• 874
• ১লা অক্টোবর ২০২২ ইং
• Share on:

সেপ্টেম্বর ৩০- ইন্তরনেস্নেল ত্রান্সলেসন ডে, ২০২২- নুমিৎ অসিগী মরু ওইবা ---তোংব্রম অমরজিৎ

ইন্টরনেস্নেল ত্রান্সলেসন ডে অসি সেপ্টেম্বর ৩০ করিগীদমক্তা তৌরিবনো হায়বসি  ত্রান্সলেটরশিংগী পেত্রোন সেন্ট ওইরিবা বাইবলবু গ্রিক অমসুং হিব্রুদগী লেটিনদা ত্রান্সেলেসন তৌখিবা সেন্ট জেরোমনা লৈখিদবা নুমিৎ অদু নিংশিংবনি অমসুং ইকায়খুম্নবা উৎনবনি। নুমিৎ অসি ইন্টরনেস্নেল ফেদরেসন ওফ ত্রান্সলেটরস্না ১৯৯১দগী হৌনা নুমিৎ অসি নিংশিং থৌরম পাংথোক্তুনা লাকলি। মসিগী মতুংদা ২০১৭দা য়ুনাইটেদ নেসন্সকি জেনরেল এসেমব্লিনা মে ২৪দা ৱারেপ অমা লৌদুনা সেপ্টেম্বর ৩০বু মলেম শিনবা থুংবা ইন্টরনেস্নেল ত্রান্সলেসন ডে পাংথোকনবা লাওথোকখি।

             তোংব্রম অমরজিৎ                    

লোন হায়বসি লৈরম্বনা মীওইবা খুনাইদা মসিগী মতেংনা মপাল নাইদ্রবা লৌশিং জ্ঞান পিদুনা লাক্লি অমসুং মীওইবনা ঙসি ফাওবদা চাওখৎপগী লম্বেলদা লাক্লিবা অসিদা লোনগী তোঙান তোঙানবা মেদিয়মদা মীওই বিলিয়ন কয়ানা ঈ-পাউ ফাওনদুনা ললোন-ইতিক তৌনরি। লৈবাক মশেল মরক্তা অফবা মরি শেমগৎপদা অমসুং কুতনিতিগী ওইবা ৱাফম লাকপদা ত্রান্সলেসন অমসুং ত্রান্সলেটরশিংনা চাওরবা থৌদাং লৌদুনা লাক্লি। খ্বাইদগী নৌনা ফংবা দাতাদা হৌজিক হৌজিক মলেমসিদা ঙাংনরিবা লোন অসি পুন্না ৭,১৫১নি। অসিগুম্বা অহিংবা লোন হায়বদি হৌজিক হৌজীক ঙাংনরিবা লোনগী মশিং অসিদা চাওরাকনা চাদা ৪০%দি মিপায়নিংঙাই ওইরে হায়বগী পাউদম অমসু লাক্লি। লোইলম মপুগী লোন অমসু ওইরিবা ইংলিস লোণ অসিনা মালেমদা খ্বাইদগী মশিং য়াম্না ঙাংনবা লোন অমসু ওইরি। চাওরাকনা ১.৪ বিলিয়ন মীওইনা ইংলিস লোন অসি শিজিন্নরি। মরু ওইবা লাইরিক কয়া, আর্কাইবেল মেতরিয়েলশিং, দোক্যুমেন্টেসনগী ৱাফম লাকপদা ইংলিস হায়রিবা লোন অসিদা ফোংনবা অমসুং থমজিন্নবা হোৎনরি। নোবেল প্রাইজ, বুকর প্রাইজ ফাওবা ইংলিস্তা ত্রান্সলেসন তৌরবা অদুগুম্বা ফজবা লিটরেরি ৱার্ক অদুদা ইকায়খুম্নবা পিরি। অদুবু অপিকপা ফুরুপ কাংলুপশিংনা শিজিন্নবা অমসুং ঙাংনবা লোনশিংদি অসিগুম্বা অচৌবা ফুরুপশিংনা ঙাংনবা দোমিনেন্ট ওইবা অমসুং ইনবা লোন অসিদা মহৈ মসিন তম্বা অমসুং ঙাংবা নত্রবদি খুদোংচাবা ফংবা ৱাৎপনা মশাগী লোন অদু তুংদা থম্লম্বা নত্তনা পাম্বৈ লৈতবা য়াওদবা নত্তে। তৌইগুম্বসুং ত্রান্সেলেসন হায়বা অমা লৈবনিনা লোন অমদা লৈরিবা নোলেজ কয়া অদু মপুং ওইবা মীয়াম্না খঙনবা অমসুং শিজিন্নবা লোন