কোরৌহনবগী মশেক মঙালদা কালেন আর্ট এগজিবিসন- ২০২২ — আর কে বুধিমন্ত কর্টা
এগজিবিসন হৌদোকপা য়াওগদবা ওজা থিয়াম দেবেন্দ্রাগা পাউ ফাওনৈ। ওজানা এগজিবিসন অসিদা চৎমিন্নগদবা খোঙবু শেম্লে। নুমিৎতুগী থৌরমগী প্রিসাইদ তৌগদবা ওজা য়ুম্নাম নবচন্দ্র, ওজা অরিবম জয়চন্দ্র শর্ম্মসু য়াওনি হায়বীরকই। ঐনা, ফরে ঐসু য়াওহৌগে হায়দুনা ফজরবা খোঙবু অমা শেমদুনা নোং মরক্তা ওজা দেবেননা মথং মথং পিক অপ তৌবীদুনা ইকোন কোন্না ঐবু পিক অপ তৌবা লাকপীখি। নোং খরদি পাথখ্রে। চেবাউদা পুং অমদগী হৌগনি থারগা পুং ১ হেল্লগা লোক্তাক তম্না থৌথরে। চুম্মী ওজা দেবেনগী লোয়নবীনা ওজা দেবেন্না গাড়ী থৌগদবগা ওইবনে, চৎমিন্নগদবা খোঙবুনগা সেনিয়ার সিতিজন ঙাক্তা ওইবদুদা, চৎমিন্নগদবা খোঙবুসু লোইনা অহল ঙাক্তনি হায়হৌই তম্লে। ঐখোয় ময়াম ৱা নোকমিন্নৈ। গাড়ী মনুংদা, মমাঙঙৈদা ইম্ফালদগী মোইরাং য়ৌবদা মিনিট ৪৫ খক্তং চঙলম্মি।
আর কে বুধিমন্ত কর্টা
হৌখিবা মেগী তাং ১৮ ইন্টরনেস্নেল ম্যুজিয়ম দেগা মরী লৈননা থাঙ্গদা লৈবা লোক্তাক ফোকলোর ম্যুজিয়মদা কালেন আর্ট এগজিবিসন য়াওবা ফংজখি। লাইবক ফবা নুমিৎ হায়বদো ওইজখি। তশেংনা নোংদোন অতিয়াদা পাইরিবা লৈচিলগা তোংব্রম অমরজিৎকা ৱারৌনবা লৈখিব্রা খঙদে নৎত্রগা অমরজিৎকী মতৌদু নুংশিদুনা লৈচিলনা ঈশিং চাইবিরগা লকনরিব্রা খঙদ্রে।
মমাংগী অহানবা কালেন আর্ট এগজিবিসনদসু থৌরম হৌরমদাই ফাওবা অদুম নোং হৈথখি। পাখৎনখি, অদুবু থৌরম হৌগৎলকপদা অদুম নোংসু লেপখি। কুমসিসু অদু মঙাই অমরজিৎনা সোসল মেদিয়াদা থা অমা চুপ্না কাউন্ত দাউন তৌদুনা পার্টিসিপেন্ট অমমমবু মখোয় মখোয়না য়েকপা অমদি শাবা লাইগা কোন্ননা শক তাক্লি। নোংসু অদুম চুরি মরিক মরিক, কন্না হৈথরকপসু য়াওই। নোংনা মরম ওইদুনা চত্থোক চৎশিন ওন্থোকনা নুংঙাইতে। লম্বী সোরোক ঈশিং থুমজিনবগী পাউ ঙাক্তনি। করি করম থোক্লগবা অমরজিৎকী কালেন আর্ট এগজিবিসনদো খঞ্জৈ। এগজিবিসন হৌদোকপা য়াওগদবা ওজা থিয়াম দেবেন্দ্রাগা পাউ ফাওনৈ। ওজানা এগজিবিসন অসিদা চৎমিন্নগদবা খোঙবু শেম্লে। নুমিৎতুগী থৌরমগী প্রিসাইদ তৌগদবা ওজা য়ুম্নাম নবচন্দ্র, ওজা অরিবম জয়চন্দ্র শর্ম্মসু য়াওনি হায়বীরকই। ঐনা, ফরে ঐসু য়াওহৌগে হায়দুনা ফজরবা খোঙবু অমা শেমদুনা নোং মরক্তা ওজা দেবেননা মথং মথং পিক অপ তৌবীদুনা ইকোন কোন্না ঐবু পিক অপ তৌবা লাকপীখি। নোং খরদি পাথখ্রে। চেবাউদা পুং অমদগী হৌগনি থারগা পুং ১ হেল্লগা লোক্তাক তম্না থৌথরে। চুম্মী ওজা দেবেনগী লোয়নবীনা ওজা দেবেন্না গাড়ী থৌগদবগা ওইবনে, চৎমিন্নগদবা