• 831
• ১৪ই ডিসেম্বর ২০২১ ইং
• Share on:

পিবা অমসুং মথৌ — চোংথাম তোম্বা

পিবা মুন্নবগী থৌদোক অসি য়াম্না তোয়না থোক্লম্মী মতাং অসিদা হংবা য়ারিবদি করিগীদমক পিবা ফম অসি লোই থাবগী দন্ডি ফংবমখৈ মুন্নরিবনো হায়বসিনি। পিবা ফম পুরগা করি ওইজা-ওইথক ফংই হায়বা ৱাহং অমা হংনিংহল্লি। পিবা হায়বসি হৌজিক্কী মতমদদি থোইনা লুনা খন্নদ্রবসু মমাংঙৈ মতমদদি য়াম্না মরু ওইবা ফম অমা ওইরম্মী হায়বসি চৈথারোল কুম্বাবদা ইরম্লিবসিদগী খঙবা ঙম্মী। মমাংঙৈদদি শাগৈ খুদিংগী পিবা অমমম লৈরম্মী। হৌজিক্তি পিবা লৈতবা শাগৈ য়াম্না লৈরে। ‘পিবা’ হায়বসি কনানো অমসুং মাগী মথৌ অসি করিনো হায়বা হৌজিক্কী মীরোলনা কুপ্না খঙনদ্রে। শাগৈগী অপোকপা খুরুম্বা নুমিত্তা পিবানা লাইশোন-তিনশোন তৌদুনা অপোকপা খুরুম্বগী থৌরম পাঙথোকপা মতম অদুদা পিবা নীংশিংবা নত্তনা পিবাবু অতৈ মতমদা নীংশিংনদ্রে অমদি পিবাগী থৌসি ইরৈ লৈরকত্রে। মমাংঙৈদা নিংথৌ পাল্লিঙৈ মতমদদি, পিবাগী থৌ য়াম্লম্মী অমসুং শক্তিসু য়াম্না লৈরম্মী। মহারাজ চন্দ্রকীর্ত্তি সনা হাক্তক্তা পিবাগী ফম মুন্নবা য়াম্না তোয়না তোয়না থোকখি। অসিগুম্বা তাঞ্জাদা নিংথৌনা ৱায়েল্লি, চৈরাপনসু ৱায়েল্লি। নিংথৌগী ৱায়েল অদু য়ানিংদদুনা হঙ্গৎলুবগী, নিংথৌনা পিবা ফমবু মুন্নরিবা কাঙবুশিংবু লোই থাদুনা চৈরাক পীবগী ৱারীসু চৈথারোল কুম্বাবদা থেংনৈ। মতাং অমা অনীদং পঞ্জরবদা-‘৬নি, ইরাইদা শ্রীযুৎস্না মাঙদা মমাশীজা য়াওনা পিবা মুন্নবগী ৱায়েন তৌএ। লাইশুবম লোইবা হিদংগা শগোল তোংবগা পিবাদি অৱাদা লৈয়ে হায়দুনা মথং মূন্নৈএ। শঙগোইবা হিদংনা চুমএ। চান্দমসু পিবা মুন্নৈএ” (২/৬/১৮৫৪) “পোয়নুগী ২০ নি লৈবাকপোকপদা শ্রীযুৎ স্না মাঙদা য়ুম্নাম অনৌবা পিবা চরণসিংগা শঙগোইবা হিদংগা খৎনৈএ। শঙগোইবা হিদংনা খাইরগে হায় পিবানা ঐদি খাইয়ু হায়বা ঙমলোই, চিংথংখোম্বগী য়াথং লৈনবা খাইফদে হাই। অদুদা শ্রীযুৎ স্না য়াথংনা ইবুধৌ ভাগ্যচন্দ্র স্না হাক্তক্তা য়ুম্না অসি য়ুমদিন্নখরে খাইফদে হায়দুনা স্না য়াথং তোপ গারোৎতা ৱাখৈনৌ হায়দুনা হায়দোকএ। অদুদা য়াওবদি শ্রীমচা ইবুংঙো যুবরাজ নচিংবা অঙোম নিংথৌ ১, তুলিহন মেঞ্জোর ১, অহৈবা তোপ গারোৎকী অঙোম অপুম্বা, মাইবা শঙলেনগী খুমুজাম্বা পন্ডিত ১ শরাং পন্ডিত ১ অসিনচিংবা শঙগী হঞ্জবা হিদং য়াওনা য়ুম্নাম পিবানা লুপা ২ ৱাখৈএ। অসি মতুংদদি তৌফদরে হায়না লোইনখিএ। ” (৯/১২/১৮৭৩) “১৯ নি ঈরাইদা শ্রীযুৎ স্না মাঙদা চৈরাপকী ইবুংঙোশিং মচা ইবুংঙো যুবরাজ, মচা ইবুংঙো মন্ত্রী, মবাই ইবুংঙো