মণিপুরদা লৈমরেম্বী ইন্দুপ্রভাগী মীতম খিন্নবা মহাক্কী মায়কৈদগী অঙম্বা থাক্তা হোৎনগনি: স্পিকর সত্যব্রত
ইম্ফাল, এপ্রিল ১৫ : চহী খুদিংগী মহারাজ গম্ভীর সিংহ, নরা সিংহ অমদি হেরাচন্দ্রবু নীংশিংবগুম মণিপুরদা লৈমারেম্বী ইন্দুপ্রভাগী মীতম খিন্নবা হোৎনবদা মণিপুর লৈঙাক্না শোয়দনা য়ারক্কনি। লোয়ননা মসি থবক্তা ওন্থোক্নবা মহাক্কী মায়কৈদগী অঙম্বা থাক্তা হোৎনগনি হায়না বরাক তম্পাক্কী অকোয়বদা খুন্দারিবা মীয়ামদা লেজিসলেতিব এসেমব্লিগী স্পিকর থোকচোম সত্যব্রতনা থাজবা পীখ্রে।
ৱাফম অসি চহী তরেৎ খুন্তাকপা মতমদা অৱাশিংবু মণিপুরদগী তকথোকখিনবা হোৎনবদা অচৌবা থৌদাং লৌখিবী মণিপুরগী লৈমরেম্বী ইন্দুপ্রভাগী মিতম অমা ঙসি মণিপুর লেজিসলেতিব এসেমব্লিগী স্পিকার থোকচোম সত্যব্রতনা আসামগী কছার দিস্ত্রিক্তকী মনুং চনবা বিনাকান্দি পার্ত-২ দা মায়খূম হাংদোকপগী থৌরমদা ফোঙদোকখিবনি।
লৈমরেম্বী ইন্দুপ্রভা স্তেচু ইন্সতোলেসন কমিতি অমদি অথৌবশিংগী লীক্লম থিবা লূপ অনী পুন্না খূৎশম্নদুনা কছারগী বিনাকান্দি পার্ত-২ দা লৈবা সাউথ বরাক রুরেল দিবলপমেন্ত এজেন্সি কমপ্লেক্সতা পাঙথোকখিবা থৌরম অদুগী মনুং চন্না কমপ্লেক্স হায়না মিংথোন্দুনা নৌনা শঙ্গাখি।
থৌরম অদুদা অথোইবা মীথুঙলেন ওইখিবা মণিপুরগী স্পিকর তিঐচ সত্যব্রতনা হায়, ঐখোয়গী লাইওইখ্রবা অথৌবা-অথৌবীশিং অসি লৈরম্বগী মালেমদা ঙসি মীতৈশিং লৈরি হায়না শক তাকপা ঙম্বনি। ফুরূপ অসিবু মূৎতনবা হোৎনরম্বা অথৌবা-অথৌবীশিং অসিবু ঙসিগী অমদি তুংগী মীরোলশিংনা ইকায় খুম্নফম থোকই। অৱাশিংনা মণিপুরবু চহী ৭ চুপ্না খূদুম চনখিবা মতমদুদা অৱাশিং মণিপুরদগী তকথোকপা ঙমগনি নৎত্রগা ঙম্মোই হায়বগী মহারাজ গম্ভীর সিংহ অমদি নরা সিংহ অনীনা খূদম-চাংদম য়েংদুনা ঈশিৎখিবা কছারগী লেঙ ওন্দবী পাৎকী শক্তম অসি কয়াদনা থম্ননবা মহাক মশা অমদি ৱাখল মান্নবশিং পূনশিন্দুনা অঙম্বা থাক্তা হোৎনরগনি। পাৎ অসি মতমগী মতুংইন্না লম শোকচিল্লকপনা হান্নগী শক্তম অদুদা থম্নবা অকোয়বগী লমশিং অসি লৈশিন্নবা হোৎনগনি। ৱাখল শান্না উবা ঙম্বী, মরৈবাক নুংশিবী লৈমরেম্বী ইন্দুপ্রভাগুম্বী অমা মণিপুরগী মমোমলোই ওইনা ফংজবা অসিমক ঐখোয়গী লাইবক ফবনি। লোয়ননা লৈমরেম্বী অসিবু ইকা খুম্নবা ঙম্বা অসিমক পুন্সিগী অচৌবা মায় পাকপা অমনি হায়খি।