অমদা ত্রান্সলেসন তৌরগদি পুম্নমক খঙমিন্নবগী খুদোংচাবা অমদি পিরি। মালেমসিদা খ্বাইদগী মী মশিং য়াম্না ঙাংনরিবা লোন অসি ইংলিসনা ওইরি। মসিদা মীওই ১,১৩২ মিলিয়ন্না ঙাংনরি। অনীশুবদা মেন্দারিন ঙাংবা মীওইনা ১,১১৭নি। অদুগা হিন্দি লোন ঙাংলিবা অসিনা ৬১৫ মিলিয়ননি। ইংলিস লোন অসিমক মালেমসিদা লৈরিবা মীওই বিলিয়ন কয়াগী ফাওনলোণসু ওইরি। অদুনা লোন অসিদা নোলেজ টেক্স কয়াদি চাওরবা অমসুং মমিং লৈরবা ইন্সতিত্যুসন কয়াদা মহৈরোইশিংদা তাকপী তম্বীবগী মেদিয়মসু ওইরি। অদুনা ইংলিস লোন অসিসু খঙদবদি ইয়ামক য়াদ্রি। মরমদি নুমিৎ খুদিং ফোংনরিবা রিজনেল নুজপেপর ফাওবা ইংলিসতা য়াম্না ফোংনরি অমসুং ইনরি। ইংলিস লোননা  ওফিয়েল লেঙ্গ্যুএজ ওইবা স্তেট কয়া লৈবাক কয়াসু লৈরি। 
ইন্টরনেস্নেল ত্রান্সলেসন ডে ২০২২গী থিম অসিমকসু “এ ৱার্ল্ড ৱিদাউত বেরিয়র” হায়বদি পল য়াওদবা মলেম অমা হায়বনি। অথিংবা অপনবা লৈতনা মনিং তম্না লোন অমনা অমদগী তমদুনা খঙনিংবা কয়া খঙনবা অমসুং লৌশিংগী পুক্কৈ হেনগৎনবা হোৎনবা মতম অদুনা লাকপদা লোন হন্দোকপগী শিনফমদা লৈবা লেঙ্গ্যুএজ প্রোফেসনেলশিংনা করি করম্বা থৌদাং লৌরি হায়বসি পুম্নমকনা খঙমিন্নবা মথৌ তাই। নুমিৎ খুদিং পাউ চে পুথোকপদা ত্রান্সলেটরশিংনা লৌরিবা থৌদাং অসুক্কি মতিক চাওখ্রে। মাগী মাগী রিজনেল লেঙ্গ্যুএজতা মালেমগী ওইবা ই-পাউ কয়া খুদক্তা ত্রান্সলেসন তৌদুনা কান্নরবা ই-পাউ কয়া পিরিবসি মসিবু নিংশিংবা নুমিৎ অদুনি ইন্টরনেস্নেল ত্রান্সলেসন ডে নুমিৎ অসিদা মরু ওইনা পাংথোকনরিবা থৌরম অসি। মালেমসিদা তোঙান তোঙানবা কম্পানিদা, ইন্দসত্রিদা, হীরম কয়াদা ত্রান্সলেটর ওইনা থবক তৌদুনা মরু ওইবা ই-পাউ কয়া মালেমগী মীশিং খ্বাইদগী য়াম্বদগী হৌরগা মশিং লিকনা ঙাংনবা লোন খুদিংমক্তা লাইরিক কয়া অতৈ কান্নরবা মচাক কয়া সাইন্সতা, আর্টস্তা, মেদিকেল লিটরেচরদা অসিনচিংবা হিরম কয়াদা ত্রান্সলেসন তৌরিবা, থবক অসিদা মায়পুনদুনা হোৎনরিবা মীওইশিংবু ইকায়খুম্নবা উৎপা নুমিৎ অদুনি ইন্টরনেস্নেল ত্রান্সলেসন ডে। 
ইন্টরনেস্নেল ত্রান্সলেসন ডে অসি সেপ্টেম্বর ৩০ করিগীদমক্তা তৌরিবনো হায়বসি  ত্রান্সলেটরশিংগী পেত্রোন সেন্ট ওইরিবা বাইবলবু গ্রিক অমসুং হিব্রুদগী লেটিনদা ত্রান্সেলেসন তৌখিবা সেন্ট জেরোমনা লৈখিদবা নুমিৎ অদু নিংশিংবনি অমসুং ইকায়খুম্নবা উৎনবনি। নুমিৎ অসি ইন্টরনেস্নেল ফেদরেসন ওফ ত্রান্সলেটরস্না ১৯৯১দগী হৌনা নুমিৎ অসি নিংশিং থৌরম পাংথোক্তুনা লাকলি। মসিগী মতুংদা ২০১৭দা য়ুনাইটেদ নেসন্সকি জেনরেল এসেমব্লিনা মে ২৪দা ৱারেপ অমা লৌদুনা সেপ্টেম্বর ৩০বু মলেম শিনবা থুংবা ইন্টরনেস্নেল ত্রান্সলেসন ডে পাংথোকনবা লাওথোকখি। অদুনা মালেমগী লৈবাক কয়াদা ত্রান্সলেসনগী লমদা থবক তৌরিবা লৈঙাক্কী অমদি খোরিলোলগী লূপশিংনা নুমিৎ অসি ঙসিদি পাক শন্না পাংথোকনরকপা হেনগৎলকলি।
