মণিপুরী শৈরৈংগী নুমিৎতা কবি অহুম ইকাইখুম্নবা উৎকদৌরি
ইম্ফল, সেপ্টেম্বর ২৯: লাক্লিবা মেরাগী থানিন (পূর্ণিমা) ওক্টোবরগী তাং ৯, ২০২২ নোংমাইজিং নুমিত্তা পাঙথোক্কদৌরিবা ‘মণিপুরী শৈরৈংগী নুমিৎ, ২০২২’ তা মণিপুর লোলগী শক্নাইরবা শৈরৈং ইবা কবি অহুম- ১) মোইরাংথেম রাজেন্দ্র সিংহ, তেন্থা ২) রঘুবীর থিয়াম, য়াইরিপোক অমসুং ৩) খ্বাইরাকপম অনন্দিনী, পোরোম্পাৎপু ফিক্সন এন্দ পোইট্রি ক্লাব, মণিপুরগী মায়কৈদগী ইকাইখুম্নবা উৎলগনি হায়রি।
ইকাইখুম্নবা উৎচগদৌরিবা অসি শক্নাইরবা কবি অহুম অসিনা মণিপুরী শৈরেংগীদমক শাংলবা চহী কয়া অমা কত্থোকপা অমগা লোয়ননা লৌবিরকখিবা থৌদাংশিং অদুবু শকখঙজবা অমদি অৱাংবা থাক্তা মমল লৈনা লৌজবা ওইননি হায়না ক্লাব অসিগী মায়কৈদগী ফোঙদোরক্লি।
ফিক্সন এন্দ পোইট্রি ক্লাব,মণিপুরনা ইকাইখুম্নবা উৎকদৌরিবা কবি মোইরাংথেম রাজেন্দ্র সিংহ, থৌবাল দিষ্ট্রিক্টকী তেন্থাদা কুমজা ১৯৪১ দা পোকখি। হৌজিক ফাওবদা শৈরেংগী লাইরিক তরামঙা হেন্না ফোঙখ্রে হায়রি। কবি রঘুবীর থিয়াম, থৌবাল দিষ্ট্রিক্টকী য়াইরিপোক্তা কুমজা ১৯৪৬ তা পোকখি। হৌজিক ফাওবদা শৈরৈংগী লাইরিক তরারোম ফোঙখ্রে হায়রি।
কবি খ্বাইরাকপম আনন্দিনী, কুমজা ১৯৫২ দা পোকই। ইম্ফাল ইষ্টকী পোরোম্পাৎতা য়ূম পানবী অইবী অসি মণিপুরী খোরিরোলদা অহানবা শৈরেংগী লাইরিক ফোঙখিবীনি। অইবী অসি হৌজিক ফাওবদা শৈরেংগী লাইরিক মঙা হেন্না ফোঙখ্রে হায়রি।
জেএন মণিপুর দান্স একাদেমিদা মেরাগী থানিন (পূর্ণিমা) অক্টোবরগী তাং ৯, ২০২২ নোংমাইজিং নুমিত্তা পাঙথোক্কদৌরিবা ‘মণিপুরী শৈরৈংগী নুমিৎ-২০২২’ কী শরুক অমা ইকাইখুম্নবা উৎচগদৌরিবা অসিদা শক্নাইরবা কবি অহুম অসিগী মফমদা ফিক্সন এন্দ পোইট্রি ক্লাব, মণিপুরগী মায়কৈদগী শকখঙচে অমা, শ্বাল অমা অমসুং মেমেন্টো অমমমসু য়াওগনি হায়নসু মখা তানা ফোঙদোরক্লি।
সোর্স: সঙাই এক্সপ্রেস
অতৈসু পাবীয়ু : রাজর্ষি ভাগ্যচন্দ্র লৈখিদবগী ২২৪শুবা কুমওন নুমিৎ হুম্নি চুপ্না বাংলাদেশতসু পাংথোকখ্রে
0 কমেন্ট:
কমেন্ট তৌবিয়ু