অগরতালাদা কলচরেল ফেষ্টিভেল অমসুং খুন্নাইগী অহল অমদি মহৈরোয়শিংদা মনা পিগদৌরি
আগরতলা, জুলাই ২০ : ত্রিপুরাদা মণিপুরী লোল, সাহিতা অমদি নাৎ চাওখৎহন্নবা হোৎনবদা অচৌবা থৌদাং লৌরিবা মণিপুরী লিটরেরি এন্দ কলচরেল ফোরম, ত্রিপুরানা তখেল্লৈ তেংবাং লুপ (তখেল লৈমা তেংবাং লুপ) কা পুন্না লান্থোক্কদবা চহিসিগী ওইনা মনা ফংগদবশিংগী মীং লেপ্নখ্রে। হৌখিবা জুলাই ১১ দা তরৌদা ফমখিবা এৱার্দ সব-কমিটিগী মীফম অমদা লেপ্নখিবা ৱারেপকী মতুং ইন্ন মনাশিং অসি থাসিগী ২৬ তা সুকান্ত একাডেমি ওদিটোরিয়ম, অগরতালাদা পাঙথোক্কদবা চহিগী মনা লান্থোকপা অমদি মণিপুরী কলচরেল ফেষ্ট-২০২৬ হায়বা থৌরম অমদা লান্থোক্কনি হায়না মণিপুরী লিটরেরি এন্দ কলচরেল ফোরম, ত্রিপুরাগী জেনরেল সেক্রেটরি খোইস্নাম মঙ্গলগী চেরোল অমনা ফোঙদোরক্লি।
ত্রিপুরাগী রাংমদা লৈবা মশক নাইরবা মীওই অমদা জাতিগী থাক্তা চহি ২/২ দা পীবা 'বাবুরে তরামনি মেমোরিয়েল নেসনেল এৱার্দ' চহিসিগী ওইনা মণিপুরগী শক্নাইরবী অইবী অমদি এক্টিবিষ্ট রাজকুমারী মুসুকসনা দেবীদা পীরগনি। লেমজনিংঙাই ওইরবা মনা অসিদা ইন্নফি, শক্তাকচে, নীংশিং খুদোল অমদি শেল ওইনা লুপা লিশিং ১০ য়াওরি। মহাক্লা ত্রিপুরাদা মণিপুরী মহৈরোয়শিংবু অখন্ননা পুক্নিং থৌগৎতুনা সোসিও কলচর চাওখৎহন্নবা হোৎনবদা থৌদাং পাঙথোকপীবগী মনা অসি পীনবগী দমক মহাকপু খনবনি। ত্রিপুরাদগী মপান লমদা পীবা অমত্তা ঙাইরবা মনা অসি মমাংদা মণিপুরগী শক্নাইরবা এসি নেত্রজিৎ, লোংজম সোমোরেন্দ্রো অরুন অমদি শক্লাইরবা স্কোলার লোংজম জয়চন্দ্রদা পীদুনা ইকাই খুম্নখ্রবনি। ত্রিপুরাদা মণিপুরী নাৎ চাওখৎহন্নবগী পান্দমদা জেএন মণিপুর দান্স একাডেমি, ইম্ফালগী দাইরেক্টর বিলাস পুখ্রম্বমনা কংপা কলা সংস্কৃতিগী লমদা পীবা পুকখ্রম্বম ইবেয়াইমা দেবী নীংশিং মনা অসি অহানবা ওইনা ত্রিপুরাগী শক্নাইরবা নট সঙ্কীর্ত্তন শৈশকপা অমদি জগোয়গী রাজধারী রাজকুমার ভ্রমরজিৎ সিংহদা পীরগনি। মণিপুরী খুনুং ঈশৈ শৈশকপী অমদি জগোয়গী শক্নাইরবী গুরু খাংগ্রাকপম ওংবী বিজয়লক্ষ্মী সিংহদা এমএলসিএফ, ত্রিপুরা লাইফটাইম এচিবমেন্ট এৱার্দ অমদি মণিপুরী জগোয়দা মচিন তুম্না হৌগৎলক্লিবী গোল্ড মেডলিষ্ট খুমন্থেম অনিমা সিংহদা খোইস্নাম বঙ্গবীর মেমোরিয়েল য়ং টেলেন্ট এৱার্দ পীরগনি। মনাশিং খুদিংমক্তা সাল, শক্তাকচে, কোকয়েৎ (নুপাদা) অমদি শেলগা কোন্ননা পীগদবনি।