খোঙবুনগা সেনিয়ার সিতিজন ঙাক্তা ওইবদুদা, চৎমিন্নগদবা খোঙবুসু লোইনা অহল ঙাক্তনি হায়হৌই তম্লে। ঐখোয় ময়াম ৱা নোকমিন্নৈ। গাড়ী মনুংদা, মমাঙঙৈদা ইম্ফালদগী মোইরাং য়ৌবদা মিনিট ৪৫ খক্তং চঙলম্মি। হৌজিক্তি চাওখৎলকপদগী ওন্থোকনা চিনখ্রে টিদ্দিম লম্বীসিসু। ওজা দেবেনগা ইংনা তপ্না ৱাখল তানা থৌবনিনা ইয়ৌ য়ৌশিনদ্রি অদুবু অমরজিৎনা পাখৎলম্বা য়াই হায়দুনা ঐনা ফোন তৌশিল্লি। ঐখোয় বিষ্ণুপুর য়ৌরে, য়ৌবুদি য়ৌদ্রসু। মসিনি মোবাইল ফোন্দা হায়নবা। মাসু অদুম য়াই- য়াই হায়রকখি। মাগীসু মী ইরাক লাকত্রিবদুদা য়াই য়াই হায়রকপা ওইরম্বসু য়াই। ঐখোয়না থাঙ্গ হেক য়ৌবদদি নুমিৎনা তরং তরং থোক্লদুনা লোক্তাক ফোকলোর ম্যুজিয়মগী সাইন বোর্দ উরে। অমরজিৎসু উরে। নহারোল আর্টিস্ত অতৈসু উরে। সেমসন অমসুং ওইনাম বিনোইসু য়াওরম্মি। মখোয় নহারোল খরনা ঐখোয়বু তরাম্না ওকপীরম্মী। কয়াদি নুংশিরে। ঐখোয় লাক্ত্রবদি থৌরম হৌবা য়াদ্রিবনা ঙাইবা ঙমদ্রমাল্লে ডা সনবম থানিললৈমসু, কবি বিমাবতি থিয়াম ওংবীসু তপ্না তপ্না ম্যুজিয়মগী চঙফমগী ঙমতক তৌবা সিড়ীদুদা তপ্না তপ্না কাখৎলক্লি। থানিললৈমনা হান্না থেংনরে। মাসু নোকফেৎ তৌরগা ওজা কৌরকই। মখোয়সু ঐখোয় ঙাইবদা ৱারম্লনি। কুইদে ঐখোয় হেক থুংবগা ইকান কান্নদনা অদুম থৌরম হৌরে। লৈঙাক্কী অচিনবা থৌগাই পুবা ওইবনা হৈস্নাম বালকৃষ্ণদি য়াওদ্রে। মহাকনা চিফ গেস্ত ওইগদবদো। ওজা দেবেননা চিফ গেস্ত ওইরে। ওজা নবচন্দ্রনা প্রিসাইদ তৌরে অদুগা ওজা থানিললৈমনা গেস্ত ওফ ওনর ওইরে। ইবুংঙো অভিজিৎ খ্বাইরাকপম, ইবেম্মা ঙান্থোইবী নীংথৌজম অনীনা থম্মোয় মনুং য়ৌনা চঙহনবা ঙম্বা পুকনিং নুংশিরবা খোইথুম্নরবা খোঞ্জেলনা লোক্তাক্কা মরী লৈনবা শৈহৌ ঈশৈ অমা থৌরম অদুগা ওন্থোকনা চান্ননা, মোইরাং কংলৈরোলগী শৈহেক্তা নিকনা নিকনা ইপোম য়াওনা ইংনা মেঙনা খুদোল তম্বগী খোঞ্জেলদো ওন্থোকনা পেঞ্জখি। পুকনিং পেনমনখ্রদুনা লোইশিল্লকপদা ঐসু ইচাশিংদুদা লুপা ৫০০/৫০০ পীদুনা মখোয় অনীবু পুকনিং থৌগৎখি।
কালেন আর্ট এগজিবিসন- ২০২২ দা উৎখিবা পেন্টিং খরা
অমরজিৎনা তরাম্না ওকপগী পীখিবা ৱাহৈ ৱাতা অদু ফজৈ। মনা অইবা অমা ওইরুবনরা খঙদ্রে। ইন্টরনেস্নেল ম্যুজিয়ম দেগী নুংগী ৱারোল অমসুং কালেন আর্ট এগজইবিসন শিনবদা থেংনখিবা অৱাবশিং অদুসু পল্লম্মী। ইবুংঙো লাইশ্রম সুসিলনা মমল য়াম্লবা আর্ট থিওরিগী মতাংদা ৱাহৈ খরা ঙাংখিবদু মমল য়াম্মী। আর্টিসশিংদদি য়াম্না পুকনিং লৌশিং ওইখি। ওজা দেবেন্দ্রা থিয়ামনা অথোইবা লেংবীরকপা ওইনা অনীরকশুবা তোংব্রম