• 155
• ৪ঠা ফেব্ররুয়ারি ২০২৬ ইং
• Share on:

ফেশন তুরিজম পাঙথোকখ্রে

ইম্ফাল, ফেব্রুৱারী ১ঃ স্টেত অসিগী তুরিজমবু হেন্না অৱাংবা থাক্তা পুখৎনবগী পান্দমদা শক্নাইরবা দিজাইনর রোবর্ত নাওরেমগী ফেশন তুরিজম ২০২৬ ঙসি লোক্তাক পাৎ মপালদা পাঙথোকখ্রে।
পোলো সিতি অমসুং এরিফ্রেমগী মতেঙ্গা লোয়ননা সেন্দ্রাদা লৈবা এল দি এ কমপ্লেক্সতা পাঙথোকখিবা ফেশন তুরিজম অদুগী মতাঙদা রোবর্ত নাওরেমনা হায়, প্রোজেক্ত অসি মতম কুইনা তৌরকপা অমনি। ইভেন্ত তুরিজমবু অৱাংবা থাক্তা পুখৎনবা শীনবনি। ফেশনগী খুত্থাংদা তুরিজম চাওখৎনবগী পান্দমদা থৌরম অসি লমকোয়বশিং লাকফম ওইরিবা লোত্তাক পাৎ অসিদা পাঙথোকপনি। মণিপুরগী লোক্তাক পাৎকী ফজবা অসি উহন্দুনা মণিপুরদা ফজবা মফম অমা লৈ হায়না মালেমদা শক্তানবগীদমক ইভেন্ত অসি পাঙথোকপনি।

                             শক্নাইরবা দিজাইনর রোবর্ত নাওরেম

মহাক্লা হায়খি, ইভেন্ত অসি নুপাগীনি। মপান লমদগী মোদেল ২০ য়াওনা পূন্না মোদেল ৪০ রোন্না ইভেন্ত অসিদা শরুক য়ারি। ইভেন্ত অসিদা ইয়োংনা শাবা ফিরোলশিংদগী হৌরগা তোঙান তোঙানবা কলেক্সনশিং য়াওরি। শো অসিগী কোরিগ্রাফরনা নেসনেলগী শো দিরেত্তর কেরেলাদগী শামখাননি। মণিপুরগী ফজবা অমদি মশক ফজরবা নহা কয়াগী তেলেন্তশিংনা মপান লমগী মোদেল কয়াদগী তমহৌরগা মখা তানা তুংগী লম্বীদা আশা অমগা লোয়ননা মপূং ফাবা নহাশিং ওইনবগীদমক ইভেন্ত অসি শীনবনি।
মহাক্লা হায়খি, ফেশননা লমদম অসিগী হেন্দলুম অমসুং তেক্সতাইল ইন্দম্ব্রিজ অসি অৱাংবা থাক্তা পুখৎনবা হোৎনবদা অচৌবা লম্বী অমা ওইরিবনি। ২০১৩দা মণিপুরদা মহাক্কী অহানবা শো অদুদগী অদুক্কী মতীক অহোংবা লাকখ্রে। হেন্দলুমগী পোখোকশিং অসি ফেশনদা পুথোরকপদগী মসিগী ফজবা অসি উরকখি। ইনখৎলক্লিবা নহাশিং দা লমদম অসিগী ত্রেদিসনেল অসি ফেশননি হায়না হেন্না শেৎপা হৌনরে। মসিনা ফিশাবীশিংদা লৈরিবা মার্কেতদা অচৌবা কান্নবা পী হায়না লৌই।
মণিপুরগী মোদেলশিং ধুনুবে, মার্তিন, ট্রেলা লুৱাং, নিরুপমা, হান্সননচিংবা ইন্তরনেসনেল অমসুং নেসনেলগী থাক্তা মোদেলদা অচৌবা ফিন্দা থম্লগা লাকখি। অদুবু মখোয়গী ফিদা অসি লমদম অসিদা ইরৈ লৈতবগুম তৌরিবগী মতাঙদা হংবা ৱাহংগী পাউখুম পীরদুনা রোবর্তনা হায়খি, ইন্তরনেসনেল ক্রাউনিং তৌরুরবা মতুৎদা এলবমগুম্বা কুম্লগা অদুম লৈখিবা য়াওদবা নত্তে। হেন্না অৱাংবা থাত্তা চৎনবা হোৎনহন্নিং ই। পেজেন্ত্রিগী লম্বীদা চঙলুরগদি নৎত্রগা ফেশনগী লমদা চঙলুরগদি মখোয়গী চপ মান্নবা লম্বীদা মখা তানা চৎহন্নিংই। মসিগী ফিদা অসিনা লমদম অসিগী ত্রেদিসন অমসুং কলচর উৎলিবনি।
কলচরেল প্রমোসন তৌরিবা অসিদা ইকায়খুন্নফম থোকই। ফিল্ড খুদীংমক্কী প্রোফেসনেলশিং চপ মান্ননা ইকায়খুন্নফম থোকই। তুংদা লাক্লিবা অমদি লৈরিবা মোদেলশিংবু মহাক্বী মায়কৈদগী অঙম্বা থাক্তা গাইদ তৌগনি অমদি তৌরগসু লাক্লি হায়নসু রোবর্ত নাওরেমনা ফোঙদোকখি।
সোর্স : পোক্নফম