স্নাখ্যা রাজকুমার কমলজিৎকী চহী ২২শুবা নোংগা কুমওন
আগরতলা, জুন ২৪ : তখেনদা মৈতৈগী পুৱারীবু মশক থোক্না তাকপীরম্বা অমদি ইমালোলনা ফোঙবা মরূপ পাউচে হৌদোকপীরম্বা স্নাখ্যা রাজকুমার কমলজিৎ লৈখিদবগী চহী ২২শুবা নোংগা কুমওনদা শ্রদ্ধাঞ্জলি কৎপগী থৌরম চৎখিবা জুন ২৪ মরূপকী শঙ্গাইদা পাঙথোকখ্রে।
নুংথিল পুং ৫.৩০ তাবা মতম হৈকৎ লৈকৎ তমদুনা লৈখিদ্রবা স্নাখ্যাগী নোংগা কুমওন থৌরমদা মণিপুরী সাহিত্য পরিষদ, মণিপুরী লিটরেরী কলচরেল ফোরাম, লময়ানবা নচিংবা তোঙান তোঙানবা সংস্থাগী মীওইশিং শ্রদ্ধাঞ্জলি কৎপদা য়াওখি। থৌরম অদু শ্রীশ্রী রাধামাধবকী প্রধান পুরোহীত সিজগুরুময়ুম অভিজিৎ ভট্টাচার্য্যনা ময়াই তাংবল লৌরগা সাহিত্য পরিষদকী এডভাইজর ৱাংখেম বীরমঙ্গল, শক্নাইরবা কবি এন নিরঞ্জন, ত্রিপুরা লৈঙাক্কী আই. সি. এগী হান্নগী জয়েন্ট ডিরেক্টর এল কুমার প্রেসিডিয়াম মেম্বর ওইনা শরুক য়াখি।
মরূপকী ইডিটর আরকে তরুনজিৎনা ওক্না ৱারোল পীখি। লৈখিদ্রবা স্নাখ্যানা হিংলিংঙৈ মতমদা তৌরম্বা থবক থৌদাং কয়াগী মরমদা পরিষদকী প্রেসিডেন্ট এল বীরমঙ্গল, জেনারেল সেক্রেটারী থৌদাম নীলকুমার সিংহ, ফোরামগী সেক্রেটারী খোইস্নাম মংগল, কবি এল মীনা, লময়ানবা সংস্থাগী সেক্রেটারী কেএসইচ মাধবী নচিংবনা তোঙান তোঙানবা মীৎয়েং থমদুনা ৱা ঙাংখি।
থৌরম অসিগা মরী লৈননা স্নাখ্যাবু শৈথারদুনা কবি নিরঞ্জন, কেএইচ মংগল, টি যোগেন্দ্র, এল মীনা, সিজা মলিনা, সনসম উমা, কেএসএইচ মাধবী, এইচ বেবী নচিংবা শৈরেং শৈদিন্নবা থৌরম অমসু তোঙান্না পাঙথোকখি।
সোর্স: মরূপ
0 কমেন্ট:
কমেন্ট তৌবিয়ু