• 35
• ১লা ডিসেম্বর ২০২৫ ইং
• Share on:

খোর্জৈগী মতেংনা মীওইবা খুনাইবু অচুম্বা লম্বেলদা পুনিংলিবা কবি এন রঞ্জিতাগী শৈরেং লাইরিক ‘মঙালগী লম্বী’- লাইরিক অসিগী মপাউ --তোংব্রম অমরজিৎ

শৈরেং লাইরিক অসি য়াম্না ভোল্যুম থাবা অমদি শৈরেং ময়াম য়াওবা মখলগী খোমজিনবা শৈরেং লাইরিক্কী কাংলুপ্তা চন্দ্রগসু ফজবা এপিল্লিং ওইবা শৈরেংশিংদি য়াওরি। পুন্না শৈরেং তরামঙাতনি য়াওরিবসি। অদুগা শৈরেং অমমম খুদিংগী হেক ময়োকনবা লমায় খুদিং ফজরবা আর্ট অমদি স্কেটচিং অমমমদি হাপ্লি। পোইত্রি অমদি পেন্তিং পুন্না উবা ফংই। করিগুম্বা খরদি ফোংদোক্লি।  

লাইরিক্কী মমিং- মঙালগী লম্বী (২০২২)
অইবী- এন রঞ্জিতা
অফোঙবা- ত্রিস্টুপ বুক্স, দুর্গপুর, ৱেস্ট বেঙ্গল
লাইরিক্কী মখল- শৈরেং
লাইরিক্কী মখুম- মার্গরেট মেকদোনাল্ড
লাইরিক্কী মমল- লুপা ৯৯/-
লাইরিক্কী লমায় মশিং- ৩৫

এন রঞ্জিতা ১৯৬৫ ইংদা বামুটিয়া, আগরতলা, ত্রিপুরাদা তাইবঙ খোঙদারকখি। বর্ধমান য়ুনিভর্সিতিদগী গ্রেজ্যুএট লোয়শিনখি। লোন হন্দোকপা অইবী অমা ওইনা অনৌবা মনিপুরী শৈরেংশিং বেঙ্গলীদা হন্দোকই। সাহিত্য একাদেমিগী ত্রান্সলেসনগী থবক খরসু হৌজীক হৌজীক মায়পুনরি। কবি অমসুং ত্রান্সলেটর ওইরিবী অইবী রঞ্জিতা হৌজীকনা পশ্চিমবঙ্গলগী দুর্গাপুরদা ময়ুম লিংদুনা মচাশিংগা লোয়ননা লৈরি। 

এন রঞ্জিতাগী শৈরেং লাইরিক ‘মঙালগী লম্বেল’ মিংথোনবা লাইরিক অসি মনিপুরগী শকনাইরবা কবি রঘু লৈশাংথেমগী মফমদা নুংশিনা কচ্চবা লাইরিকনি হায়না অইবীনা লাইরিক অসিগী দেদিকেসনগী লমায়দা ইরম্বা থেংনৈ। মসিমক নুংশিনিঙাইনি। ত্রিপুরাদা পোকচবী মৈতৈ নিংঙোল অমনা মনিপুরগী অইবা কবি মবুং শকলবা লাইরম্লেন্দা তিনখ্রবা কবি অমদা কচ্চবা অসিমক ইমোসন্না পিক থল্লি। শৈরেং লাইরিক অসি য়াম্না ভোল্যুম থাবা অমদি শৈরেং ময়াম য়াওবা মখলগী খোমজিনবা শৈরেং লাইরিক্কী কাংলুপ্তা চন্দ্রগসু ফজবা এপিল্লিং ওইবা শৈরেংশিংদি য়াওরি। পুন্না শৈরেং তরামঙাতনি য়াওরিবসি। অদুগা শৈরেং অমমম খুদিংগী হেক ময়োকনবা লমায় খুদিং ফজরবা আর্ট অমদি স্কেটচিং অমমমদি হাপ্লি। পোইত্রি অমদি পেন্তিং পুন্না উবা ফংই। করিগুম্বা খরদি ফোংদোক্লি। অইবীনা মণিপুরী খোরিলোলবু বেঙ্গলী ঙাংনরিবা মীয়ামদা মশক তাক্লি মহাক্কী ত্রান্সলেসনগী খুদোল কয়াদা। ২০১৮দা পুথোকখি ‘আধুনিক মণিপুরি কবিতা’ চহী অসিমক্তদা শকনাইরবা থিএটর পর্সনেল্লিতি ওজা রতন থিয়ামগী শৈরেং লাইরিক অমা অমুক ফোঙখি ‘ রতন থিয়ামের কবিতা’। অসুম্না চংশিল্লকলিবা মহাক্কী ত্রান্সলেসনগী মিসন অসিদা অমুক লমদম অসিগী শকনাইরবী ওজা অরাম্বম ওংবী মেমচৌবীগী শৈরেংশিংগী লাইরিক ‘মেমচৌবী শ্রেষ্ঠা কবিটা’ (২০১৯) ফোংখি। মসিগী মতুংদা অইবা অমদি ত্রাভেল রাইটর কবি শরতচান্দগী অমুক পুথোক্লকখি ‘ শরতচান্দ থিয়াম নির্বাচিত কবিতা’ (২০১৯) মসিগী মতুংদা অমুক ‘স্বর অষ্ঠক’ (২০২০)। রঞ্জিতাগী ত্রান্সলেসনগী খোঙচৎ অমদি মহাক্কী থৌনা অসিদা মনিপুরদা লৈরিবা ঐখোয় খুদিংনা পুকনিং থৌগৎনরি। মখা তানা মহাকনা মনিপুরী খোরিলোলবু য়ামখ্রবা বেঙ্গলী রিদরশিংদা মশক তাকপসু ঙম্ব ওইসনু। 

