবা ৱাফম য়াওরি হায়না জয়চন্দ্রনা ফোঙদোকখি।

মেমোরেন্দম অসিমক য়ু সি এমগী মীহুৎশিংনা চীফ মিনিস্তর নোংথোম্বম বীরেনগসু উনদুনা পীশিনখ্রে। চীফ মিনিস্তরগী মায়কৈদগীসু হায়রিবা অসি শোয়দমক্কী থবক ওইনা ওন্থোক্কনি হায়বগী থাজবসু পীরকখি হায়না জয়ন্দ্রনা ফোঙদোকখি।

সোর্স: পোক্নফম

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু