সিনে রাইটার্স এন্দ প্লে রাইট ফোরাম মণিপুরগী নিপানশুবা মপোক কুমওন পাঙথোকখ্রে
ইম্ফাল, সেপ্টেম্বর ২৬ :সিনে রাইটার্স এন্দ প্লে রাইট ফোরাম মণিপুর (সি দব্লিয়ু পি এফ এম) না শীন্দুনা ঙসি ফোরাম অসিগী ৮ শুবা ফাউন্দেসন দেগী থৌরম জৱাহরলাল নেহেরু মণিপুর দান্স একাদেমিগী ওদিটোরিয়ামদা পাঙথেকোখ্রে। থৌরম অদুদা কঞ্জামার এফ্যেরস য়ুদ এন্দি পাব্লিক দিষ্ট্রিব্যুসন মিনিষ্টার এল সুসিন্দ্রো মৈতৈনা অথোইবা মীথুংলেন, সী দব্লিয়ু পি এফ এম গী প্রেসিদেন্ট মনাওবী এম এমনা থৌরম মপু অমদি হৈরোক এ সীগী এম এল এ টি ঐচ রাধেশ্যাম অমসুং ফিল্ম ফোরাম মণিপুরগী চেয়ারমেন এল সুরজকান্তনা অখন্নবা লৈঙবীরকপশিং ওইনা শরুক য়াখি।
থৌরমদুদা অথোইবা মীথুংলেনগী ৱারোল পীরদুনা মিনিষ্টর সুসিন্দ্রোনা হায়, তুংদা হৌরক্কদৌরিবা মীরোলশিংনা পাবদা কান্নবা পীগদবা লাইরিকশিং ইদুনা থমহৌগদবনি। ফিল্ম, লিলা, দ্রামা অমদি অতোপ্পা আর্ট ফোর্মশিংনা সোসাইটি অসিদা অফ ফত্তগী মতাংদা এৱার্নেস কয়অ পীরি । অইবশিংনা ঐখোয়গী খুন্নাই অসিদা থোক্লিবা থৌদোক কয়া অসিগী মতাংদা কান্নবা অমসুং কান্নদবা কয়া অদু বেলেন্স তৌরগা ইনবা হোৎনগদবনি। মসিনা খুন্নাই অসিবু অওনবা অমা পুরকপা ঙমগনি থাজৈ হায়খি।
থৌরমগী মনুংচন্না ৩ শুবা মণিপুরী ফিল্ম স্ক্রিপ্ট কম্পিটিসন ২০২২ গী মকোক মথং তারবশিংদা মনা লান্থোকখি। নবকুমার নোংমৈকাপমনা ইবা চৈথেং হায়বা ফিল্ম স্ক্রিপ্ট অসিনা শরুংবম মনি নিংশিং মনা ২০২২ ফংখি। অদুগা ক্ষেত্রিময়ুম নিরুপমানা ইবা থৌৱান্মীচাক লক্তগী ফিল্ম স্ক্রিপ্টনা গুরুময়ুম শাখিগোপাল শর্ম্মা এৱার্দ অদুগা নাওরেম দোরেননা ইবা অমুবা চুমথাঙ হায়বা ফিল্ম স্ক্রিপ্ট অসিনা খোমদ্রাম বিধু অমদি খোমদ্রাম ওইবী লৈমখুবী নিংশিং মনা ফংখি। অদুগা মাংতে ৱেসি কোম্না ইবা ঐগী পুন্সি হায়বা ফিল্ম স্ক্রিপ্ট অসিনা ঈশ্বরচন্দ্র খ্বাইরাকপম নিংশিং মনা ফংদুনা স্পিসল জুরিগী এৱার্দ ফংখি।
অমরোমদা, ঙসিগী থৌরম অদুগী মনুং চন্না রাজ কুমারী মিনানা ইবা অমসুং অশাংবা কম্ম্যুনিকেসন, ইম্ফালনা ফোঙবা শৈরেং লাইরিক ‘তৎখ্রবা লংলা’ সু ফোঙখি। লাইরিক অসিগী অইবী আর কে মিনা ৱাংখৈ নিংথেম পুখ্রি মপালদগীনি। ঙসি ফোঙখিবা শৈরেং লাইরিক অসি মহাক্কী অহানবা লাইরিকনি। লাইরিকসিদা বাঙ্গালি ময়েক অমসুং মীতৈ ময়েক অনীমক্তা পূন্না ইবা শৈরেং ৭০ য়াওরি। শৈরেংশিং অসি হৌখিবা কুমজা ২০১৫ গী মালেমগী নুপীগী নুমিৎতগী ইবা হৌরগা মমাঙগী কুমজা ২০২১গী এপ্রিল ১০ ফাওবগী মনুংদা ইখিবা শৈরেংশিংনি।
লাইরিক অসিদা য়াওরিবা তৎখ্রবা লংলা হায়রিবা শৈরেং অসিমক মণিপুরগী মপারোই অথোইবা লময়ানবা হিজম ইরবাতপু শৈথাপা শৈরেংনি। লাৈইরিক অসি অইবীনা অশেংবা লুচিংপুরেলশিংগী মফমদা কৎচবনি হায়রি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু