থোক্লিবা ঈরাংসিদগী ৱাখলনা শাগৎপা ৱারী মচাশিংগী লাইরিক ‘ইন দি লেপ ওব কৌব্রু’ ফোঙখ্রে
ইম্ফাল, সেপ্তেম্বর ২৮ :হৌখিবা ইং ২০২৩ গী মে ৩দগী লমদম অসিদা থোক্লকখিবা মৈতৈ অমসুং কুকি ফুরুপ অনীগী ঈরাং অসিদা য়ূম্ফম ওইরগা ৱারী মচাশিং অপূনবা লাইরিক ‘ইন দি লেপ ওব কৌব্রু’ হায়বা নাওরেম মোহেননা ইবা লাইরিক অমা ঙসি ফোঙদোকখ্রে।
য়াই পাব্লিকেসন্সনা পুথোকপা ‘ইন দি লেপ ওব কৌব্রু’ হায়রিবা ৱারী মচাশিংগী পুনশিনবা লাইরিক অদু ফোঙবগী থৌরম অমা ঙসি নুংথিল সগোলবন্দ লুক্রাম লৈরক মচীন্দা লৈবা নাকামা রেস্তুরেন্ততা পাঙথোকখি।
থৌরম অদুদা হায় কোর্ত বার এসোসিএসনগী সেক্রেতরিসু ওইরিবী এল এম এস লো কলেজগী এসিস্তেন্ত প্রোফেসার এদভোকেত পুশপা গুরুময়ুমনা চীফ গেস্ত, জি পি উইমেন্স কলেজগী এসোসিয়েত প্রোফেসার দাঃ অচোম রোশন কুমারনা প্রেসিদেন্ত, হিস্ত্রিগী রিসার্ছ স্কোলরসু ওইরিবা হিস্ত্রিগী লাইরিকশিং ইবা, লোংজম মুনিন্দ্রোন গেস্ত ওব ওনরশিং ওইনা শরুক য়াখি। ঙসি ফোঙখিবা লাইরিক ‘ইন দি লেপ ওব কৌব্রু’গী মতাঙদা দিপার্তমেন্ত ওব পোলিতিকেল সাইন্সকী এসোসিএত প্রোফেসার দাঃ অরাম্বম নোনিনা ৱা ঙাঙখি।
লাইরিক অসিগী অইবা নাওরেম মোহেননা হায়, ঙসি মহাক্না ইরিবা ‘ইন দি লেপ ওব কৌব্রু’ হায়রিবা লাইরিক অসিদা তোঙান-তোঙানবা ৱারী মচা ১১ য়াওরি। হায়রিবা ৱারীশিং অসি হৌজিক লমদম অসিদা থোক্লিবা কাঙলুপকী ঈরাং অসিদা ময়ূম –মকৈ থাদোক্তুনা লাঞ্জেন্নরগা লৈরিবশিং, মণিপুর ইমাবু কন্নবা হোৎনবদা থৱায়না পোন্থা পীখ্রবা নহা কয়া অমদি লমদম অসিদা ইচম চম্না মহৈ মশিং তমদুনা অমদি মশাগী শিনফমশিং পায়রগা লৈজরম্বা লাঞ্জদ্রবা কয়ানা মমা লৈবাকপু কন্দবা য়াদে হায়দুনা থোক্লকখিবা কয়া অসিনা ঈনোৎ পীরগা ৱাখলনা শাগৎপা অদুগুম্বা ৱারী মচা ঙাক্তনি।
লাইরিক অসি পুথোক্লিবা অসিগী মপূং ওইবা ৱাখল্লোন্দি লমদম অসিদা লৈমিন্নরিবা ফুরুপশিং মহৌশাগুম নুংশি-চান্নবা অমুক হঞ্জিল্লক্তুনা হান্নগী মণিপুর হায়বা অদুদা লাকহন্নিংবগী ৱাখল্লোন অদুদা চঙশিনবা খোঙথাং অমনি হায়নসু নাওরেম মোহেননা ফোঙদোকখি।
সোর্স: পোক্নফম
0 কমেন্ট:
কমেন্ট তৌবিয়ু