• 853
• ২রা এপ্রিল ২০২৩ ইং
• Share on:

ইনাৎ নুংশিবা, ইশাগী শক্তম ঙাকনা হিংনিংলিবা অমদি ইমালোলবু নুংশিবগী ঈহুল চেল্লিবা শৈরেং লাইরিক ‘অরোইবা অহিং’ লাইরিক অসিদা মিৎয়েং অমা

কোঞ্জেংবম সরিতা ত্রিপুরাগী মচিন তুমখৎলক্লিবী নহা অইবী অমনি। মহাক ১৯৮৭গী এপ্রিল ২৯দা নোংচুপ বাংলাগী মুর্শিদাবাদতা পোকখি। অমসুং ত্রিপুরাগী বামুটিয়াদা চাউরকখি। অপোকপগী মিংনা কোঞ্জেংবম কৃষ্ণমোহন  সিংহ কৌই অমসুং অপোকপীগী মিংনা কোঞ্জেংবম ওংবী মায়া দেবী কৌই। কোঞ্জেংবম সরিতা ওজাগী শিনফমদা লৈদুনা মহৈরোই কয়াবু লাইরিক লাইশু তাকপী তম্বীরি। অগরতালাগী অকাসবানিদা পাউ পাবগী থবকসু তৌরি। বাংলা অমসুং পোলিতিকেল সাইন্সতা পোস্ট গ্রেজুয়েটনি। নোংথোম্বম অমিতকা পুন্সি লৈপূন ওইদুনা আগরতালাদা লৈরি। অইবী অসিগী ‘মহুম লৈত্রবা উচেক্কী ৱারী” হায়না মিংথোনবা অহানবা শৈরেংগী লাইরিক অসি ২০১১দা ফোংখি। সাহিত্য একাদেমিনা শিনবা শৈরেং শৈদিন্নবা থৌরমশিংদা মহাক্কি শৈরেংশিং খুদোল তমখিবা লৈরে। মহাক মনিপুরী সাহিত্য পরিষদ ত্রিপুরাগী একজিক্যুটিব মেম্বর ওইদুনা সাহিত্যগী থবক থৌরম কয়াদা থৱায় য়াওনা হোৎনরিবী অইবী অমনি।

ইশাগী শক্তম ঙাকনা হিংবা হায়বসি ফুরুপ অচৌবা খঙদে মচা খঙদে পুম্নমকনা পাম্নৈ। শক্তম ঙাকনা হিংনরি। তুংওইনবা খক য়াদে। কনাগুম্বনা হায়রিবা অসি হেক থৌওইদবা মতমদা মহাক অদু মপা মপু খঙদবা হৌরকফম খঙদবা ওইনা লৌনৈ। মীওইবা খুনাই মরক্তা মহাক অদুগী ফিদা থোইনা লৈতে। মোদর্নিতিসু খরা লৌশিন্দবা য়াদে অদুগা ত্রেদিসন হায়বসিসু লোয়না হেক্তা হুন্দোকলম্বা য়াদে। অনীমক হৈনা শিংনা লৌশিন্দুনা চাওখৎ লম্বেলদা চৎলবদি চাওখৎপা খুনাই হায়বদু ওই। ফুরুপ খরদি ৱেস্তর্ন লাইফস্তাইলদা হেন্না লুপশিন্দুনা মসিনা চাওখৎপনি খন্দুনা হিংবদা মপা মপুবু তুংওইনরমদুনা মখোয়গী অশেংবা শক্তম করিনো থিরকপদা অৱাবা ওইদবসু য়াওদবা নত্তে। মনিপুরী খোরিলোলদসু হৌজীক অনৌবা মীরোলশিংনা ইনরক্লিবা শৈরেংদা ৱারীমচাদা মশাগী আইদেন্তিগী, কলচরগী, পুৱারীগী মশক কঞ্জনিংবা খুৎফোংদোকশিং মরাং কায়না থেংনরক্লি। মসিমক ঙসিগী মীরোলগী পুকনিং ইহুলদুনি। অইবী কোঞ্জেংবম সরিতাদসু মসিমক ফাওরমগনি হায়না খল্লি।  