অহোংজাও মৈতৈ আর্ট এৱার্দ ২০২২ ফাইনেঞ্জম দেভিৎনা য়েকপা “ রি-ইমাজিন” হায়না মিংথোনবা পেন্তিং অদুদা লান্থোকখি। তশেংবসু য়াম্না ৱাহন্থোক লৈবা পেন্তিং অমনি। এৱার্দ ফংলবা দেভিৎনা মহাক্কি পুকনিং ৱারোলশিং ফোংদোকখি। মখা তারকপা ওইনা ফমফমলাংদা লেঙশিল্লিবা ওজাশিংনা পীবা মমল য়াম্লবা ৱাহৈশিং তাবদা পুকনিং লৌশিং য়াম্না ওইখি। নুমিৎতুগী থৌরম য়াওবা লাকপা আর্টিসশিং পুকনিং লৌশিং ওইরমগদ্রা খল্লি। ওজা থানিললৈমনা থিএটরগা ফাইন আর্টকা লৈনবা মরীগী মতাংদা মরীক চুম্না থম্বীরম্মী। ওন্থোকনা মমল য়ামখ্রে। ওজা দেবেননা খুৎ হৈরবা আর্টিসশিংগী পেন্টিংশিং মপান্দা উত্থোকপগী অপাম্বা ফোঙদোকলম্মী। ওজা নবচন্দ্রনা মণিপুরদা করম্না অনৌবা আর্টিস থোকলকখিবগে হায়বগী মতাংদা হৌখ্রবা ৱারী কয়া মতাং চানা পল্লম্মী। লোইশিল্লকপদা ঐখোয় অমগা অমগা ফোটো নম্মীন্নৈ। ঐনা হুৎ লৈথোরকপদা অহিংবা অয়েকপা লাই ওইরবোই নীংলুবা অমা হেক ঊরুরে। অদুদি অতৈ করিসু নত্তে, অমরজিৎকী মপলনা তাইজেপ শাবদুনি। নুমিৎতুগী থৌরম পরেং অমগুম্না খল্লে ঐদি। খুকউগা কোক্কা শম্নরবা শোল্লবা অহল অদুনা কোন্থরগা কয়াদা থৌনা ফনা তাইজেপ্তো শারিবা। য়েংবদা পেন্দদুনা মনাক্তা চঙশিন্দুনা ফোটো কয়া কাপ্লকই। অমরজিৎতা দোক্যুমেন্টেসন তৌ হায়রমখি।
কালেন আর্ট এগজিবিসন- ২০২২দা লেংবিরকখবা ওজাশিংগা তোংব্রম অমরজিৎ
মখল কয়াগী ফজরবা, নীংথিজরবা লাইশিংদো ময়াম পুন্না য়েংমিন্নখি। অমমমতং পন্দ্রবসু খুৎ হৈরবা নহারোলশিংগী আর্ট ৱার্কশিংদুনা য়েংলিবা ঐখোয় পুম্নমকপু শুমহৎখি। মিৎফম হোংবা ঙমখিদে। হাইপর রিএলিস্তিক পেন্তিং, পেন্সিল অমসুং ওইল পেন্তিংশিং, নিংথিজরবা তেকচর অমসুং হৈ-শিংলবা তেকনিক শিজিন্নবা হৈরবা আর্টিসশিংনা শরুক য়ারি। মখোয়গী কলাগী পোত্থোকশিং য়াম্না পুকনিং থৌগৎনিংঙাই ওইখি। ফজবা অপিকপা ৱাটর কলরগী হৈ শিংবা উৎপা লাই কয়াসু উবা ফংখি। আর্টপু পামজবশিংদা অনৌবা মহাউ অমা পীবা এগজিবিসননি কালেন আর্ট এগজিবিসন। লমদম তাম্না লোক্তাক খোংবান্দা শিনবা আর্ট এগজিবিসন ওইরবসু মীপুম খুদিংবু চৎনিংবা ফাওহল্লি। পুকনিং থম্মোয় পুম্নমক চিংশিনবা অমা য়াওরি লোক্তাক ইমাগী মশাইকোলদা ওইবনা।
কালেন আর্ট এগজিবিসন- ২০২২ দা উৎখিবা পেন্টিং খরা
থৌরম লোইশিল্লকপদা, নীংশিং খুদম ওইনবা কেনভাস অমদা ওজা জয়নে, ওজা দেবেননে, ওজা নবচন্দ্রনে অদুগা ঐ ইশামকনে পুন্না লাই অমা য়েকমিন্নৈ। ঙাইহাক লৈথনীংবা ফাওরবসু খরা খরা মমশিল্লকপদা য়ূম্না কৌরকপগুম, ঐখোয় নুংশিরবা থাঙ্গদগী হল্লকখি ।
0 কমেন্ট:
কমেন্ট তৌবিয়ু