দিজিটেল এজ অসিদা মীওইবনা ফনা হৈ শিংলে হায়না খন্দুনা মেসিন ত্রান্সলেসন, গূগল ত্রান্সলেসন অসিনচিংবা এপ্লিকেসন ময়াম অমা পুথোকলবসু হৌজীকমক্কিদি য়াম্না এক্যুরেট ওইনা ত্রান্সলেসন তৌবদা লম অসিদা এক্সপরিএন্স লৈরবা নত্তনা মেচিন্না লোয়না মহুৎ শিনবা য়াদ্রি। ইন্দিয়াগুম্বা মীওই ফুরুপ কাংলুপ য়াম্না লৈবা, লাইনিং লাইশোন তোঙান তোঙানবা অমদি চৎনবী থাজনবী ময়াম্না পুন্না লৈবা চাওরবা লৈবাক অমদা ত্রান্সলেটর অমসুং ত্রান্সলেসনগী থৌদাং অসি ওন্থোকনা চাওখ্রে। চাওরখ্রবা লৈবাক অমসু ওরিবা মীয়াম মীহুৎ খন্দুনা লৈঙাকলিবা ইন্দিয়াদা ত্রান্সলেসননা লৌরিবা থৌদাং অসি অমুক্তং কুপ্না নৈনবা অমা চংলি ইন্টরনেসনেল ত্রান্সেলেসন ডেনা লাকপদা। মরমদি মালেমদা দেমোক্রেসি চৎপা লৈবাকশিংগী মরক্তা ইন্দিয়াসু থোইদোকনা য়াম্না শক্তি লৈখৎলকলিবা লৈবাক অমনি। লৈবাক অসিগী কন্সতিত্যসন অসিমক লৈরিবা মীওই মিলিয়ন কয়া অসিনা কয়া য়াম্না নিংথিজনা খঙলবগে হায়বসি হংনিংঙাই ওইরি। মরমদি হায়রিবা ইন্দিয়ান কন্সতিত্যুসন অসি ইন্দিয়াদা ঙাংনরিবা লোন করম করম্বদা ত্রান্সলেসন তৌরবগে হায়বসি হেক্তা লোয়না হায়বা ঙম্লোই। নেস্নেল ত্রান্সলেসন মিসননা লোনগা মরি লৈনবা মরু ওইবা প্রোজেক্ট কয়াদি লেপ্তনা পায়খৎলি হায়বা খঙনৈ। তৌইগুম্বসুং লোন ত্রান্সলেসন তৌবগা মরি লৈননা রিচার্স কয়া য়াম্না পায়খৎলবগে হায়বসি হংনিংঙাই ওইরি। 
অমরোমদা নেস্ননেল একাদেমি ওফ লেটরস, সাহিত্য একাদেমি ন্যুঊ ডেল্লিনা ইন্দিয়াগী নিপালশুবা সেদ্যুলদা চল্লবা লোনশিংদা লৈরিবা খোরিলোলগী পোত্থোক কয়া অমদি হিন্দিদা অমসুং ইংলিস্তা ত্রান্সলেসন তৌদুনা ফজরবা খোরিলোলগী পুক্কৈ অমা শেমগৎনবা হোৎনদুনা থবক কয়া পায়খৎলি। মনিপুরদসু সাহিত্য থৌপাং লূপ সাথৌলূপনা ইন্তরনেস্নেল ত্রান্সলেসন ডে অসি ২০১২তগী পাংথোকতুনা লাকখি। নুমিৎ অসিদা মনিপুর য়ুনিভর্সিতিদা ইংলিস দিপার্টমেন্তা প্রোফেসার ওইরিবা থৌনাওজম রতনকুমারদা মহাকনা শকনাইরবা অইবা নোংথোম্বম কুঞ্জমুহোনগী ইলিসা অমগী মহাউবু ইংলিস্তা ত্রান্সলেসন তৌবা অমদি লাইশ্রম সমরেন্দ্রগী শৈরেং খুল অমগী ৱারীবু ইংলিস্তা