নুপীশিং থৌনা লৈনা ইশাগী পান্দম অমগী মখাদা হিংনবা হোৎনগদবনিঃ ক্ষেত্রিময়ূম সুবদনী
ইম্ফাল, সেপ্তেম্বর ১৪ : লমদম অসিগী নুপী ওইবীশিং পাঙ্গল শোল্লে হায়দুনা ৱাখল শোন্থনা লৈবগী মতম নত্তে, থৌনা লৈনা ইশাগী পান্দম অমগী মখাদা হিংনবা হোৎনগদবনি। মপুরোইবনা মীরাইবনী নুপীশিংনা মপুরোইবগী মখোঙ কোল্লগা খাংগদবনি হায়বা ৱাখল্লোন অসিসু থাদোক্কদবনি হায়না শক্নাইরবা অইবী ক্ষেত্রিময়ূম সুবদনীনা ফোঙদোকখ্রে।
ক্ষেত্রিময়ূম সুবদনীনা ইবগী লমদা খোঙদারকপা চহী ৫০ শুরকপা গোল্ডন জুবিলি থৌরম হৌদোকপগা লোয়ননা ‘ক্ষেত্রিময়ুম সুবদনীগী পুন্সি অমসুং মহাক্না সাহিত্যগী লমদা লৌরিবা থৌদাং’ হায়বসিদা পাঙথোকপা সেমিনার অমদা মহাক্না ৱাফম অসি ফোঙদোকখিবনি।
ক্ষেত্রিময়ূম য়াইমা মেমোরিয়েল ত্রাস্ট, ক্বাকৈথেল মোইরাং লৈকায়না শীন্দুনা ক্বাকৈথেলদা লৈবা দোসুয়ালি হোলদা থা মরি চুপ্না চৎথগদবা থৌরম অদুদা অইবী সুবদনীনিা হায়খি, মহাক্কী অহানবা ‘মাঙখ্রবা ঈশৈগী সুর’ হায়বা শৈরেং লাইরিক অসি ১৯৭৫ গী সেপ্তেম্বর থাদা ফোঙখি। মসিনা মণিপুরী নুপী অইবীশিংগী মনুঙদা ফোঙবা অনীশুবা শৈরেং লাইরিক ওইরি। ঙসিদি মহাক ইবগী লমদা খোঙদারকপা চহী ৫০ শুরক্লে ঙসি ফাওবদা মহাক্না তোঙান তোঙানবা লাইরিক ১৫ ইদুনা ফোঙখ্রে। মখা তানা লাইরিক কয়া অমা ফোঙনবা থৌরাং তৌরি।
মহাক্কী তোঙান তোঙানবা লাইরিকশিংগী মরমদা, লমদম অসিগী স্কোলার, অইবী-অইবা পূন্না ৭০ রোম্না ইরকপা ৱারেংশিংগী খোমজিনবা অচৌবা লাইরিক অমসু ফোঙনবা থৌরাং তৌরি হায়না অইবী সুবদনীনা ফোঙদোকখি।
থৌরমগী শরুক অমা ওইনা লমদম অসিগী শক্নাইরবা অইবী ঙাংবম ইবেতোম্বী দেবী, ইরুংবম বসন্ত সিংহ অমসুং ইন্তরনেসনেল ফিল্ম ফেস্তিবেল কয়াদা শরুক য়ারুবগা লোয়ননা তোঙান তোঙানবা এৱার্দ কয়া ফংলকখ্রবা মণিপুরী ফিচর ফিলম য়াহৌথেংবা খোইমুগী প্রদুস্যর অমসুং স্তোরি রাইতর দাঃ আর কে নয়নস্না দেবী অমদি ফিল্ম অসিগী দিরেক্তর রাকেশ নাওরেমবু ওক্তুনা ইকায়খুম্নখি।
থৌরম অদুদা মণিপুরী সাহিত্য পরিষদ, ইম্ফালগী প্রেসিদেন্ত লোংজম জয়চন্দ্র সিংহনা চীফ গেস্ত, এগ্রিকলচার দিপার্তমেন্তকী হান্নগী দিরেক্তর দাঃ আর কে নয়নস্না দেবীনা প্রেসিদেন্ত অমসুং মণিপুরী লেংগ্বেজ এদভাইজরি বোর্দ, সাহিত্য একাদেমি, নিউ দিল্লীগী হান্নগী কনভেনর নোংমাইথেম কিরনকুমারনা গেস্ত ওব ওনর ওইনা শরুক য়াখি।
সোর্স: পোক্নফম
0 কমেন্ট:
কমেন্ট তৌবিয়ু