পদ্মশ্রী এৱার্দি শৌগাইজম থানিলনা লৈখিদবদা অৱাবা ফোঙদোক্নরক্লি
ইম্ফাল, মার্চ ৩১ : শক্নাইরবা পুঙগী গুরু পদ্মশ্রী এৱার্দি শৌগাইজম থানিলনা ঙসি খঙহৌদনা লৈখিদবদা মণিপুর ষ্টেট কলা একাডেমি, ইম্ফালগী ষ্টাফশিংনা মিনিট ১ তুমিন্না লেপ্তুনা লৈখদ্রবগী মফমদা ইকাই খুম্নবা উৎখ্রে হায়রি।
অমরোমদা, শক্নাইরবা পুঙগী গুরু শৌগাইজম থানিলনা মশাগী অনাবা অমদগী য়াইস্কুল য়ুম্নাম লৈকাইদা লৈবা মশাগী য়ুমদা খঙহৌদনা ঙসি অয়ুক লৈখিদবদা মণিপুরী সাহিত্য পরিষদ, ইম্ফালগী প্রেসিদেন্ট লোংজম জয়চন্দ্রনা প্রিসাইদ তৌদুনা মেম্বারশিংনা মিনিট ২ তুমিন্না লেপ্তুনা ঙসি অৱাবা ফোঙদোকখ্রে হায়রি।
লৈখিদ্রবা শক্নাইরবা পুঙগী গুরু অসি মণিপুরী সাহিত্য পরিষদ, ইম্ফালগী কুমজা ২০১১ দা পাঙথোকখিবা ৭৬ শুবা চহিগী মীফমদা বাদ্যরত্ন হায়বা উপাধি পীদুনা ইকাই খুম্নখ্রবনি। লৈখিদ্রবা ওজা অসি য়াম্না ঙল্লিঙৈ মতমদা অপোকপা মপাগী মফমদগী পুঙ তম্বা হৌরকখি। মথংদা গুরু কোইরেং, পার্থো, গুলাপ নচিংবদগী মথং-মথং তমহৌই। গুরু অমুবীদগীনা মণিপুরী জগোয়সু তমহৌই। কুমজা ১৯৭৪ দা নট সঙ্কীর্ত্তন পুঙদা পোষ্ট গ্রেজুয়েট দিপ্লোমা পাস তৌই। কুমজা ১৯৭৬ তা পুঙগী গুরু ওইনা জেএন মণিপুর দান্স একাদেমিদা থবক তৌবা হৌরক্লগা কুমজা ২০০৬ তা অফিসিয়েটিং দিরেক্টর ওইনা থবক্তগী পোত্থাখি।
মণিপুরী পুঙগী কলা অসিবু মালেমদা মশক তাক্নবা হোৎনবদা অচৌবা দায়িত্য লৌখিবা ওজা অসি ইন্দিয়াগী তোঙান-তোঙানবা মফম কয়াদা পাঙথোকখিবা কালচারেল ফেষ্টিবেল কয়া শরুক য়ারুবদা নত্তনা ইরাক, জার্মান, ফ্রান্স, য়ুএসএসআর, ইটালি অমদি চাইনা নচিংবা লৈবাকশিংদা সো কয়া উৎলুরে।
ওজা অসিনা হিংলিঙৈ মতমদা মরু ওইবা সংস্থান কয়াগী মেম্বার ওইরমখি। মরু ওইনা সঙ্গিত নাটক একাডেমি, নিউ দিল্লি, ষ্টেট কলা একাদেমিগী ইগজিক্যুটিব মেম্বার, বিশ্বভারতি য়ুনিভার্সিটি, শান্তিনিকেতন, ওয়েষ্ট বেঙ্গল নচিংবা পনবা য়াই। মশানা হিংলিঙৈ ফাওবা মণিপুরী সাহিত্য পরিষদ, ইম্ফালগী ইগজিক্যুটিব মেম্বারসু ওইরম্মী। লোয়ননা ‘লৈচল’ অমদি ‘ফুল য়ুধ’ কৌবা দান্স দ্রামা অনিসু কম্পোজ তৌদুনা মশামক্না দিরেক্সন পীখি। পুঙ চোলোম অমদি ধোল চোলোমনচিংবা কয়া অমা কোরিওগ্রাফ তৌখি। মৈতৈ পুঙলোন রাজমেল ৬৪, পুঙলোন রাজমেল ১২, খোমজিল্লবা মৈতৈ পুঙলোন তাঞ্জাউ অমদি রাগ মখল ৩২ কৌবা লাইরিক নচিংবুস ফোঙলম্মী।
