আপডেট:
image

নেসনেল গেমসতা মণিপুরগী ইনুংঙানবী অমদি লক্সমীনা জুদো অমসুং ৱুশুদা গোল্ড লৌখ্রে, ইন্দুবালা, কবিদাসনা ব্রোঞ্জ ফংহৌরে

ইম্ফাল, ওক্টোবর ০৯: গুজরাটনা য়ূম্বু ওইদুনা চত্থরিবা ৩৬ শুবা নেসনেল গেমসকী ঙসি ১১নি শুবা নুমিৎতা মণিপুরনা জুদো মশান্নদা গোল্ড ১, ব্রোঞ্জ ১; ৱুশু মশান্নদা গোল্ড ১ অমদি ট্রাইথলোনদা ব্রোঞ্জ ১ পূন্না মেদেল ৪ ফংবা ঙমখ্রে। মণিপুরনা হৌজিক ফাওবদা গোল্ড ১৭, সিলভার ৬ অমদি ব্রোঞ্জ ১৬ পুন্না মেদেল ৩৮ ফংবা ঙমখ্রে। মণিপুরনা থাংজ নুমিৎ ফাওবদা পূন্না মেদেল ৩৪ ফংদুনা মেদেল টেল্লিগী ৮ শুবা মফমদা লৈরকখিবনি।

জুদো মশান্নগী ঙসি গান্ধীনগরগী মহাত্মা মন্দির এগজিবিসন হোল ১দা শান্নখিবা নুপগিী কেজি ৭০ মখাগী ফাইনেলদা ষ্টেটকী জুদোকা পি ইনুংঙানবীনা পাঞ্জাবকী সোনমবু মায়থীবা পীদুনা গোল্ড মেদেল ফংবা ঙমখি। অতোপ্পা নুপীগী কেজি ৭৮ মখাগী ব্রোঞ্জ মেদেল বাউটতা এন ইন্দুবালানা মহাক্কী রাজস্থানগী ওপোনেন্টবু মায়থীবা পীদুনা ব্রোঞ্জ মেদেল ফংবা ঙমখি।

অমরোমদা, ৱুশু মশান্নগী ঙসি গান্ধীনগরগী মহাত্মা মন্দির এগজিবিসন হোল-২দা শান্নখিবা নুপীগী তাওলু ইভেন্টকী ননক্বান অমদি ননদাওদা কোঞ্জেংবম লক্সমীনা গোল্ড মেদেল ফংবা ঙমখি। মশান্না অসিগী নুপাগী তাওলু ইভেন্টতা ষ্টেটকী শান্নরোয় তোইজম মেঘজিৎ, সলাম মার্শেল অমদি নিংথৌজম মালেমঙানবা অদুগা নুপীগীদা ৱাংখৈরাকপম নিংথিবীনা নিংথৌকাবা নুমিৎতা শান্নরগনি। মখোয়না শোয়দান মণিপুরগী গোল্ড মেদেল ফংগনি পানরি।

অতোপ্পা আই আই টি গান্ধীনগরদা ঙসি পাঙথোকখিা ট্রাইথলোন ইভেন্টতা ষ্টেটকী শান্নরোয় ক্ষেত্রিময়ূম কবিদাসনা সেকেন্ড ১;০৫;২৮ দা লমথুংফম য়ৌদুনা ব্রোঞ্জ মেদেল ফংবা ঙমখি। ইভেন্ট অসিদা এস এম বিগী আদর্শ অমদি বিশ্বনাথ য়াদবনা সেকেন্দ ১:০২:১৬ অমদি ১:০৪:৩৬ তা লমথুংফম য়ৌদুনা গোল্ড অমদি সিলভার মেদেল ফংবা ঙমখি।

বোক্সিং মশান্নগী ঙসি গান্ধীনগরগী মহাত্মা মন্দির এগজিবিসন হোল ৩দা শান্নখিবা নুপাগী কেজি ৫৭-৬০ কাঙলূপকী ক্বার্টর ফাইনেল বাউটতা ষ্টেটকী বোক্সার মোইরাংথেম মাইসননা মহাক্কী দেল্লীগী ওপোনেন্ট রিতিকপু য়ুনানিমস দিসিজন ৫-০ দা মায়থীবা পীদুনা সেমিফাইনেল চঙবা ঙমখি। নুপীগী ফুটবোল মশান্নদা মণিপুরনা ওরিষ্যাগা ফাইনেল নিংথৌকাব নুমিৎতা লম্বা তৌনরগনি।

সোর্স: হুইয়েন লানপাউ

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু