মেঘালয়দা খুন্দারিবা মীতৈশিং লৈঙাক্কী খুদোংচাবা ফংহন্দনা থম্বীরি
ইম্ফাল, সেপ্টেম্বর ৩০ : মেঘালয়গী বাংলাদেশকা ঙমখৈ লোন্না লৈরিবা ভোলাগঞ্জ য়াওনা তোঙান তোঙানবা খুল ৫দা খুন্দারিবা মীতৈশিং মেঘালয় লৈঙাক্না পীফম থোকপা খুদোংচাবা অমত্তা পীবিদবনা য়াম্না ৱানা পুন্সি লেলহৌরি। মেঘালয় লৈঙাক্কা তান্নরগা মীয়ামগীদমক অঙন্বা মতেং পাংগনি হায়না প্লানিং এন্দ দিভলপমেন্ট ওথোরিটিসু ওইরিবা কৈরাও এ সিগী এমল এল এ লৌরেম্বম রামেশ্বর মীতৈনা ফোঙদোকখ্রে।
মেঘালয়দা খুন্দারিবা মীতৈ ইচিল ইনাউশিংগী পুন্সিগী অৱা নুংঙাই অমসুং মখোয়না থেংনরিবা খুদোংচাদবশিং অদু য়েংশিন্নবা চৎখিবা খোঙচৎ অমদা ৱাফম অসি এম এল এ রামেশ্বরনা মফম অদুদা খুন্দারিবা মীতৈশিংদা ফোঙদোক্লমখিবনি।
এম.এল.এ. এল রামেশ্বরনা হায়, মফম অদুদা হৌজিক লৈরিবা মীতৈ য়ুম ২৫ রোম অসিবু মেঘালয় লৈঙাক্না নাথৈরগা থম্বীবগী মমি অমা তাবা অসি নুংঙাইতে। মফম অসিদা লৈরিবা মাইনোরিটি ফুরুপশিংগী মনুংদা মীতৈ অসিসু অমনি। অদুবু মাইনোরিটি অমা ওইবগী খুদোংচাবা পীবগী মহুত্তা জেনারেল কেটোগোরিদা ওইনা থম্বীবগী ৱাফম তাবদা নুংঙাইতবা ফাওই।
এন ই সিগী অফিসিয়েল উন্নবা মতমদা শোত্থরবা মফমশিংদা শেমগৎ শাগৎনবগীদমক চাদ ৩০গী ফান্ডিং অমা থাদনবা ৱাফম লৈরবসু মেঘালয় লৈঙাক্না মদুগী মখাদা খুদোংচাবা পীবিদবগী ৱাফম খঙহল্লকপা লৈ। মণিপুরদা খুন্দারিবা খাসিশিংগী প্রোব্লেম থোক্লকপা মতমদা মণিপুর লৈঙাক্না চঙশিল্লগা মতেং পাঙবিরি। অদুবা মেঘালয় লৈঙাক্না মণিপুরীশিংবু নাথৈবগুম তৌবা অসি নুংঙাইতবা ফাওই। অদুবু করিগুম্বা প্রোব্লেম অমা লৈবা মতমদা চীফ মিনিষ্টার নৎত্রগা ঐহা ইশাগী টেলিফোনদা পাউ পীবিয়ু। মেঘালয় লৈঙাক্কা তান্নরগা পায়খৎপা য়াবা থবকশিং পুম্নমক পায়খৎকনি।
মফম অসিদা লৈরিবা মীতৈশিংনা সনামহী লাৎপীদুনা মীতৈ অমা ওইবগী চৎনবী ঙাক্না লৈরম্বা অসি উবদা অপেনবা ফাওই হায়খি। খোঙচৎ অদুদা ভোলাগঞ্জ মীতৈ দিভলপমেন্ট সোসাইটিগী সেক্রেটারী কুল্লজিৎ খোঙবান্তাবমনা হায়, মেঘালয়গী বাংলাদেশকা তায়নবা মফম অসিদা লৈরিবা খুল ৫ ভোলাগঞ্জ, নয়াবস্তি, কুড়িখাল, বাইরোং, কোইলাঘাট হায়রিবা খুল মঙা অসিনা পুন্না য়ুম ২৫ তারি।
খুল ৫ অসিদা হান্না য়ুম ৩০০ রোম তারম্বদগী মতম অমদা শেন্থোক লম্বী লৈতবা অমসুং বাঙলাদেশকী ঙমখৈ ওইবনা ঙমখৈল লানশিল্লক্লগা হুরান চিন্থি কনবনা মরম ওইরগা লৈবা ঙম্নরক্তবদগী আসামগী গুৱাহাটি, হোজাই, মণিপুরনচিংবা মফমশিংদা হোংখিবদগী য়ুম ২৫ খক্তমক ঙায়বনি। হৌজিক মেঘালয়দা লৈজরবসু সিটিজেন অমা ওইনা ফংফম থোকপা কয়অ ফংবা ঙমদনা লৈরি। মীতৈশিংনা কন্না হোৎনবদগী ভোটার আইদি কার্দ ফাওবদি ফংবা ঙম্লে। মফম অদুদা লৈরিবা খাশিশিংনা মীতৈশিংদা খুদোংচাবা অমত্তা পীনিংদে। মফম অদুদা য়াম্না তোন্না লৈবগা মান্নরি।
মফম অদুদা খুন্দারিবা মীতৈশিংগী অপাম্বদি মফম অদুগী মীয়ামগী য়েংবীরগা লৈঙাক্কী থাক্তা ৱারী শাবীদুনা মেঘালয় লৈঙাক্কী মায়কৈদগী মীতৈশিংদা ফংফম থোকপা হকশিং অদু ফংহনবীরবদি হায়নিঙাই লৈতনা থাগৎকরি। মণিপুর লৈঙাক্না মণিপুরদা খুন্দারিবা খাসিশিং অসিগীদমক প্রোব্লেম থোক্লকপদা হোৎনবিরিবা অসিগুম্না মেঘালয় লৈঙাক্না মণিপুরীশিংগীদমক করিগুম্বা অমত্তা হোৎনবীদে। প্রোব্লেম থোক্লকপা মতমদা ফাওবা চীফ মিনিষ্টারদি লায়রদুনা এম এল এ ফাওবনা হন্না য়েংবীদে হায়না নুংঙাইতবা ফোঙদোরকখি। মসিগী খুদোংচাদবা অসি মেঘালয় লৈঙাক্তা মণিপুর লৈঙাক্না ৱারী শাবীদুনা মীতৈশিংবু সিতিজেন অমা ওইবগী ফংফম থোকপা খুদোংচাবা পুম্নমক অদু পীবিনবা হায়হন্নিংবগী অপাম্বা ফোঙদোরকখি।
সোর্স: সনালৈপাক পাউচৈ
0 কমেন্ট:
কমেন্ট তৌবিয়ু