খোইস্নাম ওংবী বিরোলানা ত্রিপুরাগী অহানবা নুপী মেম্বার ওইরে
ইম্ফাল, এপ্রিল ০১ : ত্রিপুরাগী ওইনা কুমজা ২০২৩-২০২৭ কী মণিপুরী লেংগ্বেজ এদভাইজরি বোর্দ (সাহিত্য একাদেমি) নিউ দিল্লীগী মেম্বার ওইনা খোইস্নাম ওংবী বিরোলা খল্লক্লে হায়রি। মহাকপু সাহিত্য একাদেমি অসিগী মণিপুরী লেঙগ্বেজ এদভাইজরি বোর্ডকী মেম্বার ওইনা খল্লকখিবসি ত্রিপুরাগী ওইনদি নুপীশিংগী মনুঙদা অহানবনি হায়রি। মহাক দিসেম্বর ২৫, ১৯৭৮ দা ত্রিপুরাদা মীতৈশিংনা মপূং ওইনা তারিবা খুল গৌরনগরদা পোকখিবনি হায়রি।
মীতৈ জগোয়গা ইরোয়ননা হৌরকখিবী মহাক সাহিত্যদসু খোঙদাদুনা মহাক্কী লাইরিক ‘প্রলোইগী খূৎশোক্তা’ (২০১২) অমসুং ‘ইমাদা ইবা চিঠি’ (২০২১) বু অশাংবা কম্ম্যুনিকেসননা ফোঙদোকখ্রবনি। মহাক হৌজিক মণিপুরী লিটরেরি এন্দ কালচারেল ফোরাম, ত্রিপুরাগী মেম্বার ওইবদা নত্তনা ফোরাম অসিনা ফোঙবা চেফোঙ ‘তখেল্লৈ নাচোম’ গীসু এদিটর ওইরিবনি।
মহাকপু মণিপুর সাহিত্য পরিষদ, ত্রিপুরানা মহাক্কী শৈরৈং লাইরিক ‘প্রলোইগী খূৎশোক্তা’ ইবগীদমক মোইরাংথেম লৈহাউ তেম্বী নীংশিং সাহিত্য মনা, ২০১৩ অমসুং সাহিত্য সেবা সমিটি ককচীংনা মহাক্কী লাইরিক ‘ইমাদা ইবা চিঠি’ দা ক্ষেত্রি নলিনি মেমোরিয়েল রিটরেরি এৱার্দ ২০২২ পীদুনা ইকায়খুম্নখ্রবনি। লোয়ননা মহাকপু ঈপাক ফিল্মস প্রদাক্সন ইম্ফালনা ‘অখাং কনবী মৈতৈ লৈমা’ লাইফ টাইম এচিভমেন্ট এৱার্দসু পীখ্রবনি হায়রি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু