শক্নাইরবা অইবা কবিরাজ মোইরাংথেম রাজেন্দ্র লৈখিদ্রে
ইম্ফাল, সেপ্টেম্বর ২৯ : মণিপুরী লোলগী শক্নাইরবা অইবা মোইরাংথেম রাজেন্দ্র ঙসি নুংথিল মশাগী পোক্নফম তেন্থা খুঞ্জাও ময়াই লৈকায়দা লৈখিদ্রে।
লৈখিদ্রবা অইবা মোইরাংথেম রাজেন্দ্র কুমজা ১৯৪১ গী ফেব্রুয়ারী ১৫দা মোইরাংথেম ইবোতোম্বা অমদি নাওরেম নিংঙোল মোইরাংথেম ওংবী কুমতি (গুনমনি) গী মপারী ওইনা থৌবাল দিস্ত্রিক্তকী মনুং চনবা তেন্থা খুঞ্জাও ময়াই লৈকায়দা তাইবং খোঙদারকখি। মহাক্না লৈখিদবদা মশাগী চহী ৮৫ শুখ্রে।
মহাক পোক্নফম পাউ-চে অসিদা মতম মতমগী কান্নরবা আর্তিকল কয়া ইদুনা পাউচে অসিগা অফবা মরীসু লৈনরকখিবা শক্নাইরবা অইবা অমনি।
লৈখিদ্রবা মোইরাংথেম রাজেন্দ্র অহানবদা নাওরেম নিঙোল জমিনিগা য়ূম্বাল লম্বীদা খোংদামীন্নখি অদুবু লোইনবী জমিনি ঙন্না তাইবংপান থাদোকখি। তুংদা মোইরাংথেম ওংবী মেম্মাগা য়ূম্বানমিন্নখি।
অইবা রাজেন্দ্র গুৱাহাতি য়ুনিবর্সিতিগী মখাদা এম এ (ইকনোমিক্স) লোইশিল্লবা মতুংদা থৌবাল কলেজদা চহী ৩১গা থা ৮ ওজা ওইরম্লগা কুমজা ২০০০ দা থবক্তগী পোত্থাখি। তোঙান তোঙানবা হীরমদা খুৎথারম্বা অইবা অমনি। মহাক্না হিংলিঙৈ মতমদা লাইরিক ৫৬কী মথক্তা ফোঙখিবতা নত্তনা বুকলেত ফোর্মেত্তা লাইরিক ২৩ রোম ফোঙলমখি। খুৎই ওইনসু কয়া থম্লকখি। মহাক লাইরিক ইবা অইবা অমা ওইবগী মথক্তা মহাক্না মণিপুরী লিতরেচর অমদি কলচরবু য়োকখৎনবগী ৱাখল্লোনদা তোঙান তোঙানবা এৱার্দ ১০ রোমগী এৱার্দ দোনরশিং ওইদুনা মীয়ামগী থৌগল তৌরম্মী। লোয়ননা তোঙান তোঙানবা লোইনশিল্লোন (সাহিত্য) গী লূপ ১১গী অচংবা লূপ্লোই ওইরম্মী।
কুমজা ১৯৭৮ দা মহাক্কী লাইরিক ‘ভারত রুসিয়াগী লল্লোন ইতিক’ তা সোবিএত লেন্দ নেহরু এৱার্দ ১৯৭৮’ পীদুনা ইকায় খুম্নখি। ঙসি ফাওবদা তোঙান তোঙানবা লূপশিংনা এৱার্দ ৮, মিংথোল ১৩ অমদি শকখঙচে ১৭ লোম পীদুনা ইকায়খুম্নবা ঊৎখি। লমদমসিগী শক্নাইরবা অইবা খাইদেম প্রমোদিনিনা হিংলিঙৈ মতমদা মোইরাংথেম রাজেন্দ্রগী মফমদা ‘কবিরাজ’ হায়বা ৱাংলবা মিংথোল অসি পীদুনা ইকায় খুম্নখি।
মোইরাংথেম রাজেন্দ্রগী ফোঙখ্রবা লাইরিকশিংগী মনুঙদা পনবা য়াবা খরদি ভারত রুসিয়া লল্লোন ইতিক, ৱাংজিং তেন্তা তুথৈতোল, রাজেনগী রাজেন-রাজেন রাজেন, হিংনা হিংনা হিংনিংই, অনৌবা মণিপুরগী লময়ানবা ৩, তেন্থাগী ৱারী, তেন্থাগী রাজেন মোইরাংথেম রাজেন্নচিংবনি।
অইবা মোইরাংথেম রাজেন্দ্রনা ঙসি ইখঙ খঙহৌদনা লৈখিদবা লমদমসিগী অইবা অইবী কয়ানা মহাক্কী য়ূমদা লাক্তুনা অৱাবা ফোঙদোক্নখি। ঙসি নুমিদাংৱাইরম অইবগী অরোইবা মথৌ মঙম পাঙথোকখিবগা লোয়ননা অইবগী মফমদা অৱাংবা থাক্তা ইকায়খুম্নবা ঊৎখ্রে হায়রি।
সোর্স: পোক্নফম
0 কমেন্ট:
কমেন্ট তৌবিয়ু