মণিপুরী লিতরেরি এন্দ কলচরেল ফোরম ত্রিপুরানা শক্নাইরবশিং অমসুং মহৈরোয় কয়াদা মনা লান্থোকখ্রে
ইম্ফাল, সেপ্তেম্বর ১৫ : তখেল (ত্রিপুরা) দা মণিপুরী লোন, সাহিত্য অমসুং কলা সংস্কৃতি চাওখৎ হন্নবা হোৎনবদা অচৌবা থৌদাং লৌদুনা লক্লিবা মণিপুরী লিতরেরি এন্দ কলচরেল ফোরাম ত্রিপুরাদা তখেল লমদমদা তোঙান তোঙানবা হীরম কয়াদা থৌদাং চাউনা লৌরিবা মী কয়া অমদি মীথোই মীহেল্লবা মহৈরোয়শিং দা চহী খুদিংগী লেপ্তনা পীদুনা লাকপা মনাশিং চহী অসিগী ওইনা ঙরাং লান্থোকখ্রে।
মণিপুরী লিতরেরি এন্দ কলচরেল ফোরাম, ত্রিপুরানা তখেল লৈমা তেঙবাং লূপ ত্রিপুরাগা খুৎশম্নরগা মনা লান্থোকপগী থৌরম অমা ঙসি ত্রিপুরাগী রানির বাজার তোরৌ মান্দপতা পাঙথোকখ্রে। থৌরম অদুদা অমোন বার্তাগী এদিতর ঐচ অমিয়ো সিংহনা চীফ গেস্ত, মণিপুরী লিতরেরি এন্দ কলচরেল বিরো সিংহনা প্রেসিদেন্ত, এন আই তি আগর্তলাগী এসিস্তেন্ত প্রোফেসার দাঃ নোংমাইথেম অনুরাধা দেবীনা গেস্ত ওব ওনর ওইখি।
ঙসিগী থৌরম অদুদা সমাজ সেবাগী লমদা পীবা মনা ‘তখেল রত্না এৱার্দ’ চহী অসিগী ওইনা শক্নাইরবা সোসিএল এক্তিভিস্ত অইবা অমদি ত্রিপুরাদা ফোঙবা অমত্তা ঙাইরবা মণিপুরী চয়োল পাউচে মরুপকী হান্নগী এদিতর ময়েংবম নিলমণিদা লান্থোকখ্রে। লেমজনিঙাই ওইরবা মনা অসিদা শক্তাক-চে, সাল, মমেন্তো, কোকয়েৎ অমদি শেলসু য়াওরি।
সাহিত্যগী লমদা পীবা লমজনিঙাই ওইরবা এম এল সি এফ লাইফতাইম এচিবমেন্ত এৱার্দ অৱাং ত্রিপুরাগী জলবশাদগী শক্নাইরবা অইবা অহৈবম রবিন্দ্র কুমার সিংহদা লান্থোকখি। মনা অসিদা শক্তাক-চে, মমেন্তো, কোকয়েৎ অমসুং কেশ প্রাইজ য়াওরি।
থাঙ-তা, সাহিত্য, খুৎশাগী মশিন, শান্ন-খোৎনবা অমদি পূং-ঈশৈগী লমদা নৌনা মচিনা তুমখৎলক্লিবা নহাশিংদা পীবা মনা ‘খোইস্নাম ভঙ্গবীর মেমোরিএল য়ং তেলেন্ত এৱার্দ’ ধর্মনগরদগী থাঙ-তা শান্নরোয় রাজকুমার তপস্যাজিৎ সিংহদা পীখ্রে। মনা অসিদা শক্তাক-চে, মেমেন্তো, লেংয়ান অমদি শেল য়াওরি।
ত্রিপুরা বোর্দনা লৌবা চহী অসিগী সেকেন্দরি অমদি হায়র সেকেন্দরি একজামিনেসনদা ত্রিপুরা স্তেতকী ওইনা মার্ক ৱাংনা ফংদুনা মায় পাক্লক্লবা ত্রিপুরাগী মণিপুরী মহৈরোয় অনীদা পীবা ‘খাইদেম নিঙোল সগোলশেম ওংবী অচৌবী নীংশিং মনা’না চহী অসিগী ওইনা তি বি এস ইনা লৌবা মাধ্যমিক পরিক্ষা ২০২৫ দা ৮ শুবা পোজিসনদা মায় পাক্লক্লবী ত্রিপুরাগী মৈতৈ নুপীমচা পি এম শ্রী ভাইদরদিঘি হায়র সেকেন্দরি স্কুল, বিশালগ্রাগী মহৈরোয় লাঙ্গোঞ্জম বিথি সিংহ অমসুং হায়র সেকেন্দরি একজামিনেসনগী ওইনা তালতলা সেকেন্দরি স্কুল বামুতিয়াগী মহৈরোয় তোকশুবম সুমনা দত্তদা পীদুনা পূক্নিং থৌগৎখি। হায়রিবা মনা অসি ত্রিপুরাগী মণিপুরী মহৈরোয়শিংবু পূক্নিং থৌগৎপা ওইনা মণিপুরগী শক্নাইরবী দাঃ রাজকুমারী মুসুকসনানা কৎপনি।
চাদা ৬০ দগী তাদনা ফংলক্লবা জিরানিয়া সবা দিবিজনগী মণিপুরী মহৈরোয়শিংদা পীবা মনা ‘বিবি খোইস্নাম মেমেরিএল কেশ এৱার্দ’ লমদম অসিগী মহৈরোয় ৬ তা পীখি হায়রি।
ত্রিপুরা লৈঙাক্কী মখাদা লৈবা দ্রগস কন্ত্রোল ওর্গানাইজেসনগী দিপুতি দ্রগ কন্ত্রোলর কাঞ্চন সিংহ, কে ১ এমচুয়র কিক বোক্সিং দা নেসনেল চেম্পিয়ন ওইরক্লবা এন মনিশ অমসুং নেরিস্ত এন্ত্রান্স একজামিনেসনদা মকোক ওইরক্লবা থাংজম নেশমিকাবুসু থোইদোক হেন্দোকপা ওইনা ইকায়খুম্নখি। মন্থলি স্কোলরশিপ ফংলগদবা মহৈরোয় খরগী মমিংসু লাউথোকখি হায়না মণিপুরী লিতরেরি এন্দ কলচরেল ফোরম ত্রিপুরাগী জেনারেল সেক্রেতরি খোইস্নাম মঙ্গোলনা ফোঙদোরক্লি।
সোর্স: পোক্নফম
0 কমেন্ট:
কমেন্ট তৌবিয়ু