থিয়াম সুর্য্যমুখী লৈখিদবদা মণিপুরী সাহিত্য পরিষদনা অৱাবা ফোঙদোরক্লি
ইম্ফাল, জুন ৩০ : মণিপুরী সাহিত্য পরিষদ, ইম্ফালগী কুমজা ১৯৯৯ অমসুং ২০১৫ দা পাঙথোকখিবা ৬৪ শুবা অমসুং ৮০ শুবা চহীগী মীফমদা নৃত্যভূষণ অমসুঙ নৃত্যরত্ন হায়বা উপাধি পীদুনা ইকায় খুম্নখ্রবী লমদমসিগী শক্নাইরবী মণিপুরগী জগোয়গী গুরু থিয়াম সুর্য্যমুখী দেবী মশাগী অনাবা অমদগী মশাগী য়ুম কৈশামপাৎ লৈমজম লৈকায় জুন ২৯, নোংমাইজিং নুমিত্তা লৈখিদবদা মণিপুরী সাহিত্য পরিষদনা অৱাবা ফোঙদোরক্লি।
সুর্য্যমুখী মশাগী চহী ১৪দা ঙায়রিঙৈ য়াম্বেম মহাবীরনা কুমজা ১৯৪৮ দা লিংখৎখিবা নৃত্যশ্রম কৌবা কৈশাম্পাৎতা লৈবা অসিদগী গুরু মাইস্নাম অমুবীদগী জগোয় তম্বা হৌরকখি। মথংদা য়াম্বেম মহাবীর, ঐচ তোম্বা সিংহ, অমুদোন শর্ম্ম, কেঐচ লোকেশ্বর, ইবোপিশক শর্ম্ম, রাজকুমার তোমালস্না, এ য়াইমবী, ঐচ বাবুনচিংবা গুরুশিংদগী মখা তমথখি। কুমজা ১৯৭৫ দা জৱাহরলাল নেহরু মণিপুর দান্স একাদেমীগী বেলে য়ুনিত্তা, সেনিয়ার আর্তিস্ত ওইনা থবক তৌবা হৌখি।
একাদেমী অসিনা পুথোকপা বেলে ৩০দগী মথক্তা মপূং ওইবা শক্তা লুংদুনা শরুক য়াবদা নত্তনা এসিস্তেন্ত কোরিওগ্রাফম ওইনা থবক পুরকখি। কুমজা ১৯৪৮দা ফাওন্দর সেক্রেতরি ওইনা লিংখৎখিবা রিসার্ছ সেন্তর ফোর মণিপুরী পার্ফোর্মিং আর্তস হায়বা সংস্থানসিদা মহৈরোয় কয়া তাকপী তম্বীখি। মসিগী মথক্তা মণিপুরী জগোয়গী কলা অসিবু ভারত্তা নত্তনা মালেমগী তোঙান তোঙানবা মফমশিংদা ঊৎপদা অচৌবা থৌদাং লৌখি। ঊৎখিবা মফমশিংগী মরক্তা বনারস, দিল্লী, কোলকতা, এলহবাদ, য়ু এস এস আর, ফ্রান্স, জর্মন, আমেরিকানচিংবা পনবা য়াই। লেকচর দেমোস্ত্রেসন কয়াসু পীখি।
কলাকার অসিনা মণিপুরী জগোয়গী লমদা তৌখিবা দানবু শকখঙবীদুনা ফংখ্রবা উপাধি অমদি এৱার্দশিংদগী মণিপুর স্তেত কলা একাদেমী এৱার্দ (১৯৮৫), মণিপুরী সাহিত্য পরিষদ, ইম্ফাল নৃত্যভূষন (১৯৯৯) অমসুং নৃত্যরতন (২০১৫), সঙ্গীত নাতক একাদেমী এৱার্দ (২০০৩), গুরু তরুনকুমার সম্মান (২০০৯), লৈমরোল খোর্জৈকোলগী চোংথাম বিমলাবন্ত এৱার্দ (২০১৪) অসিনচিংবনি।
থিয়াম সুর্য্যমুখী দেবীনা লৈখিদবদা মণিপুরী সাহিত্য পরিষদ, ইম্ফালগী সভাপতি শ্রী লোংজম জয়চন্দ্র সিংহনা থৌরম মপু ওইদুনা পরিষদকী ওদিতরিয়ামদা সাহিত্য পরিষদ, ইম্ফালগী মেম্বরশিংনা মিনিত ২ তুমিন্না লেপ্তুনা থম্মোয় শোক্না অৱাবা ফোঙদোকখি।
লৈখিদ্রবীগী ইমুং মনুঙগী অৱাবদসু শরুক য়াবগা লোয়ননা লৈখিদ্রবীগী থৱায়না মতম পূম্নমক্তা লাইরম্লেন্দা ঈংনা চিক্না, শান্তি ওইনা লৈরুনবা মপুগী মফমদা খুরুমজরি হায়নসু চেরোল অসিনা মখা তারক্লি।
সোর্স: পোক্নফম
0 কমেন্ট:
কমেন্ট তৌবিয়ু