মণিপুরী শৈরেংগী নুমিৎ পাঙথোকখ্রে
ইম্ফাল, অক্টোবর ৯ : ইন্ডিয়াগী অমদি মালেমগী মফম কয়াদা খুন্দারিবা মণিপুরী-মীতৈশিংনা মেরাগী থানিল নুমিৎতা ‘মণিপুরী শৈরেংগী নুমিৎ’ পাঙথোরকপা হায়বসিদি ঐখোয়গী মণিপুরী জাতি অসি মপা-মপুগী লীক্লম কায়দবা অমদি লাইওইখ্রবা মপা-মপুবু লুনা নীংজবা জাতিনি হায়বদু তাকপনি হায়না খাঙবোক এসিগী এমএলএ সূর্যকুমার (কেনেডি) ওক্রমনা ফোঙদোকখ্রে।
ৱাফম অসি ঙসি জেএন মণিপুর দান্স একাদেমি ওর্দিটোরিয়ামদা ফিক্সন এন্দ পোইট্রি ক্লাব মণিপুর অমসুং জেএন মণিপুর দান্স একাদেমি ইম্ফলগা খুৎশম্নরগা পাঙথোকখিবা ‘মণিপুরী শৈরেংগী নুমিৎ’ পালন থৌরমগী হৌদোকপগী থৌরমদা অথোইবা মীথুং ওইনা শরুক য়াখিবা এমএলএ সূর্যকুমার (কেনেদি) ওক্রমনা ফোঙদোকখিবনি।
ফিক্সন এন্দ পোইট্রি ক্লাব মণিপুরগী প্রেসিডেন্ট ডাক্তার হৈস্নাম বুধিচন্দ্র সিংহনা থৌরম মপু অমদি লৈকোল ইম্ফালগী প্রেসিডেন্ট ক্ষেত্রিময়ুম সুবদনিনা থৌরমগী অখন্নবা মীথুং ওইনা শরুক য়াখিবা হৌদোকপগী থৌরম অসিদা এমএলএ সূর্যকুমান (কেনেডি) ওক্রমনা মখা তানা, ফিক্সন এন্দ পোইট্রি ক্লাব মণিপুর অমদি জেএন মণিপুর দান্স একাদেমি ইম্ফালগা খুৎশম্নরগা মেরাগী থানিল (পূর্ণিমা) নুমিৎ অসিদা মণিপুরী শৈরেংগী নুমিৎ থৌরম পাঙথোকপা অসি য়াম্না মরম চাবা অমদি অফবা খোঙথাং অমনি। ঐখৈায়গী লাইওইখ্রবা কবিশিংনা য়াৎপীরম্বা মণিপুরী শৈরেংগী, সাহিত্যঘী শাংলবা পুৱারী অমা লৈজরিবনি। মসিগী ময়েক লারবা খুদম কয়া অমা ঐখোয়গী খুন্নাই অসিদা লৈরিবনি।
অসিগুম্বা শৈরৈং অমসুং সাহিত্যগী মমল নাইদ্রবা খুদোলশিং ঐখোয়গী লাইওইখ্রবা কবি, অইবশিংনা থম্বীরম্বা ঙাক্তনি। মরম অসিনা অসিগুম্বা লাইওইখ্রবা কবিশিং, অইবশিংবু মমল লৈনা অমদি মখোয়গী নীংশিংবা হায়বসিনা হিংহৌরিবা মচা-মশু ওইবা ঐখোয়গী থৌদাংনি। অসিগুম্বা থৌদাং অমা ফিক্সন এন্দ পোইট্রি ক্লাব, মণিপুরনা লৌবিদুনা কুমজা ২০১৭ তগী মেরাগী থানিল নুমিৎতা ‘মণিপুরী শৈরেংগী নুমিৎ’ হায়না পালন তৌরকপা তশেংনা নুংঙাই। অদুগা হেন্না নুংঙাইরিবা হায়রিবা পালন থৌরম অসি মণিপুরদতা নত্তনা মণিপুরগী মপান্দা নেসনেল লেভেলদা লক্ষিপুর, গুৱাহাটি, ত্রিপুরাগী আগরতলা, দিল্লী, কোলকাটা, দিমাপুরদগী হেন্দোরক্তুনা ইন্টারনেসনেল থাক্তা কানাডাদা ফাওবা পাঙথোকরপা অসিনি।
অসুম্না ইন্দিয়াগী অমদি মালেমগী মফম কয়াদা খুন্দারিবা মণিপুরী-মীতৈশিংনা মেরাগী থানিল নুমিৎতা ‘মণিপুরী শৈরেংগী নুমিৎ’ পাঙথোকপা হৌখ্রবনি, পালন থৌরম অসি লেপ্তনা পাঙথোকপীদুনা মালেমদা মমিং লৈরবা থৌরম অমা ওইহননবা ঐখোয় পূম্বনা হোৎনমিন্নরসি হায়নসু ফোঙদোকখি।