ওজা অসিনা মণিপুরী নট সঙ্কীর্ত্তন পুঙগী লমদা তৌরম্লীবা দান অসিগীদমক ফংখ্রবা মনা অমদি উপধিশিংদি ষ্টেট অমদি য়ুনিয়ন গবর্ণমেন্ট অসিদগী ফেল্লোসিপ, ১৯৯৭ তা মণিপুরী সাহিত্য পরিষদ, ইম্ফালনা পীবা বাদ্যভূষণ অমদি বাদ্যরত্ন, কুমজা ১৯৮০ দা ষ্টেট কলা একাডেমি এৱার্দ, কুমজা ১৯৯৪ দা সঙ্গিট নাটক একাডেমি এৱার্দ অমদি কুমজা ২০০৪ দা ইন্দিয়া গবর্ণমেন্টগী পদ্মশ্রী এৱার্দ ফংখিবনি।
অমরোমদা, মণিপুরী সঙ্কীর্ত্তনগী মরু ওইনা মৈতৈ পুঙগী শক্নাইরবা গুরু শৌগাইজম থানিলনা ঙসি অয়ুক অঙনবদা য়াইস্কুল য়ুম্নাম লৈকাইদা লৈবা মশাগী য়ুমদা খঙহৌদনা লৈখিদবদা নহারোল সাহিত্য প্রেমী সমিতি, ইম্ফালগী প্রেসিদেন্ট নাওরোইবম ইন্দ্রমনিনা থৌরম মপু ওইদুনা ঙসি নুংথিল অথুবা মীফম অমা পাঙথোক্তুনা অৱাবা ফোঙদোকখি হায়রি।
অৱাবা ফোঙদোকপগী মীফমদা য়াওখিবশিংনা গুরু অসিনা হিংলিঙৈদা মণিপুরী কলা অমদি সংস্কৃতিগীদমক তৌরম্বা খুদোল কয়া অদুবু শিংথাবগা লোয়ননা লৈখিদ্রবগী থৱায়না তাইবং মপুগী খুয়াদা ইংনা চিক্না লৈরুনবা মিনিট ২ তুমিন্না লেপ্তুনা থৌনি থৌরম পাঙথোকখি। মহাক্না হিংলিঙৈদা নহারোল সাহিত্য প্রেমী সমিতিদা চহি ৩/৩ কান্নরগা পাঙথোক্কদবা মণিপুরী নাৎ অমদি কালচার নৈনবা সেমিনার নৎত্রগা সিম্পোজিয়াম শিন্ননবা মতিক চাবা শেনফম কৎপীরম্মী। কুমজা ২০২১ দা পাঙথোকখিবা অহানবা সেমিনারগী চেশিং খোমজিন্দুনা ‘মণিপুরী সঙ্কীর্ত্তনগী হৌরকফম অমদি মশক’ কৌবা লাইরিক ফোঙনবা শেনফমসু কৎপীদুনা ফোঙখি।
গুরু থানিল জৱাহরলাল নেহেরু মণিপুর দান্স একাদেমিদা ইচম চম্বা ওজা অম ওইরম্বদগী মথং-মথং প্রধান গুরু ওইরক্তুনা মমৈদা কুমজা ২০০৬ তা একাদেমি অসিগী দাইরেক্টর ওইনা থবক্তগী পোত্থাখি।
হিংলিঙৈদা মণিপুরী সাহিত্য পরিষদনা পীবা ‘বাদ্য ভূষণ (১৯৯৭), মণিপুর ষ্টেট কলা একাদেমি এৱার্দ (১৯৮০), সঙ্গিট নাটক একাদেমি এৱার্দ (১৯৯৪) অমদি ইন্দিয়া গবর্ণমেন্টগী পদ্মশ্রী এৱার্দ (২০০৪) গী মনাশিং ফংখি। মহাক্না মৈতৈ পুঙদা য়ূম্ফম ওইবা লাইরিক মরি অমদি রস ৬৪ শৈশক্কী খোমজিনবা লাইরিক অমা ফোঙখ্রে। মহাক্না লৈখিদবদা মণিপুরী নাৎ অমদি কালচারগী ওইবা মেনখৎপা ঙম্লরোইদবা মাঙজবা অমা ওইহৌরগনি। হিংহৌরিবা অৱাবা তাহৌরবা ইমুং-মনুঙগী অৱাবদসু সমিতি অসিনা শরুক য়ারক্লি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু