কালচার কনগে হায়রবদি থাঙ তা অমদি খোংজোম পর্বদা অহেনবা মিৎয়েং চঙফম থোকই : বুধ চিংথাম
ইম্ফাল, সেপ্টেম্বর ২৫: ঐখোয়গী লমদম অসিগী ওইনা লৈজরক্লবা নাৎ অমদি চৎনবীশিং কনগে হায়রবদি পুৱারীগা শাগোন্নরগা লাক্লবা থাঙ তা অমদি খোংজোম পর্বদা অহেনবা মিৎয়েং চঙফম থোকই হায়না কালচারেল ৱার্কারস এন্দ এক্টিভিষ্ট ফোরাম মণিপুরগী প্রেসিদেন্ট বুধ চিংথামনা ফোঙদোরক্লি।
কংলৈ শক্তম লাংবা কাঙলুপকী চহী ৫০ মপুং ফারকপগা লোয়ননা কাঙলুপ অসিনা দিপার্টমেন্ট ওফ আর্ট এন্দ কালচারগা খুৎশম্নরগা চীফ মিনিষ্টার আর্টিষ্টশিংগী তেংবাঙ মখাদা নুমিৎ ২৩ নি চুপ্না পাঙথোক্তুনা লাকখিবা মরাম নুংশেৎপা খৌশা থৌরমগা মরী লৈননা বুধ চিংথামনা ৱাফম অসি ফোঙদোকখিবনি।
য়াইস্কুল পুলিস লেনদা লৈবা মণিপুর দ্রামাটিক য়ুনিয়ন (এম দি য়ু) দা পাঙথোকখিবা ঙসিগী থৌরম অদুদা অথোইবা মীথুংলেনগী ৱারোল পীরদুনা বুধ চিংথামনা মখা তানা ফোঙদোকখিবদা ঐখোয়না লমদম অসিগী কালচার কন্নবগীদমক ইহান হান্না খোংজম পর্ব অমসুং থাঙ তাদা মিৎয়েং চঙফম থোকই। হায়রিবা অনী অসি ঐখোয়গী খুন্নাইগী ওইনদি য়াম্না মরু ওইবা শরুক অমদি।
থাঙ তা অমসুং খোংজোম পর্ব হায়রিবা নাৎ অমদি চৎনবী অনী অসিগী মগুন ঙসি ফাওবা মাঙদ্রি। হায়রিবা নাৎ অমদি চৎনবী অনী অসিগী খোঙ্গুল লিবদা ঐখোয়গী পুৱারীদা শাগোন্নরকপা ৱারী কয়া থোক্লক্কনি। থাঙ তাদা মিৎয়েং কা হেন্না চঙলগা থবক তৌরগদি কালচার য়োকখৎপগী অহানবা খোঙথাং মায় পাক্লে হায়না লৌবা য়াই হায়খি।
মহাক্না মখা তানা ফোঙদোকখিবদা বৃটিশশিংনা ঐখৈায়গী হৈথোই শিংথোইরবশিং অদুগী মতাংদা মমুৎ তানা খঙই। মখোয়না লাইরিক্কী মঙাল, লোল অমদি কালচারেল সিভিলাইজেসনগী মতাংদা মঙাল কয়া পীরম্মী। মখোয়না লমদম অসিদা য়ৌরক্লমদ্রবদি ঐখোয়না লৈরিম্লিবা ফীভম অসি য়ৌরক্লমদবসু য়াই। লমদম অসিদা লৈরিবা আর্টিষ্ট অয়াম্বা নুংঙাই য়াইফবা ইমুংদগী হৌরকপা নত্তে। অদুম ওইনমক কালচারবু য়োকখৎনবা হোৎনরি। মরমদি কালচার লৈজদবা ফুরুপতি অশিবা ফুরুপকা চপ মান্নৈ হায়নরিবনি।
অমরোমদা, চীফ মিনিষ্টারনা আর্টিষ্টশিংগীদমক খনবীদুনা চীফ মিনিষ্টার আর্টিষ্টশিংগী তেংবাঙ হায়না হৌদোরক্লিবা অসি ঐখোয়গী ওইনদি য়াম্না লাইবক ফবনি হায়খি। ঙসিগী থৌরম অদুদা কংলৈ শক্তম লাংবা কাঙলুপকী এদভাইজর ঙাঙোম নোরেন্দ্রজিৎনা থৌরম মপু অমদি দিপার্টমেন্ট ওফ আর্ট এন্দ কালচারগী দিপুটি দিরেক্টর জি ধর্মদাশনা অখন্নবা লেংবীরকপা ওইনা শরুক য়াখি। থৌরমগী লোয়শিল্লকপদা ট্রেনিং প্রোগ্রাম অদুদা শরুক য়াখিবা অদুদা মরাম নুংশেৎপা খৌশা হায়বা থাঙ তাগী পার্ফোমেন্স অমসু মীয়াম মমাঙদা উৎখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু