মণিপুরী চনুরা খোর্জৈলূপ কাছারনা শীন্দুনা মণিপুরী শৈরেংগী নুমীৎ পাঙথোকখ্রে
ইম্ফাল, ওক্টোবর ০৯ : মণিপুরী চনুরা খোর্জৈলূপ কাছারনা শীল-লাঙদুনা মণিপুরী শৈরেংগী নুমীৎ লক্ষিপুর জুনিয়র কোলেজ, ফুলতলাদা পাঙথোকখ্রে হায়না মণিপুরী চনুরা খোর্জৈলূপ কাছারগী জেনারেল সেক্রেটারি এম সোবিতানা থাদোরকপা চেরোল অমনা ফোঙদোরক্লি।
ঙসি পাঙথোকখিবা মণিপুরী শৈরেংগী নুমীৎ থৌরম অদুগী মনুং চন্না অয়ুক পুং ১০ তাবদা লূপ অসিগী ভাইস প্রেসিদেন্ট থোকচোম অঞ্জনানা মীফম মপু, জিসি কোলেজ সিলচর মণিপুরী দিপার্টমেন্টকী থবক্তগী পোত্থারবা কঙাবম নয়ন চান্দনা অথোইবা মীথুংলেন, সাহিত্য একাদেমী এৱার্দী নাওরেম বিদ্যাসাগরনা অখন্নবা মীথুং অমদি লৌখাম অতোলসিংহগা লোয়ননা সী ঐচ মোহন সিংহনা অখন্নবা মীথুং ওইনা শরুক য়াখি।
থৌরম অসিগী অহৌবদা সী ঐচ বিদিতনা শৈহৌ ঈশৈ শক্তুনা থৌরম হৌদোকখি। লূপকী থৌবুরেল মোইরাইথেম সোবিতানা তরাম্না ওকপগী ৱারোল পীখি। লোয়ননা সগাপম মেরিনানা ৱাহৌদোক ওইনা মণিপুরী শৈরেংগী নুমীৎকী মরমদা মীয়ামদা মচা খায়না ফোঙদোকখি।
ঙসি পাঙথোকখিবা মণিপুরী শৈরেংগী নুমীৎ অদুদা ইঙুদম বিনোদ, ইঙুদম সতিশ, জি নরহরি শর্ম্মা, খাইদেম কান্ত অমদি জিরিবামদগী লাকপা ৱাই বলিয়া তোম্বীনচিংবনা থৌরম অদুগা মরী লৈননা মখোয়গী ওইবা ৱাখল্লোনশিং ফোঙদোকখি। নুংথিলগী থৌরমদা সাহিত্য একাদেমী এৱার্দী নাওরেম বিদ্যাসাগরনা ময়াই তাংবল লৌদুনা শৈরেং শৈদিন্নবগী থৌরম অমসু পাঙথোকখি।
শৈরেং শৈদিন্নবা অদুদা জিরিবাম, সিলচর, বন্তরাপুর, সোনাই, বাসকান্দি অমদি লক্ষিপুরনচিংবা মফমশিংদগী লাকপা অইবা-অইবী ৩৫না মশা-মশাগী অইবা শৈরেংশিং পাথোকখি। লোয়ননা লূপকী মায়কৈদগী শৈরেং শৈদিন্নবা অদুদা শরুক য়াখিবা অইবা-অইবী খূদিংমক্তা সার্টিফিকেট অমমম পীদুনা ঈকায়খুম্নবা উৎখি।
থৌরমদুগা মরী লৈননা হৌজিক হৌজিক মণিপুরী শৈরেংগী ওইরিবা ফীভম অমদি মতম অমদা মণিপুরী শৈরেংগী ওইরিবা মওং মতৌ অমসুং হোংলক্লিবা শৈরেংগী মরমদা শরুক য়াখিবা ৱাঙাংলোয়শিংনা মশা-মশাগী ওইবা ৱাফমশিং ফোঙদোকখি। থৌরমগি অরোইবদা অনিতানা থাগৎ ৱাহৈ ফোঙদোকখি।
সোর্স: হুইয়েন লানপাউ.
0 কমেন্ট:
কমেন্ট তৌবিয়ু