লাইরিক অসিগী হেক অহানবা শৈরেংনি ‘নীংতম্বা’। শৈরেং অসিনা মনিপুরগী হৌখ্রবা পুৱারী, লমদম অসিগী মরৈবাক নীংবা অথৌবশিং, থৌনা লৈবী মমোমশিং মিৎমাংদা উহল্লকই। ঙসিগী মীরোলনা লৈবাক নীংবা অথৌবশিংগী মফমদা তর্পন কৎলি কুমওন খুদিং অদুবু অশেংবা নীংতম্বদুদি ফংলবরা হায়বসি অইবীগী ৱাহংনি। রঞ্জিতানা ইরক্লি, “ইমাগী তনৌ তনৌবা খূজেংদা/ থাংবিখি মীনাই য়োলহিং/ লোয়লম শন্দোকপা লোয় মপুশিংনা।/ খাঙখি অৱাবা/ নুংসুক নুংজানখি ইমাগী মায়থোঙ।/ য়েংবা ঙমখিদে অথৌবা মপারীশিং/ লীংজেল থোইবী মমোমশিং।/ চোংথোরকখি ইমাগী মুক্তি ওইনবগীদমক/ হৌনরুবা নাইদনা/ জাতি ধর্মগী ৱাখল লৈতনা।/ মতমসিদনি/ ইমাগী মুক্তি ফংজখিবা/ ইখেংলক্তা নিংতম্বগী ফিরাল পায়খিবা…হৌজিক্তি ঐখোয়না/ লৈ খূজোক খূজোক পায়রদুনা/ ফজরবা ফিজেৎ লৈতেংলদুনা/ মখোয়গী মফমদা শ্রধাঞ্জলি কৎলি…অদুবু নীংশিংবা অসিগী মরক্তা/ হৌজিকসু মম্লি/ মীওই কয়াগী চাকশঙদি।” (লাঃ ৯) শৈরেং অসিগী নুংগী ৱাহন্থোকতি অরোইবগী ৱাহৈ পরেং অহুমসিদা লৈরে। ঙসি ঙসিমকসু চাকখুম কয়া অমম্বদা হিংলি। মরকসিদা ইন্তরনেল ওইবা কনফ্লিক, কাংলুপ ফুরুপ মশেল মরক্তা মুকনবা, উংখৎনবা অমদি অচৌবা শক্তি লৈবা ফুরুপশিংনা শিংচেপ থাজিনবদি লেপতে। নীংতম্বগী ৱাহন্থোকসি মীচম মীয়াম্না চাকনি ফিনিদুনা হিংবদুরা হায়বসিদা কবিনা ফুংবংনরি নুংঙাইতনা।  