এমএলএনা মখা তানা হায়, তূংদা হৌগৎলক্লিবা মহৈরোয়শিংগীসু পূক্নিং থৌগৎপা অমসু ওইরে। গবর্ণমেন্টগী পোলিসি ময়াম অমা লৈরি মসিগী মনুংদা কালচারেল পোলিসি অসিসু য়াম্না এক্টটিবেট তৌবিদ্রগদি মণিপুর চাওরবা কালচার মণিপুর পুৱারী লৈরিবা ময়অমশিং অসি পোইট্রি, লিটরেসিগী, লিটরেচর অমদি সাহিত্যঘী হীরমদা লৈরিবা ময়ামশিং অসি প্রর্জাব তৌবা য়াম্না ৱাগনি। হীরমশিং অসিগী মতাংদা এসেমব্লিগী হাওসতা পুথোক্তুনা লাকপনি।
মণিপুর ষ্টেট কলা একাদেমি হায়দুনা পেলেস কম্পাউন্দা চাউনা শাদুনা লৈরি। হায়রিবা মফম অসিদা সাহিত্যগী অমদি সাহিত্যগা মরী লৈনবা থবক-থৌরমশিং কয়া তৌবা অমদি খন্ন-নৈনবা য়াই। অদুবু হায়রিবা হোল অসি হৌজিক ফাওবা লোইশিনবিদবা অসিগুম্বা থৌরমশিং অতোপ্পা মফমশিংদা হোল ৱাইরগা শীজিন্নরগা তৌদুনা লৈরে। হায়ুরিবা হোল অসি মতম চানা লোইশিনবিরবদি লিটরেচরগী মতাংদা ইন্টারনেসনেলগী নেসনেলগী থাক্তা ফাঙ্কসন তৌবা য়াবা মফম অমা হায়বদু ওইগদৌরিবনি।
মসিগা লোয়ননা মফম অসিদা নৈনফম ওইরদুনা ওজা গুরুশিং অমদি মহৈরোয়শিংদসু কান্নবা পীদৌরিবনি। অদুম ওইনমক হৌখিবা চহী মঙা তরুকসিদা হোল অসি লোইশিন্দুনা অদুমক লৈরে হোল অসি অথুবা মতমদা লোইশিনবা দরকার লৈ হায়না ফোঙদোকখি।
মণিপুরী শৈরৈং নুমিৎকী থৌরম অসিগী মখা চত্থরকপা ওইনা নুংথিলগী অনীশুবা সেসনদা মণিপুরী সাহিত্য পরিষদ ইম্ফালগী প্রেসিডেন্ট লোংজম জয়চন্দ্রনা অথোইবা মীথুং অমদি জেএন মণিপুর দান্স একাদেমি ইম্ফালগী দাইরেক্টর পুখ্রম্বম বিলাসনা থৌরম মপু ওইনা শরুক য়াখি। থৌরম অসিদনা মণিপুরী লোলগী অহল ওইরবা শক্নাইরবা কবি মোইরাংথেম রাজেন্দ্র (তেন্থা), রঘুবীর থিয়াম (য়াইরিপোক) অমদি খ্বাইরাকপম আনন্দিনী (পোরোমপাৎ) তসু শকখঙচে অমদি শ্বাল পীদুনা ইকাই খুম্নবা উৎখি।
থৌরম অসিদা মণিপুরী শৈরেংগী নুমিৎ-২০২২ কা মরী লৈননা ‘ৱাক্সা মখোঙ শোম্বা’ হায়বা পান্দমদা পাঙথোকখিবা অইবা শৈরেং চাংদম্নবদা মকোক-মথং তারবশিং অমসুং ঙসি অয়ূক্কী সেসনদা পাঙথোকখিবা শৈরেং থীবা চাংদম্নবা (রিসাইটেসন কম্পিটিশন) দা মকোক-মথং তারবশিংদসু মনা-মথুম য়েন্থোকখি। পালন থৌরম অসিগী অহুমশুবা অরোইবা সেসনদনা শক্নাইরবা অইবা সলাম তোম্বানা শৈদিন মপু ওইরগা অশৈবা-অশৈবী ১৬ না শরুক য়াদুনা শৈরেং শৈদিন্নবা অমা পাঙথোকখি। শক্নাইরবা কবি য়ূমলেম্বম ইবোমচানা শৈদিন মপু ওইরগা পাঙথোকখিবা শৈরৈং শৈদিন্নবদসু অশৈবা-অশৈবী ১৬ না শরুক য়াদুনা শৈরেং শৈদিন্নখি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু