মণিপুরী সাহিত্য পরিষদকী ৬২শুবা মীফম; হন্দক চহীগী মনা মথুম লান্থোকখ্রে
আগরতলা, জনুৱারী ২১ঃ মণিপুরী সাহিত্য পরিষদ, ত্রিপুরাগী ৬২ শুবা চহীগী মীফম পাঙথোকখিবগা লোয়ননা পরিষদনা পীবা হন্দক চহীগী মনা মথুম কয়াসু লান্থোকখ্রে। চৎখিবা জানুৱারী তাং ১৮, ভগৎসিং যুবরাজ কনফারেন্স হোলদা পাঙথোকখিবা থৌরম অদুদা চীফ গেষ্ট ওইনা মণিপুরী সাহিত্য পরিষদ, আসামগী প্রেসিডেন্ট ড. ফুরিৎসাবম বীরমনি শরুক য়াখি। পরিষদকী প্রেসিডেন্ট এল বীরমঙ্গলনা থোরম মপু ওহরগা ব্রাঞ্চ কমিটি মরিগী প্রেসিডেন্টশিং অহৈবম বুদ্ধচন্দ্র (নর্থ ডিস্ট্রিক্ট), হাজি আব্দুল নূর (ধলাই ডিস্ট্রিক্ট), খুমন্থেম উপেন্দ্র (সিপাহি জিলা) অমসুং থাংজম রথীন্দ্র (নোংচুপ) না গেষ্ট অব অনার ওইনা শরুক য়াখি। থৌরমগা মরী লৈননা কে ধীরেননা ইডিট তৌবা 'তখেন লৈরাং' ২০২৫ চহীগী চেফোঙসু পুথোকখি।
চহী ২/২ কাল্লগা শেম্বা হন্দক চহীসু এল বীরমঙ্গলবু মখাতানা অমুক প্রেসিডেন্ট ওইনা খল্লগা সেলৈবম খেলামোহন সেনবু পরিষদকী অনৌবা জেনারেল সেক্রেটারী হাগুনা মেম্বর ২৬ না শাবা অনৌবা এক্সেক্যুটিভ কমিটিগী মমিংসু লাওথোকখি।
নুংথিলগী মনা লান্থোকপগী থৌরমদা সাহিত্য একাডেমি, নিউ দিল্লী, মণিপুরী ল্যাঙ্গুয়েজ এডভাইজরী বোর্ড কনভেনর রাজেন তোইজাম্বানা চীফ গেষ্ট ওইখি। থৌরমদা আসামগী প্রেসিডেন্ট ড. ফুরিৎসাবম বীরমনি, ত্রিপুরাগী প্রেসিডেন্ট এল বীরমঙ্গল অমসুং ওএনজিসিগী পোত্থারবা এম বিভাস কান্তি সিংহসু শরুক য়াখি। থৌরম অদুদা তোঙান তোঙানবা হীরমদা মীওই ১২ দা তোঙান তোঙানবা নীশিং মনা পীদুনা ইকাইখুম্নখি।
সোর্স - মরূপ
0 কমেন্ট:
কমেন্ট তৌবিয়ু