বাংলাদেশতা মণিপুরীশিংগী 'অপূনবা পীস মিটিং' অমা পাংথোকখ্রে
সিলেট, জুন ১০ : ঙরাং ইরাই নুমীৎতা (৯ জুন ২০২৩) মৌলভীবাজার ডিস্ট্রিক্ট মনুং চন্না লৈবা ভানুগাছকী তেতইগাঁওদা লৈবা মণিপুরী কালচারাল কমপ্লেক্সতা মণিপুরদা থা অমা হেন্না চত্থরক্লিবা অৱা -অনা, মীহাৎ-মীপুন, য়ুম মৈ থাবনচিংবা থৌদোকসিদা অৱাবা নুংঙাইতবা অমসুং লাংতক্নবা ফোঙদোক্তুনা বাংলাদেশকী মণিপুরীশিংগী অপূনবা 'পীস মিটিং' অমা পাংথোকখ্রে।
শক্নাইরবা সোশ্যাল এক্টিভিস্ট এল ইবুংহাল সিংহ শ্যামলনা ময়ায় তাংবল লৌদুনা ফমখিবা মীফমদুদা গেস্ট ওব ওনার ওইনা বাংলাদেশ মণিপুরী সাহিত্য সংসদকী প্রেসিডেন্ট কবি এ কে শেরাম, মণিপুরী কালচারাল কমপ্লেক্সকী প্রেসিডেন্ট এল জয়ন্ত কুমার সিংহ অমসুং বামসাস, কমলগঞ্জ ব্রাঞ্চকী প্রেসিডেন্ট এম বীরেন্দ্র কুমার সিংহনা শরুক য়াখি। অয়েকপম অঞ্জুনা কনডাক্ট তৌখিবা থৌরমদুদা অতৈসু ৱা ঙাঙবিখি থোঙাম প্রহ্লাদ, বৃন্দারানী সিনহা, লৈচোম্বম রাজকুমার, থাংজম সুখ, অশোক অঙোম, ওইনাম পামহৈবা, হাওবম সুধীর, সিলেটকী য়ুম্নাম নৃপেন্দ্র, বিশগাঁওগী উৎপল সিংহ রনি অমসুং বরইতলীগী এল প্রসেনজিৎ। থৌরমগী অহৌবদা হন্দক্কী থৌদোকসিদা মণিপুরদা পুন্সিগী পোন্থা পীখ্রবা মণিপুরী ইপা-ইপল, ইমা-ইন্দোল অমদি ইচিন্নাওশিংগী লৈখিদ্রবা আত্মাগী শান্তি নিদুনা মিনিট অমা তুমিন্না লেপখি ।
ৱাঙাঙলোয় ময়াম্না মখোয়গী ৱারোলদা থৌদোক অসিদা অৱা-অনা নংলবা ময়ামগী অৱাবদা শরূক য়ামিন্নবগী ৱাফম ফোঙদোকপগা লোয়ননা মণিপুরদা অমুক য়াঙনা হান্নগুম শান্তিগী অইংবা ফিবম অমা পুরক্নবা মপূদা থৌনিজখি অমসুং মতীকচাবা খোঙথাং লৌখৎপিনবা মণিপুর সরকার অমদি ভারত সরকারদা অকনবা দাবি থমখ্রে হায়রি।
0 কমেন্ট:
কমেন্ট তৌবিয়ু