চিংঙাখমচা পুখ্রনবা, শীবিজয়া গারোৎকী সৌগাইজমচা তুলিহন মেঞ্জোর, মাইবা শঙলেনগী খুমুজমচা পন্ডিত নচিংবা অহন্থেমচা হিদাক ফানবা হঞ্জবা, নিংথৌজমচা পোৎমাংবা হিদং, অঙোমচা লাইফম শেল্লুংবা, ব্রহ্মচারী ময়ুম ঠাকুরদাস বিদ্যানিধি অসি পুম্নমক য়াওনা চোংথামচা লাইফম হজারী চুড়াসিংগা চোংথামচা শাজৌগা পিবা মুন্নবগী বিচার তৌনববু শ্রীযুৎ স্না য়াথং চোংথাম শঙ্গাইগী ঈ, লাইফম হজারী নখোয়সু চোংথাম নন্দগী ঈ, নখোয়সু শ্রীস্না পুয়া অসি নমিৎ নুমিৎনা য়েংজৌ হায়না য়েংনবদা শঙগাইগী ঈ চুড়াসিংনা চুমদুনা শ্রীযুৎ স্না মাঙদা স্না শন ১ লুপা ১ ৱাখৈএ। লৈপাক্কী অঙম্বদসু নাই ১ ৱাখৈএ। নন্দোগী ঈ শাজৌদি লাল্লে হায়দুনা নাই ১ ৱাকোংএ। চোংথামচা নাহারুপ হজারী, বিলাৎতি মেঞ্জোর মচা নিংথৌ শেনবা খনবা ৩ মদি হায়রোইদবা ৱাবু হায়। মাগী মাগী দন্ডি মতিক চাবা লোই থাখ্রো হায়না চৈরাপ্তা পীথোক্তুনা চোংথামচা ৩ মনা ইপুকনদি য়াদে হায়রবদা শ্রীযুৎ স্না য়াথং ঐনা তৌবা বিচারবু য়াদে হায়রবদি চৈরাপ্তা ১ রক পীথৌও অদুগা তৌনৌও হায়না দোলাইপাবা শঙদা বন্দি থমদুনা বিচার তৌনববু শ্রীযুৎ স্না য়াথংগী বিচারনা চুমদুনা হিয়াঙ্গৈ ২৬ নি পানবা লংমাইচিংদা চোংথামচা নাহারুপ হাজরীনা কমেংদা বিলাৎতিনা লৈশাংখোংদা মেঞ্জোরগী মচা নিংথৌ শেনবনা লাংঙথেন্দা লোই থাই।” (১০/১০/১৮৭৩) পিবা মুন্নবগী থৌদোক অসি য়াম্না তোয়না থোক্লম্মী মতাং অসিদা হংবা য়ারিবদি করিগীদমক পিবা ফম অসি লোই থাবগী দন্ডি ফংবমখৈ মুন্নরিবনো হায়বসিনি। পিবা ফম পুরগা করি ওইজা-ওইথক ফংই হায়বা ৱাহং অমা হংনিংহল্লি। পিবা হায়বসি হৌজিক্কী মতমদদি থোইনা লুনা খন্নদ্রবসু মমাংঙৈ মতমদদি য়াম্না মরু ওইবা ফম অমা ওইরম্মী হায়বসি চৈথারোল কুম্বাবদা ইরম্লিবসিদগী খঙবা ঙম্মী। তশেংবমক, শাগৈগী পিবা অমনা অকক্নবা শক্তি খরা পায়রম্মী। শক্তিশিং অদুদি:- ১) শাগৈগী অপোকপা খুরুম্বদা পিবানা হৌদোক্কনি, লাইশোন-তীনশোনগা মরী লৈনবা থবক খুদিং মহাক্না তৌগনি। অপোকপগী চাকলোন কৎপা, হৈকৎ লৈকৎ তৌবদা পিবানা ঙমদাইনগনি। অপোকপদা কৎনবা হৌরিবা চাক্কী খুদম চাংদম মহাক্না য়েংদুনা চীদুগী অফ-ফত্তা ফল পীগনি। ২) শাগৈগী মী অমা লুহোংবা মতমদা পিবা অদুনা য়াবিরবাখক্তদা লুহোংবা অদু শাগৈনা শক খঙবা হায়বদু ওইগনি। লুহোংবগী থৌরম অদুদা কৎলিবা পোৎচংশিং অদু পিবানা পেন্দ্রবদি হোংলিবা অদু শাগৈনা শক খঙদে হায়না লৌবা ঙম্মী। ৩) শাগৈচাশিংগী মরক্তা কোনুং খন্দুনা নিংথৌগী থবক্তা পুহনবা অসি পিবাগী খুত্তা লৈরম্মী। পিবানা মহাকপু নিংথৌদা