অশৈবা অনী ইকায়খুম্নগদৌরি
ইম্ফাল, সেপ্তেম্বর ২৮ : ওক্তোবর ৭ তা পাঙথোক্কদবা ‘মণিপুরী শৈরেংগী নুমিৎ’ থৌরমদা মণিপুরগী শক্নাইরবা শৈরেং ইবা অশৈবা (কবি) অনী- য়ূম্লেম্বম ইবোমচা, কৈশাম্পাৎ লৈমজম লৈকায় অমসুং লনবোন কবুই, মহাবলি কবুই খুলবু ফিক্সন এন্দ পোইত্রি ক্লব মণিপুরনা ইকায়খুম্নবা ঊৎকদৌরি।
ফিক্সন এন্দ পোইত্রি ক্লবনা থাদোরকপা চেরোল অমনা হায়, শক্নাইরবা অশৈবা অনীগী মফমদা ইকায়খুম্নবা ঊৎকদৌরিবা অসি অশৈবা অনী অসিনা মণিপুরী শৈরেংগীদমক শাংলবা চহী কয়া অমা কত্থোকপগা অমগা লোয়ননা লৌরকখিবা থৌদাংশিং অদুবু শকখঙবা অমদি অৱাংবা থাক্তা মমল লৈনা লৌজবদগীনি।
য়ুম্লেম্বম ইবোমচা মোর্দন মণিপুরী অশৈবশিংগী মনুংদা য়াম্না মরু ওইবা অশৈবা অমনি। হৌজিক ফাওবদা শৈরৈংগী লাইরিক ২, ৱারীমচাগী লাইরিক ১ অমসুং ত্রান্সলেসনগী লাইরিক অমা পূন্না লাইরিক ৪ পুথোকখ্রে। কুমজা ১৯৯১ দা সাহিত্য একাদেমিনা পীবা সাহিত্য একাদেমি মনা অমসুং কুমজা ২০০৮ দা ত্রান্সলেসন প্রাইজসু ফংখ্রে। অশৈবা অসিগী শৈরেং লাইরিক ‘শন্দ্রেম্বী থোরক্লো নহুম পোঞ্জেন শাবিগে’ হায়বসিসু কুমজা ১৯৭৪ দা স্তেত কলা একাদেমিগী মনা ফংখিবনি।
লনবোন কবুই মণিপুরী লোলদা শৈরেং অমসুং দ্রামা লাইরিক ১০ গী মথক্তা ফোঙখ্রে। কবুই লোলদসু তম্ন-লাইরিক য়াওনা তোঙান তোঙানবা মখল কয়াগী লাইরিকশিং ফোঙখি। মহাক্কী ‘ঈগী মচুদি খেন্নদে’ হায়রিবা শৈরেং লাইরিক অসিদা নহারোল সাহিত্য প্রেমি সমিতি, ইম্ফালনা কুমজা ২০০৮ তা পদ্মা দেবী এৱার্দ পীদুনা ইকায়খুম্নখি। মণিপুরী সাহিত্য পরিষদ, মেঘালয়নসু কুমজা ২০১২-২৩ দা কাব্য ভূষন পীদুনা ইকায় খুম্নবা ঊৎখি।
কৈশাম্পাৎতা লৈবা স্তেত সেন্ত্রেল লাইব্রেরি ইম্ফালদা পাঙথোক্কদৌরিবা মণিপুরী শৈরেংগী নুমিৎ হায়বা থৌরম অসিদা ফিক্সন এন্দ পোইত্রি ক্লাব, মণিপুরগী মায়কৈদগী শক্নাইরবা অইবা অনী অসিবু ইকাইখুম্নবা ঊৎপগা লোয়ননা শকখঙচে অমা, শাল অমা অমসুং অচম্বা খুদোল খরা তমগনি হায়রি।
সোর্স: পোক্নফম
0 কমেন্ট:
কমেন্ট তৌবিয়ু