মণিপুরদা শান্তি পুরক্নবা অঙম্বা থৌদাং লৌবীয়ু হায়না লিসিপ্রিয়া কাঙুজমনা পোপ ফ্রাঞ্চিসকা উনখ্রে
ইম্ফাল, জুন ৬ : মালেমগী মমীং লৈরবা ইনভাইরোমেন্ট এক্টিবিষ্ট লিসিপ্রিয়া কাঙুজমনা ঙসি অয়ুক ভাটিকান সিটিদা খৃষ্টান লাইনিংগী মকোক ওইরিবা পোপ ফ্রাঞ্চিস উনদুনা মণিপুরদা শান্তি পুরক্নবা অঙম্বা থৌদাং লৌবীয়ু হায়না তকশিনখ্রে। মহাক্না মণিপুরদা থোক্লিবা হিংসা অসিগী মরমদা মরিক চুম্বা পাউদম অমদি ৱারীশিং লিদুনা অচুম্বশিং অদু খৃষ্টানশিংগী ঈশ্বরগী মশক ওইরিবা পোপতা ৱারী লিদুনা খঙহনখি।
লিসিপ্রিয়ানা মেমোরেন্দম অমসু পোপতা পীশিন্দুনা ক্লাইমেট চেঞ্জনা অমাঙ অতা অমদি অৱাবা পীরিবা লায়রবা লৈবাকশিংদা ইনাকখুনবা লৈবাকশিংনা পীফম থোকপা ক্লাইমেট কম্পেন্সেয়নশিং পীনবসু তকশিনখি। মহাক্কী ওফিসিয়েল ওইবা নুমিৎ মঙানিগী রোমগী খোঙচৎ অসিদা ইটালিগী খ্বাইদগী চাওবা মেদিয়া কোম্পানি ওইরিবা জিইদিআই গ্রুপ্না শিনবা গ্রিন এন্ড ব্লু ফেষ্টিবেলদসু ইটালিগী প্রজা মীয়ামদা ৱা ঙাংখি।
হায়রিবা থৌরম অসি ৱার্ল্ড ইনভাইরোমেন্ট ডে ২০২৩ গা মরী লৈননা মালেমগী মমিং লৈরবা য়ুনেস্কো ৱার্ল্ড হেরিটেজ সাইট অমসু ওইরিবা ড কোলোসিয়ামদা পাঙথোকখি। লিসিপ্রিয়া ভাটিকানদা লেবা পোপ ফ্রাঞ্চিস উননবগীদমক মালেমগী নহা ওইরিবা লুচিংবী মঙা খনগৎপগী মনুংদা মহাক্কী মমিংসু য়াওরকখিবনি। পোপনসু মণিপুরগী শান্তি পুরক্নবগীদমক পাংবা য়াবা অঙম্বা মতেং পাংগনি হায়খি।
পোপনা মালেম অসিবু কনবদা মখা তানা অচৌবা থৌদাং লৌবীখো হায়না নহাশিং অদুদা হায়খি। মহাক্না ক্লাইমেট ডিজাষ্টরনা মরুওইনা মীওইবা কয়াগী পুন্সি পিখম্নহল্লিবা অসিদা নুংনাংবসু ফোঙদোক্লদুনা মীওইবা খুদিংমক্কী অপুনবা য়ুম ওইরিবা মালেম অসিবু কনবদা পূন্না থৌদাং লৌমিন্নবা চঙই হায়খি।
লিসিপ্রিয়ানা পোপতা পীশিনখিবা চেরোলদুদা মরুওইনা ‘ক্লাইমেট ইদুকেসন’ মারেমদা লৈরিবা কেথলিক অমদি খৃষ্টান মিসিনরি স্কুলশিংদা লাইরিক ওইনা শুংশোয় শোয়দনা তমহনবীয়ু হায়বনচিংবা ৱারোলশিং য়াওরি। মখা তানা লিসিপ্রিয়ানা নহাক্কী শান্তিগী পাউজেল অমনা মণিপুরদা থোক্লিবা হাৎন-শুনবা থৌদোক কয়া অসি লেপহনবা ঙমগনি। মণিপুরদা মীওই ৮০,০০০ হেন্না ময়ুম মকৈ লৈতদুনা অৱাবা মায়োক্নরি। মীওই ১০০ রোমসু লৈখিদ্রে। অঙাং ঐখোয়দি শান্তি পাম্মী অমদি ঐখোয় পূন্না নুংশি-চান্ননা পূন্না হিংমিন্নবা মথৌ তাদ্রবা হায়না পোপতা ৱাহং হংখি।
ঐহাক্না মণিপুরদা থোক্লিবা হিংশাগী থৌদোক্না অৱাবা তাহল্লিবা মৈতৈ অমদি কুকি অঙাংশিং অপূনবগীদমক মালেমগী লৈবাক কয়াগী মতেংগা লোয়ননা লেমনা বোর্ডিংদা লৈদুনা ক্লাস ৱানদগী ১২ ফাওবা লাইরিক তম্বীনবা ফ্রি রেসিডেন্সিয়েল স্কুল অমা খোংজোমদা লিংখৎকনি।
স্কুল অসিগী পান্দমদি লেম্না মহৈ মশীং তমহনবতা নত্তনা লেমনা চাবা, ফিরোল অমসুং লাইরিকসু পীগনি। হায়রিবা স্কুল অসিনা মালেমদা ‘সিম্পোল ওফ পিছ’ অমা ওইবা ঙমগনি। মসি শুংশোয় শোয়দনা থবক ওইনা পাঙথোক্কনি হায়না লিসিপ্রিয়ানা ফোঙদোকখি।
লিসিপ্রিয়া মথং চয়োলদা ফ্রেন্সকি প্রেসিডেন্ট ইমানুয়েল মেক্রোননা শিনবা মীফম অমা য়াওরুনবা পেরিসতা থা অসিগী ১৯ দগী ২৪ ফাওবা চৎক্কনি। অমদি কিগালি, ৱানদাদসু চত্তুনা আফ্রিকান লুচিংবশিং উনগনি লোয়ননা য়ুনাইটেড নেসন্সকি মকোক থোংবশিংগসু উনদুনা মণিপুরদা শান্তি পুরক্নবা মহাক্কী মায়কৈদগী অঙম্বা থাক্তা হোৎনগনি হায়রি।
সোর্স : সঙাই এক্সপ্রেস
0 কমেন্ট:
কমেন্ট তৌবিয়ু