মহাক্না হায়, ৱারক্লবা অমদি তৌফম খঙদ্রবা মতমদা হৌখিবা ইপা-ইপুশিংগী পুৱারী নৈনবনা ৱারোইশিন পুরকপা ঙমগনি হায়বা মায়চৌপুরেলশিংগী পাউতাক অদু ঐখোয় লৌমিন্নসি। ঙসি-ঙসিমক ওইরিবা মণিপুরগী তঙদু-লৈতাদবা ফীবম অসিগী ৱারোইশিন পুরক্নবা হোৎনবদা ইপা-ইপুশিংগী লীক্লম অমদি পুৱারী নৈনবগী তঙায়ফদবা লৈ। য়েলহৌ ফুরূপশিং লিংজেল মান্নসি, পূন্না লেপমিন্নসি হায়না ফনা লাউরবসু মপুং ওইবা অমত্তা ওইবগী ফিরেপ লৌবা ঙমদ্রবদি মদুগী ৱাহন্থোক লৈতে। খুন্নাই অসিদা অনৌবা মায়ওন অমা পীবা ঙম্নবা অমদি অপূনবগী শক্তম শাগৎপা ঙম্নবা হোৎনমিন্নবা চঙই। ঐখোয়না খঞ্জরিবা অমদি নীংজরিবা মণিপুরগী অথৌবা-অথৌবীশিং অসিগী ৱাখল্লোন তুংইন্না মখোয়দা চেনখিবা মরৈবাক নুংশিবগী ইথিল অমদি লীক্লমশিং ঙাক্না চৎমিন্নরবা মতম অদুখক্তদা অপূনবগী ওইবা শক্তম শাগৎপা ঙমগনি হায়নসু মহাক্না মখা তানা ফোঙদোকখি।
পনবা য়াই, অৱাশিংবু মায়থীবা পীখিবা কছারগী নিংথৌ কৃষ্ণচন্দ্রগী তাল্লোয় ওইরম্বী মণিপুরগী নিংথৌ মোধুচন্দ্রগী মমোমলোই ইন্দুপ্রভানা মণিপুর অমদি কছারিশিংগী মরক্তা অফবা মরী থম্নবা হোৎনবদা অচৌবা থৌদাং কয়া লৌরমখি। থোইদোক্না চহী ৭ খুন্তাকপা মতমদা অৱাশিংবু মণিপুরদগী তান্থোক্নবা মণিপর লেভি শেমখিবা মতমদা মহাক্না অচৌবা থৌদাং লৌখি। মহাক্কী থৌনা লিংজেল অসিবু ইকায় খুম্নবা ঊৎপা ওইনা বৃতিশশিংনসু লৈমরেম্বী অসিবু ‘কছারগী মহারানী’ হায়বা মিংথোলফাওবা পীখি।
মিতম খিনবগী থৌরম অদুদা লৈমরেম্বী ইন্দুপ্রভা স্তেচু ইন্সতোলেসন কমিতিগী প্রেসিদেন্ত খাইদেম কান্তা, অথৌবশিংগী লীক্লম থিবা লূপকী প্রেসিদেন্ত নন্দো তেকচম অমদি লম অদুগী মশক নাইবা মীওই কয়ানা শরুক য়াখিবগা লোয়ননা স্তেচু অসিবু কৎখিবা আর কে নোংদ্রোনখোম্বা মৈতৈ য়াওনা স্তেচু অসি মপূং ফাহনবদা অচৌবা থৌদাং লৌখিবশিংদা খূদোলপোৎ পীদুনা ইকায় খুম্নবা ঊৎপগা লোয়ননা লৈমরেম্বী ইন্দুপ্রভাগী মিতম হাংদোকপগা মরী লৈননা সোভিনীর অমসু ফোঙখি।
সোর্স: পোক্নফম
0 কমেন্ট:
কমেন্ট তৌবিয়ু