পুদুনা শক তাকত্রি মখৈ মহাক কোনুংদা ফম পুনবগী তাঞ্জা লৈরমদে। ৪) শাগৈচাশিংগী মরক্তা খুৎ-শা হৈবা মী য়াওরদুনা মহাক্না শারিবা পোৎলম অদু নিংথৌদা কৎনিংবা খুদোল তৌনিংবা তারবসু মহাক্না শাদুনা পুথোকপা পোৎচৈশিং নিংথৌদা কৎতুনা য়ৌহনবা অসিসু পিবাগী খুত্তা লৈরম্মী। পিবানা মহাকপু কোনুংদা পুদুনা নিংথৌদা মশক তাকপা চৎলম্মী। ৫) শাগৈগী অমদি লৈবাক্কী চৎন-লোনচৎ থুগায়বা শাগৈচাশিংবু পিবানা দন্ডি পীবা ঙম্মী। শম্না হায়রবদা, মহাক অসি অপিকপা মফম/কোল্লুপ অমগী ৱায়েল চত্থবগী হক মাঙোন্দা লৈরম্মী। ৬) শাগৈগী মীশিং হেঙ্গৎলকপা অমদি হন্থরকপা অসিনচিংবা কয়াবসু ইশিন্দুনা থম্বা অসি পিবাগী মথৌনি। কনাগুম্বা শাগৈগী মীওই অমা শোইনাইদ্রবদি হায়বদি মচা পোকত্রবদি মচা য়োকপগীশু চৎনবী লৈ। শাগৈগী ঈ য়োকপদি অদুম অয়াবা পী অদুবু অতোপ্পা শাগৈগী ঈ ওইরবদি পিবানা মদু মুন্না থিগৎলগা অমসুং মরি মখোং শেংনা খঙদোক্লবা মতুংদা অয়াবা পীদুনা য়োকহল্লি। হায়রিবশিং অসি হৌজিক্তি পিবা লৈতবা নত্রগা শক্তি লৈরক্তবনা চৎনখিদ্রে। ৭) অপোকপগী খুদম অসি য়ুমদাবা ফুরূপ ফুরূপ অদুগী ওইনসু লাৎনৈ। হায়রিবা অপোকপা অসিবু ফুরূপ অদুগী পিবাগীদা ইরাৎনৈ। পিবানা সেলুংবুস ওইগনি। অদুবু ফীভমগী মখা পোন্না শাগৈরক্তগী শেলুংবা খনবা য়াদে। পিবগী ফম অসি য়াম্না মরু ওইবগুম্না পিবা অসি মী অমনা হেক্তা ওইশিনবা য়াদে। পিবা ওইগদবা মী অদু য়াম্না কুপ্না য়েংলগা খনগদবনি। মরম অদুনা পিবা কনানা ওইবা য়াই হায়বা মতেক অমতং পঞ্জরি : শাগৈ অদুগী অহানবা পু পরীং ওইনা য়েংলগদি পু অহল-অহলগী অহলনা ওইগনি। পু অহল অদুগী মচাশিংগী মরক্তগীসু অহন্না ওইগনি। পু অহলদি ওইরগা মচা ধারা লৈহৌদ্রবদি মথং পু অদুগী অহন্না পিবা অমুক ওইগনি। অসুম্না পু পরীংগী অহল অহলশিং মথং মথংনা পিবা হেক ওইগনি। পিবা ওইগদবা মী অদু তুমন লৌবা মী ওইবা য়াদে। নুপীসু হায়ন-শীঙনরগা লৌবা ওইগদবনি। পিবা ওইগদৌরিবা মী অদুগী মমা অদুসু হায়ন-শীঙনরগা লৌবা নুপী ওইগদবনি। চেল্লকপী ওইবা য়াদে। মৌ ওইনা লাকপসু য়াদে। য়াম্না কুপ্না য়েংদুনা, য়েক থোকপা নত্তনা শিত্রা লৈতবী খনবা তাই। অসুম্না শাগৈগী পিবা খনবদা য়াম্না কুপ্না মুন্না য়েংহৌবা তায় নত্রবদি তুংদা শাগৈগী অমাঙবা য়াম্না লাক্কনি। লোইশিল্লকপদা, মৈতৈগী চৎনবীদা অসিগুম্বা নাৎ অসি লৈরম্বদগী থকসি-খাসি ঙাক্না শাগৈ মসুং লৈবাক্কী থৌদাংশিং নীংথিনা পাঙথোকপা ঙম্লম্মী। ফুরুপ অমগী হৌরকফমসু নাৎ অসিনা তাকই। মরম অদুনা পিবাগী চৎনবী অসি নীংথিনা য়োক্তুনা থম্বা চুম্মী খল্লি।