অৱাবগী মরুপ্তি কনাসু ওইনিংলম্লোই। পুম্নমকনা পাম্লিবসু নুংঙাইবনি। অদুবু লোয়বা নাই। নুংঙাইবগী মিকুপ্তি অসুক্কি মতিক তেল্লি অদুনবু হায়নৈ পূন্সি হায়বসিদি অৱাবা শংবাইনি নুংঙাইবনা লৈতং অমনি। অৱাবগী তায়নফমদি ৱারী ওইনা লিথোকপনি, ইশৈ ওইনা শকতোকপনি করিগুম্বদা শৈরেং ওইনা ইদুনা তেংথাবনি। মসি নত্রবদি ৱামৈগুম্না চাকতুনা পুন্সি লাইমন ওইবনা কোংগাইনি। পুন্সিবু মচু লোকলীবসিদি অৱাবননি। মহাক্তি খাম্বী মৈরিগুম্বনি। অদুনা অইবী সরিতাসু শৈরেংগি অরোইবা পরেংদা ফংলিবা মহাউ অদু ফংগনি খন্না পুন্সি ইপাক্তা ইহোন্দুনা নুমিৎনা য়াচংবদা সনামচুগী মশেক মঙাল য়ৈবদা পুম্নমক সনা ওনবগুম উরিবা মতম অদু ঙাইনা হিংনিংলি ইরদুনা লেপ্তনা পুন্সি শৈরেং। অসিদা পুকনিং থম্মোয়না অমত্তা ওইনা ইরুপ্তুনা চংশিনগে হায়না খল্লি। অদুননি হায়রক্লিবা মহাকনা শৈরেংগী অরোইবা  পরেং হায়না মিংথোনবা শৈরেংসিদা, “নুংগী মৈচাক, থৱায়গী তেংথাখোল/ য়ৈরী খোন্থাং থম্মোয়য়োন্দা/ শৈরেংগী অরোইবা পরেংগী/ লোইনাইদ্রবা ময়ায়গুম!/ তাথরকপা নুমীৎকী/ ঙাঙ্রান্ন মশেকনা য়ৈবদা/ তাম্না হোল্লিবা হিনাউদুনা/ সনাগী হিনাউ ওনখিবগুম/ হে! মৃত্যু,/ লোমজগে ঐসু মপোকসে/ নঙগী নথ’নুংদুদা/ শৈরেংগী অরোইবা পরেংগী/ লোইনাইদ্রবা ময়ায়গুম!” (লাঃ ১৩)  

মীতৈশিংগী শক্তম, ইনাৎকি অমসুং লাইনিং লম্বীগী অশেংবা মশক অমা উগে হায়রবদি ঐখোয়গী লাই হরাওবা অসিদা পুম্নমক উবা ফংগনি। মসিদা য়াওরি মীহৌরোলগী ৱারী, লৈশেল নোংশেম্বগী, খুন্থোকলোনগী, খুনাইলোনগী। মসিদা অমুকসু য়াওরি অকন-অথৌগী থৌনা লিংজেলগী মশক অমা। মসিদা য়ুম্ফম ওইদুনা মীতৈশিংগী খুনাই ৱারী লাক্লিবনি। মসিনা পরম কায়দনা চত্থরিবমখৈ ঐখোয়গী ফুরুপ অসি হিংদুনা লৈখিগনি। অদুবু করিগুম্বদা  হৈমন শিংমন্দুনা মসিগী পারম কায়রকপা থোক্লবদি পুম্নমক্কি অমাংবা ওইগনি খল্লি। মনিপুরগী মপান্দা খুন্দাদুনা চাদা নাওদা শন্দোক্তুনা হিংলিবা মীতৈশিংনা ইপু ইবেন্না নিংলম্বা, লাৎলম্বা খোইয়ূম লাইশিংগী খূভম ঙসিসু লেংদনা কায়দনা অদুমক কুমওণ খুদিং থৌরম পাংথোকপা থেংনৈ। ত্রিপুরাদসু অসিগুম্বা লাই হরাওবগী থৌরম অসিমক পাংথোক্লি। মসিমক নুংশিবগী মশকনি। কায়ফদ্রবা লিক্লমনি। অইবী সরিতাসু অসিগুম্বা লাই হরাওবগী লাইরোই নুমিৎ অমদা লাইগী থৌরম য়াওরুবদা মপুকনিংদা ফাওরকপা থিংঙমদ্রবা মপু মবেল নুংশিবগী ঈহূল অদু অমত্তা খাক্তনা শৈথারকপদুনি মহাক্কী  অরোইবা অহিং হায়না মিংথোনবা শৈরেংসিদা ফোংদোক্লিবসি।

