কে হেমচন্দ্রগী ‘লৈকায় কোয়রুবা খোর্জৈদগী’ অমসুং এল বিরেন্দ্রগী ‘চীংঙু ফম্বাল কায়নবা’ লাইরিকশিং ফোঙখ্রে
ইম্ফাল, জুন ২৯ : কোঞ্জেংবম হেমচন্দ্রনা ইবা ‘লৈকায় কোয়রুবা খোর্জৈদগী’ হায়না মিংথোনবা লাইরিক অমা ঙসি ফোঙখ্রে। পরেম পব্লিকেশন্স ইম্ফালনা শীন্দুনা মেজোর খুলদা লৈবা মণিপুর প্রেস ক্লবকী লোক্তাক হোলদা পাঙথোকখিবা থৌরম অদুদা মণিপুর সাহিত্য পরিষদ ইম্ফালগী প্রেসিদেন্ত লোংজম জয়চন্দ্র অমসুং প্রোঃ নহাকপম অরুনানা প্রেসিদিয়াম মেম্বরশিং ওইনা শরুক য়াখি।
থৌরম অদুগা মরী লৈননা লাইরিক অসিগী অইবা কে হেমচন্দ্রনা হায়, মহাক্কী ‘লৈকায় কোয়রুবা খোর্জৈদগী’ হায়বা লাইরিক অসি পদ্মা প্রিন্তর্স, পাউনা কৈথেলদা নমদুনা অথুবা মতমদা নম্বা লোয়নবা য়াম্না কন্না হোৎনখি। লাইরিক অসি নম্নবা হোৎনবদা মহাক্কী মরূপ আর কে ভুবনস্নাগী অচৌবা মতেঙ অদুগীদমক থম্মোয় শেংনা তৌবিমল খঙবা ঊৎচরি। লোয়ননা লাইরিক অসিগী আই বি এস এন ফংনবা হোৎনবদা নাউরেম রাজেন্দ্র, শামুরৌনা পাংবিখিবা মমল য়াম্লবা মতেঙ অদুবুস কাউজদে।
ময়াম্না মহাক্কী লাইরিকঅসিবু অমুক্তং ওইবরসু পাবীয়ু। লোয়ননা লাইরিক অসিগী পাবগী নুংঙাইবা নৎত্রবা নুংঙাইতবা খুদীংমক অদু ফোঙদোকপীরকপদা মহাক্না তরাম্না ওকচগনি হায়নসু মহাক্না ফোঙদোকখি।
নাকল অমরোমদা, এল বিরেন্দ্র শর্ম্মানা ইথোকপা ‘চীংঙু ফম্বাল কায়নবা’ হায়না মিংথোনবা লাইরিক অমসু ঙসি ফোঙখ্রে। জোন মিলতনগী ‘লোস্ত পেরাদাইজ’ হায়রিবা লাইরিক অসিবু বেঙ্গোলি অমদি মীতৈ ময়েক অনীমক্তা ইথোক্লগা পুথোকপা ‘চীংঙু ফম্বাল কায়নবা’ হায়বা লাইরিক অমসু নিত্যাইপাৎ চুথেক্তা লৈবা দি আই পি আরগী ওদিতোরিয়ামদা ঙসি ফোঙখিবনি।
থৌরম অদুদা প্রোঃ হুইরেম বিহারি, লোংজম জয়চন্দ্র অমসুং নোংমাইথেম কিরনকুমারনা থৌরমগী অথোইবা মিথুঙলেনশিং ওইনা শরুক য়াখি।
সোর্স: পোক্নফম
0 কমেন্ট:
কমেন্ট তৌবিয়ু