অইবা অইবীশিংগী কলমগী মচিন্না মালেম তাইবঙপাল অসিদা হিংলিবা পুম্নমক্কি অৱা-নুংঙাইগী মিকুপশিং, থৌদোকশিংগী রেকোর্দ তৌরি খোরিলোলদা। অরানববু ফত্তবনি তাক্লি। অচুম্বনা ধর্মনি খঙহল্লি। মহৌশাগী কায়ফদ্রবা লিক্লমদা লাকনবা লমজিংলি লেপ্তনা। লিক্লম কায়থরক্লবা অমদি খোঙচৎ মতম নাইরক্ত্রবা মতমসিদা  অইবী রঞ্জিতানা মহাক্কী শৈরেং ‘কলমগী মচিন’ মিংথোলদুনা ইরক্লিবা শৈরেং অসি নৈননিংঙাইনি। কবিনা ইরক্লি, “অমুবা নোংনা শিন থুংনা শন্দোরক্লে…হায়ফম খঙদবা নোংলৈ অমমমনি।/ পিরি মিংথোল অমমমদি…অকনবা ইরাং মরক্তা/ ঙম্না কাউখরে অঙাং নৱাশিং/ নুংশিরবা ইবেনপোক্কী ফুঙ্গা ৱারী…/ হৌজিক্তি ওল্লক্লে/ লৈরাং চরোংগী মহুত্তা নোংমৈ চরোং…উদে তুংগী শান্তিগী লম্বী/ ওনখ্রবদা নোংমৈ চরোং/ অদুবু/ নোংমৈ মচিন্দগী/ তুম্বদি হেল্লি কলম মচিন্না/ লাকখিনি শান্তি/ পুল্লখিনি অমত্তা ওইনা/ কলমগী মচিন্না অসুম তুম্লিমখৈ।” (লাঃ ১১) কলম পায়রিবশিংদা থৌনা হাপ্লি। তুহৎপীরবশিংদা আশা অমা পীরি। অচুম্বা ৱায়েল ফংখিদ্রবশিংদা হিংনিংবগী ইনোৎ হাপ্লি। মসিনি শৈরেংগী ফজবা। 

মীওইবনা চাওখৎলে খল্লিবা হৌজীক্কি সভ্যতা অসিগী ৱাহন্থোক অসি কুপথনা থিজিল্লুরবদি চাওথরকপগী লম্বেলদা কুমথরক্লবরা হায়বসি অচৌবা ৱাহং ওইরক্লি। মরমদি হৌজিক চাওখৎলবনি হায়দুনা হিংলিবা মীওইবা অয়াম্বা তিঞ্জেন কায়জেনবা, অনাবা কয়ানা নাদুনা হিদাক গুলি নুমিৎ খুদিং চাদ্রবদি হিংবদা লুরবা ফিভম অমা লাক্লি। মেদিকেল সাইন্সনা চাওখৎলকপগী মতুং ইন্না মীওইবনা পুন্সি নুংশাংনা হিংবা ঙম্লে হায়রগসু মহৌশা প্রকৃতিগা লৈনরম্বা মরিদি লাপথোকনরক্লি নোংমা নোংমগী। মসিদা কবি রঞ্জিতা তুমিন্না য়েংদুনা লৈথোকপা ঙমজদে। ঐখোয় মীওইবনা তেনখ্রবা তাইবঙ পুন্সিসিদা হিংলিবসিদা মহৌশা অমদি মালেম অসিগীদমক য়াইফবা থবক খরদি তৌহন্নিংই। মাং তাকনবা হেন্না ফিভম শোকচিন্নবা থবক তৌহঞ্জনিংদে। অদুননি ইরক্লিবা শৈরেং অমা ‘চাওখৎলকপা অমসুং মীওইবা’ মসিদা কবিনা হায়রক্লি, “নিনিগী পুন্সিনি খঙনা খঙনা/ চাওখৎলকপা সভ্যতাসিগীদমক/ নাপল কানা পোংজবা তাইবঙমী/ ঙসিদি তামখ্রে মহৌশাগা সম্নরম্বদগী…মহৌশাগী ওইবা কর্ম তুম্বা চাবা অমতা য়াদে/ খাওদা আচাপোৎ পুদে/ পুই হিদাক-গুলি য়োম্লদুনা/ অসুম অসুম ৱারবা ৱাশিল্লক্লবা মীওইবা/ নুংশিরক্লে মহৌশাবু/ চৎনিংলক্লে মহাক্কী থোৎলবা মায়াগী তম্পাক তম্না/ পামজরে ঈংনা শান্তিদা পেন্না পোত্থাজবা।”  (লাঃ ১৭) ইকোলোজি অমদি এনভাইরোমেণ্ট কন্সিয়স ওইবা শৈরেংনি। মসিগী ৱাখল্লোনসি নিংথিজনা লৈবা মতমদা তাইবঙপাল অসি হিংবদা নুংঙাইনা লৈবা য়াগনি থাজৈ। 