“লমদেন লাইরেম্বী ঈরাৎপগী/ ঙসি লাইরোই নুমীৎনি/ হরাওবগী অরোইবা অহিংনি, /য়েংঙুনে ফাওদোরক্লে থাবল/ উনিংথৌ পাম্বীগী অকংবা/ উনারক্তগী কুফেৎ কাফেৎ কুফেৎ কাফেৎ/ চহী ১১ মতুংদনি/ কুমসি লাইবাউ তারীবসি;/ নোংলৈনা ময়ূম হুমদোকখ্রবা/ পীতৎ-পাতৎলবা চেক্লাচাগুম/ মীরমসিদা চনীংতারক্তবা/ ইশানা ইশাবু খঙদনা/ লমজা-শরাগুম হিংলক্লি।/ মীরমদা  তুশোন মানশোন্নদুনা হিংলিবা পুন্সিশিংদা অসিগুম্বা লাই হরাওবগী থৌরমসিনা নৌহৌনা থৌনা পীরি। লীংজেল হাপ্লি। হেন্না পাঙ্গল কলহল্লি। ইপু ইবেন্না চৎলম্বা লিক্লমদা মখোয়সু কায়দনা চৎলি। লাইরোই নুমিৎতা মীকোন থাগোনবা য়াওদুনা অহিং য়ারেক্তুনা লাইগী থৌরম য়াওবনা পুম্নমক য়াইফগনি হায়না চেৎনা থাজবসু থম্লি অদুনা হায়রক্লি, “…  ঙসিদি ঐখোয়গী শুমাঙ/ পুকনিংসু হকচাংসু/ তাইরেন পূম্ফাইনা শেংদোকখরে,/মিপাইনীংঙাই করি লৈরি! ঙসি অহিং য়ারেক্তবা য়াদে/ ঙসি লাইরোই নুমীৎনি/ হরাওবগী অরোইবা অহিংনি” (লাঃ ২৬)  

মলেমগী চাওখৎলবা লৈবাকশিংগী নাগরিকশিংনা মশাগী মমালোল ঙাংলগা চাওথোকচৈ। মমালোলদা মহৈ মশিন লাইরিক লাইশু তাকপি তম্বীরি। মসিদা মখোয়দা নুংঙাইজৈ অহেনবা পুকনিং লৌশিং ওইবা য়াবা খঙজিন্নবা হোৎনৈ। মখোয়গী পুৱারীবু কাওবা লৈতে। মীতৌ তম্লগা চাওখৎকনি হায়বা ৱাখল্লোন অদুদগী লাপ্না লৈনবা হোৎনৈ। অদুবু ইরমদম মনিপুরদদি চাওখৎপা হায়বসিগী ৱাহন্থোক অসিমক ওণ্ণ-তৈনরি। মীরোলদা লাইরিক তম্বদুনা মীরোল ঙাংবা হৈরগা লাইরিক হৈবনি হায়বা অরানবা ৱাখল্লোন অমদা চৎখিবগুম তৌরি। মসিমক মনিপুর মপান্দা লৈরিবা ইচিল ইনাওশিংনদি ইমালোলগী মরু ওইবসি উই অমসুং খঙই।  মখোয়না ইরমদম মনিপুরদা লাক্লগা ইমালোল পেণ্ণা ঙাংজরগা মিৎলু ইরা ইহৌনা নুংশিনা ৱারী তৌগনি। করম্নদি নুংশিজদবা ঙমগনি পলেম্না নুংশিনা তম্বীবা ইমালোল। অদুনা নুংশিনা শৈথারকই অইবী সরিতানসু, নুংশিবী মৈতৈলোল “মপোক লীশিং কয়াগী/ নীংজরকপা খৌরাংজরকপনা/ থেংনজরে ঙসিদি তুরেল অমা/ ঐগী ইমালোলগী তুরেল!/তন্দনগী খুঞ্জাও অমদা/ ঙাল্লে খল্লুরবা ঐগী পুন্সি/ ঐগী পুন্সি হিনাউনা/ তাউথজরে ঙসিদি ইনীং তম্না নোক-খেনা/ ইমালোলগী ঈচেলদা।” (লাঃ ৪১) মসিদসু নত্তনা অমুক্কসু শৈথাজদবা ঙমদে ইমালোলবু লাইনিং ওইজদুনা মহাক্কি মরমদা অদুননি শৈরেংগী পরেংশিংদা ইদবা ঙমদনা ইরক্লিবা নীংজবা পন্থুংফম হায়না মিংথোনদুনা “থম্মোয়গী লমতুপ খুদিংদা/ ইমাগী মিনুংশি ফংজবনা/ ইমালোলগী ফজবনা কেজবনা/ ঐগী মীনোক পূম্বা অর্থ চেল্লি/ পলেমগী খূয়াতবু শোকচরি পূকনিংনা।/ মীরোলগী লাইশোনসু তারী/ লাই য়াহৌবগী পেনাগী সুরগুম্না/ চীনবালদদা নত্তে ঐগী ইমালোল/ ঐগী ইমাগী মতম্বাক/ নমোম্না তাঞ্জবা পন্থুংনি/ (লাঃ ৩৯) 