খুনাইগী মশক নাইরবশিংবু ইকাই খুম্নবগা লোয়ননা লাইরিক ফবা ফার্স্ট দিবিজনদা পাস তৌরবা মহৈরোয়শিংবুসু হৌখিবা চহিগুম্না ওক্কনি। ত্রিপুরা বোর্ড ওফ সেকেন্দরি এডুকেসননা লৌবা চহিসিগী সেকেন্দরি অমদি হায়র সেকেন্দরি ফাইনেল ইগজামদা স্টেটকী থাক্তা পুন্না নম্বর য়াম্না ফংদুনা মাই পাক্লবী এন স্নেহা দট্ট (সেকেন্দরি) অমদি ক্ষেত্রিময়ুম নয়ানিতা সিংহ (হায়র সেকেন্দরি) মহৈরোয় অনিদা খাইদেম নিঙোল শগোলশেম ওংবী অচৌবী দেবী নীংশিং শেলগী মনা তোঙান-তোঙান্না পীগনি। মনাসিদা লেংয়ান, শক্তাকচে অমদি লুপা লিশিং ৫।৫ য়াওরি। মনা অসি ডিএম যুনিবর্সিটি, মণিপুরগী হান্নগী মণিপুরী হেড ওফ দিপার্টমেন্ট ডাক্তর রাজকুমারী মুসুকসনা দেবীনা কৎপনি।
সিবিএসই বোর্ডনা লৌবা ইগজামদা হায়র সেকেন্দরিদা খ্বাইদগী পার্সেন্টেজ ৱাংনা ফংবা এন অনিক দট্টদা একাডেমিক লোরিয়েট এৱার্দ অমদি হায়র সেকেন্দরিদা থোইদোক হেন্দোক্না মাই পাকপগা লোয়ননা অখন্নবা সবজেক্টতা চাম্মদা চাম্মা ফংবগীদমক তোঞ্জম নিলম সিংহ, ক্ষেত্রিময়ুম নিভা দেবীদা একাডেমিক ইন্ এক্সিলেন্স এৱার্দ পীদুনা পুক্নিং থৌগৎকনি। মনা অসি অহৈবম ওংবী পুষ্পিতা সিংহ, পুনে, মহারাস্ত্র অমদি ক্ষেত্রিময়ুম রাজিব সিংহ, বেঙ্গলুরুনা কৎপনি।
ত্রিপুরাগী জিরানিয়া সব-দিবিজন মখাদা লৈবা মৈতৈ খুঙ্গংশিংদগী ফার্ট দিবিজনদা পাস তৌরবা মহৈরোয় খুদিংমক্তা চহি খুদিংগী পীবগুম্না হন্দকসু খোইস্নাম বঙ্গবীর মেমোরিয়েল একাডেমিক এৱার্দ পীগনি। বোডি বিল্ডিংদা নেসনেল থাক্তা সনাগী মেডল ফংলক্লবা শক্নাইরবা শান্নরোই ডাক্তর য়েলাম বিশাল সিংহবু অখন্ননা ওক্কনি। লোয়ননা লৈত-লাইরা লাইরিক ফবা মহৈরোয়দা পীবা স্কোলারসিপ (থাগী টিউসন ফি) চহিসিগী ওইনা থৌরমসিদা মহৈরোয় অমদা খুৎশিন্নগনি।
মনা লান্থোকপা অমদি কলচরেল ফেষ্টকী থৌরমসিদা মণিপুর অমদি অৱাং-নোংপোক্কী শক্মাইরবা অইবা অমদি এক্টিবিস্ট কয়া শরুক য়াগনি। কলচরেল ফেষ্টতা জৱাহরলাল নেহরু মণিপুর দান্স একাডেমি, ইম্ফাল অমদি ত্রিপুরাগী কলাকারশিংনা মখল মথেল জগোয় খুথেক, থাঙ-তা অমদি পুঙ চোলোম নচিংবা উৎকনি। মণিপুরী ফুরুপ অমদি নাৎপু নুংশিবীবা ময়াম্না কলচরেল ফেষ্টকী থৌরমসিদা শরুক য়াবীনবসু আপিল তৌরক্লি।
0 কমেন্ট:
কমেন্ট তৌবিয়ু