মিংথোল ওইরিবা শৈরেং ‘মঙালগী লম্বী’ অসিমক নুংগী ৱাহন্থোক কয়া ফূমদুনা লৈরি। ঙসিগী খুনাই অসিদা থেংনরিবা খুদোংচাদবা কয়া, অরানববু অচুম্বনি থাজরিবা মীওইশিং, মীনম্বনা লৈঙাক্লিবা লুচিংবশিং, ফিভম শোকচিল্লক্লিবা মীওইবগী লমচৎ শাজৎ, কাংলুপ ফুরুপশিংগী মরক্তা লৈরিবা মুকনবা অমদি য়েংথিনবা অসিনচিংবশিং অসিনা জেনরেল ওইবা থিমদা লৌখৎলগা ধর্ম চেনবা অফবা ৱাখল খনবা অদুগুম্বা তুংগী মীরোল অমা উনিংলি কবিনা। মালেমসিদা থাজনরিবা লাইনিং অমত্তনা অতোপ্পা লাইনিংবু হুলানবা লৈতে। অদুবু মীওইবনা অসিগুম্বা লাইনিংগী পাউতাকপু লান্না ৱাহন্থোক পিদুনা মীওইবা মরক্তা নুংশিনদনবগী মরু হুনবদি লেপ্তে। ধর্মগী লুচিংবশিংনদি নুংশিবগী পাঊজেল পিরম্মি। অদুবু পংলবা তাইবঙনা মসিবু পুকনিং লৈতানা খঞ্জিল্লুদে। ওন্ন-তৈনবা থবকনা মাং-ওইনদুনা থবক তৌই। মসিদগী অফবদি থোয়না লাক্তে। মিৎয়েং শানবা মায়চৌশিংনদি তুংদা লাক্কদবা কয়া উদুনা পাউতাক পাউজেলনা থল্লবা লিক্লম কয়া মচা খায়না তাক্লমমি। অদুবু মসিবু লূনা খন্দুনা অফবা অচুম্বা লম্বীদা চৎপা মীওইগী মশিংদি য়াম্না লিকনা লৈ। অদুনা কবি রঞ্জিতানা নৌহৌননা ‘মঙালগী লম্বী’ ইরকপনি থাজৈ। কবিনা ইরক্লি, “ মায়চৌ কয়া কয়ানা/ লাইনিংহল লিশিং লিশিংনা/ থম্বীরম্মী মঙাল কয়া/ মখোয়না চৎখিবগী পরেং পরেংদুদা।/ মখোয়না চৈ য়ুংলম্মী/ মীৎয়েং শানবা মখোয়গী তুংগী মীরোলগীদমক।/…কঙাওননা চৎলম্লে ঐখোয়দি/ চাওখৎপগী ঈয়াইদা।/ কুপখরে লম্বীসু অকংবা উপালনা/ থনখরে অকংবা ঊনাশিংনা চৎকদবা লম্বীদা।/ মতমগী অকনবা নোংলৈ নুংশিৎ মরক্তা/ ঐখোয় অমুক চৎলসি/ হৌনরুবা নাইদনা মথং মথং/ মঙালগী লম্বীদা কুপশিনখ্রবা/ অকংবা ঊনাশিং শিত্তোকনবা/ খুৎতা সুমজিৎ অমমম পায়রদুনা।” (লাঃ ২১) কবিনা মসিদা পল্লিবা সুমজিৎ অসিমক অমোৎপা অমকপা অমদি ফত্তববু শেংদোকপা ঙম্বা চুম্নগী য়ুমদা শিজিন্নবা সুমজিৎ অদুখক নত্তে মসিদি তাইবঙ থম্মোয়বূ শেংদোকপা ঙম্বা লাইনিংলোনগী ওইবা স্পিরিচ্যুএল ওইবা সুমজিৎ অদুনি। অদুগা অমুক মসি খূনাইবু অচুম্বা অফবা মায়কৈদা পুনিংবা মীওই কাংলুপ অমা ওইরিবা অইবশিংবুসু কোনশিন্দুনা ৱাহন্থোক পীবসু য়াই। মপুংদা কবি রঞ্জিতাগী শৈরেংশিং ফজৈ হায়দবা ঙমদে। ইমোসন য়াওরি। অমদি শিজিন্নরিবা ইমেজরিশিং চংখোল্লি। হেন্না লাইরিকসিবু ফজহল্লিবদি লাইরিক্কী মখুম অমদি মনুংগী লমায়দা য়াওরিবা অভীক সরকার অমদি সঞ্জায় রক্ষিতকি পেন্তিংশিং অসিনসু হেন্না ৱাহন্থোক লৈহল্লি। মনিপুরি খোরিলোলদা লেপ্তনা লাইরিক কয়া খুদোল তম্লকখিগনি হায়না আশা তৌজরি।