পুৱারীগী তাংকক অমদা অদুঙৈ চহী তরেং খুন্তাকপগী মতমদুদা পুন্সি চেংজেল নম্বো পোদুনা খুন হোংখিবা মীতৈশিংনা মীরমদা থৌনা ফনা হিংদুনা লাকখি অৱা অনা কোংগাই ময়োকনদুনা। অসিগুম্বা থৌদোক অমদা তখেলদা খুন্দাখিবা মীতৈশিং ঙসিসু চাদা নাওদা চারোল শুরোল কয়া হিংলি। তৌইগুম্বসু মীশিং য়ামদবা অমসুং অচৌবা ফূরুপশিংগী মরক্তা ইশাগী শক্তম ঙাকনা হিংবা হায়বসি তরাইবা থবক অমদি নত্তে। অচৌবা ঈপাক্তা অপিকপা তুরেলগী ইচেলনা ইতিনখিবদা তুরেলগী ৱারীদি করিগুম্বদা নিংশিংবা থোকখিদবসু য়াওদবা নত্তে। থম্মোয়নদি করম্না নুংঙাইগনি, পুকনিংনদি করম হায়না য়ানিংগনি ইমালোলদা নুংশিনা কৌরম্বা মিংথোলশিংনা মীগী মরোলদা তপ্না তপ্না ওন্থোকখিবা হায়বসি। ফনা য়াম্না হোৎনদুনা অথিংবা থম্নিংলবসু চেন্থরক্লিবা অওনবা অসিদা কবি সরিতাসু নুংঙাইতবা অমদি ফাওরি তখেলগী ৱারী হেক হেক নিংশিংলুবদা অদুনা থম্মোয় হিকনা পাওমেল্লক্লি, “ইমালোলগী  মিংথোলশিং/ তপ্না তপ্না খজিক খজিক/ মুত্থরকই শিথরকই/ মীরোলগী লোলনা থোনখি/ লৈকাইগী অনৌবা মিংথোলশিং/ খুনৌ, উনুং, লৈরাংকাবী/ ষণশেন লৈকাই, পুখ্রী লৈকাই/ মমিং কয়া অসুম্মক মাঙখি/ চহী চাম্মগী পুৱারী/ ঙরাংগী ঊফুলনা কূপশিনখি।” (লাঃ ৪৫)  

মিৎনা উনা উনা খঙনা খঙনা ঙসিদি চাওরবা ৱাংলবা চীংমায় কয়া চাওখৎপগী মিংদা ঙম্নমক মরু কোকখ্রে। চম্না হিংজরম্বা চীংমীশিং, খুল মচা মচা কয়া শেঞ্জাও পায়বশিং মখোয়গী খূবামনুংদা থমজিনখ্রে। তলা নচুম্বা উপাল উরেল অচৌবা কয়া মরু মরা ফুক্তুনা মাংহল্লক্লি। ইংনা চিকনা লৈরম্বা চীংনুংগী খূলশিংগী ৱারী নিংশিংবতা ঙাইশিল্লক্লি। মসিদা করম্না মিপাইদবা ঙমগনি কবি সরিতাসু। অদুনা চীংলৈমা ইমাবু কৌদুনা তেংথারক্লিবনি পেন্দবা নুংঙাইতবা অমগা লোয়ননা হায়রক্লি মহাক্কি শৈরেং, নোংশা অমোম ওল্লসি হায়বসিদা “মখোয়না শম্বলদু থুদেকপিখ্রে/ মখোয়না খাঙপোকশিংদু মৈ থাখ্রে/ লৈরঙগী য়ুমশিংবুসু য়োৎশীনবিখ্রে মখয়াত্তা/ অদুগা,/ ঐখোয়দি কেকু লোৎপী শান্নরি।/ তুঙ্গোল থনবা লেম্লৈশিং/ সনা মচুগী ফৌরেলশিং/ ওনখ্রে ঙম্না চীনবুং ৱারী,…” (লাঃ ৪৯)  

সরিতাগী শৈরেংশিংদা ইমালোল নুংশিবগী অমসুং ইনাৎপু য়োকখৎনিংবা অমসুং হিংহন্নিংবগী মমি চাওনা তারি। মহৌশাগী কায়থরক্লিবা শক্তমসু কঞ্জনিংলি। শৈরেং অয়াম্বা য়াম্না শাংদবা অদুগা তেন্তকনা হায়নিংলিবা ফোংদোকনিংলিবদু ময়েক শেংনা ফোংদোকপা থেংনৈ। শৈরেং পুন্না ২৫সিমক মীতৈ ময়েক্তসু হাপতুনা হৌজীক্কী মীরোলনা পাবদসু খুদোংচানবা হাপ্লি। পুকনিং থৌগৎনিংঙাইনি। মতুংদসু শৈরেং লাইরিক লেপ্তনা ফোংলকখিগনি হায়না থাজবা থমজরি।