হন্দোক্তুনা পুথোকখিবা অমসুং ত্রান্সলেসনগী লমদা থবক কয়া লেপ্তনা পায়খৎলিবা থবকশিংদা শকখঙবা অমসুং ইকায়খুম্নবা উৎপা ওইনা  সর্দা ত্রান্সলেসন এৱার্দ পিখিবনি। অসুম্না খোরিলোণ্ডা লমদম অসিগী শকনাইরবা ত্রান্সলেটর অমদি সাহিত্যকার কয়াবু লেপ্তনা পুকনিং থৌগৎতুনা সর্দা ত্রান্সলেসন এৱার্দ পিখি। শকনাইরবা অইবশিং অমসুং ত্রান্সলেটরশিং অদুগী মনুংদা তয়েনজম বিজয়কুমার, রোবিন এস ঙাঙোম, এম য়ুমগী ইংলিস এন্ড কলচরেল স্তদিস দিপার্টমেন্টকী প্রোফেসার মোইরাংথেম মনি মৈতৈ অসিনচিংবা অইবা অমসুং ত্রান্সলেসটরশিংদা ত্রান্সলেসনগী মনা কয়া সাথৌলুপ্না পিদুনা লাকখি। মসিগী মতুং তারকপদসু নোংথোম্বম কুঞ্জমুহোন ত্রান্সলেসন প্রাইজ হায়দুনা ত্রান্সলেটর ওইরিবা বি এস রাজকুমারদা অমসুং অরিবম কুমার শর্ম্মদা লেমজনিংঙাই ওইরবা ত্রান্সলেসনগী মনা অসি পিদুনা লাক্লি। 
সাহিত্য একাদেমিনসু চহী খুদিংগী ত্রান্সলেসন প্রাইজ অসি ইন্দিয়ান কন্সতিত্যুসননা শকখঙলবা লোন ২৪দা লৈরিবা অইবশিংদা মখোয়না মখোয়গী মমালোন্দা অতোপ্পা লোনগী ফজবা লিটরেরি ৱার্কশিং ত্রান্সলেসন তৌবদা পিদুনা লাক্লি। অসিগুম্বা ত্রান্সলেসন প্রাইজ অসিনা অইবশিং অমসুং লোন হন্দোকপগী শিনফমদা থবক তৌরিবা মীওইশিংনা থৌনা অমদি হাপ্লি হায়বা য়াই। নাকল অমরোমদা অসিগুম্বা থৌওং অসিনা তোঙান তোঙানবা লোন, কলচর ত্রেদিসন অমসুং পুন্সি মহিংগী মরমদা হেন্না খঙনবা অমসুং হেন্না নকশিন্নবগী তাঞ্জবা অমসু পিদুনা লাক্লি। 
ইন্টরেনেটকী চহীচাসিদা ই-পাউগী লমদা থবক তৌরিবা জর্নেলিস্টশিংদা ত্রান্সলেসন হায়রিবা লম অসিদা থৌরিবা মপাল নাইদ্রবা থৌদাং অসিবুসু শিংথাবা অমদি শকখংবা মতম য়ৌরে হায়না খল্লি। তিভিদা, রেদিওদা অমসুং মেদিয়া হাউজশিংদা পাউমীশিংনা ত্রান্সলেটরশিংনা করি থবক তৌরি হায়বসিসু পুম্নমকনা খঙবীফম থোকই। লোন হন্দোকপা হায়বসিমকসু ইলায় লায়বা থবক অমদি নত্তে নাকল অমরোমদা মুন্না কুপ্পা খন্থরুরবদি। অমরোমদা লোন অনীমক হায়বদি সোর্স লেঙ্গ্যুএল অমসুং তার্গেৎ লেঙ্গ্যুএজ অদু ফনা খঙদ্রবদি খুদোংথিনিংঙাই ওইবা অমসুং লান্না পাউ শন্দোকখিদুনা ফত্তবা ফল লাকপসু য়াওদবা নত্তে।  লোন হন্দোকপগী থবক অসিমক লায়না লৌবা য়াদে হায়বদু ইন্টরনেস্নেল ত্রান্সলেসন দেনা লাকপদা নৌহৌনা নিংশিংহন্নিংই। 
লোন অমদা অমসুং শিজিন্নরিবা ময়েকশিংদা লোন অদুবু ঙাংলিবা শিজিন্নরিবা মীওই ফুরুপ কাংলুপশিং অদুগী আইদেন্তিসু য়াওদুনা অমসুং হিংদুনা চৎলি হায়বসিনি নীংশিংনিংঙাই ওইরিবসি।