আসাম অমসুং মণিপুর মুখ্যমন্ত্রী অনীনা এস কমলাকান্ত লৈখিদবগী অৱাবা ফোংদোকখ্রে
আগরতলা, সেপ্টেম্বর ১১ : মণিপুরগী ৱাংমদা মরু ওইনা আসামদা মণিপুরী খুনাইগীদমক কত্থোক্তুনা লাক্লবা শক্নাইরবা সমাজ সেবক সাইখোম কমলা কান্ত সিংহনা মনুং মতম চাদনা ইখঙ খঙহৌদনা লৈখিদবদা মাইকৈ কয়াদগী থম্মোয় শোক্না অৱাবা অমদি নুংঙাইতবা ফোঙদোকখ্রে। মহাক্লা লৈখিদবদা আসামগী মুখ্যমন্ত্রী হিমন্ত বিশ্ব শর্মা অমসুং মণিপুরগী মুখ্যমন্ত্রী যুম্নাম খেমচান্দনা থম্মোয় শোক্লা অৱাবা ফোঙদোকখ্রে। মণিপুর মুখ্যমন্ত্রীনা অৱাবা ফোঙলদুনা হায়খি, মহাক্বা লৈখিদবসি খুন্নাইগীদি চাউরবা মাঙজবা অমনি। অরুবা ইস্যু কয়াদা মহাক্ন লাওরম্বা খোল্লাও খুন্নাইগীদমক তৌরম্বা থবকশিং য়াম্না মগুণ লৈ। মণিপুর লৈঙাক অমসুং ময়ামগী মহুৎ শীন্দুনা লৈখিদ্রবগী ইমুং মনুংনা থেংনহৌরিবা অৱাবদা শরুক য়াজরি হায়না মহাক্কী চেরোলদা পল্লি। আসামগী মুখ্যমন্ত্রীনা সমাজ সেবক এস কমলাকান্ত সিংহনা লৈখিদ্রবদা থম্মোয় শোক্লা অৱাবা ফোঙদোকখে হায়রি। মশাগী অরুবা লায়না অমনা মরম ওইদুনা সেপ্টেম্বর তাং ৭, অয়ুক চেন্নাইগী আপেলো হাসপাতালদা পুন্সিগী অরোইবা য়াহিপ তাখিবনি।
সোসেল এক্টিভিষ্ট মহাক্না মনুং মতম চাদনা লৈখিদবদা ত্রিপুরাগী তোঙান তোঙানবা লুপ কয়ানা অৱাবা ফোঙখি। মণিপুরী কাউন্সিল ত্রিপুরাগী জেনারেল সেক্রেটারী কে ধীরেন, ত্রিপুরা মণিপুরী ষ্টুডেন্ট-য়ুথ কোঅর্ডিনেশন কমিটিগী জেনারেল সেক্রেটারী ৱাই প্রবীন, মণিপুরী ষ্টুডেন্ট এসোসিয়েশনগী জেনারেল সেক্রেটারী অনীকেত সিংহ অমসুং মণিপুরী লিটরেরী এ্যন্ড কলচরেল ফোরাম ত্রিপুরানা থম্মোয় শোক্না অৱাবা ফোঙখি।
সাইখোম কমলাকান্ত, ইং ১৯৫৪ গী জানুৱারী ২২ ইরাই নুমিৎ সোনাই সাইখোম লৈকাইদা পোকখি। অপোকপা সাইখোম মনিভদ্র অমসুং অপোকপী সাইখোম ওংবী চাউবী দেবী কৌই। সোনাইদা পোক্লবসু বনতারাপুরদা চাউরকখি। বাংলা মিডিয়াম স্কুল অমগী প্রিন্সিপাল ওইরম্বদগী পোত্থাখিবনি। মহাক ওল আসাম মণিপুরী ষ্টুডেন্টস ইউনিয়নগী প্রেসিডেন্ট ওইরম্মী, এডভাইজরসু ওইখি। আসাম মণিপুরী কলা একাডেমি, মণিপুরী বেনেভোলেন্ট সোসাইটি নচিংবা লুপ কয়াগসু মরী লৈনরম্মী। মশাগী চহী ৭২ শুখ্রবা মহাক্লা লৈখিদবা মতমদা লোইনবী অমসু মচা নুপী অমা থম্নম্মী। লৈখিদবা মহাক্কী কর্ম শিলচর ইটখোলা মণিপুরী পাড়া মশাগী ময়ুমদা পাঙথোক্লগনি হায়রি।
সোর্স - মরূপ
0 কমেন্ট:
কমেন্ট তৌবিয়ু