অইবা আর রোবিন্সন মোয়োনদা পদ্মা দেবী এৱার্দ-২০২২ লান্থোকখ্রে
ইম্ফাল, দিসেম্বর ৩১ : নহারোল সাহিত্য প্রেমী সমিতি, ইম্ফালনা পীবা পদ্মা দেবী এৱার্দ-২০২২ মোয়োন ত্রাইব মরক্তগী মণিপুরী খোরিরোলবু চাওখৎহনবদা অঙম্বা খুদোল তম্লিবা অইবা আর রোবিন্সন মোয়োনদা লান্থোক্তুনা ইকায়খুম্নবা ঊৎখ্রে। ‘পোক্নফম’ পাউ-চেগী এদিটর ওইরম্বা লৈখিদ্রবা শামুরাইলাৎপম গোপাল শর্ম্মা অমসুং মহাক্কী ইমুং-মনুংনা লৈখিদ্রবী অপোকপী পদ্মাগী মিংদা কৎপা মনা অসিদা শেল ওইনা লুপা ২০,০০০ গা লোয়ননা সাইতেসন অমা অমসুং সাল অমা য়াওরি। আর রোবিন্সন মোয়ননা মণিপুরী লোলদা ইবা ‘কপ্পু কপ্নিংঙকইদা’ হায়না মিংথোনবা লীলা লাইরিক অসিদা মনা অসি পীবনি।
আর রোবিন্সন মোয়োন ইং ১৯৫৮ গী এপ্রিল ২ দা চান্দেল দিস্ত্রিক্তকী কোম্লাথাবীদা পোকই। অপোকপগী মিংনা আর ৱাংথা মোয়োন অমসুং অপোকপীগীনা পেকুং চারা কৌই। অপোকপা-অপোকপী অনিমক লৈখিদ্রে। মহৈগী থাক্না লাইব্রেরি এন্দ ইনফোর্মেসন সাইন্সকী গ্রেজুয়েতনি। চান্দেল দিস্ত্রিক্তকী মনুং চনবা কোম্লাথাবীদা লৈবা সাউথ ইস্ত মণিপুর কলেজদা ইং ১৯৮৫ দা লাইব্রেরিয়ান ওইনা থবক চঙলগা ইং ২০১৪ দা থবক্তগী পোত্থাখি।
মমালোলমক নৎত্রবসু লমদম অসিগী ফাওন-লোল ওইরিবা মীতৈ লোলদা ইবা লাইরিক অনী ফোঙখ্রে। ইং ১৯৮১ দা দ্রামা লাইরিক ‘মহাক্না হায়রম্মী’ অমসুং ইং ২০১৪ দা লীলা লাইরিক ‘কপ্পু কপ্নিং ঙকইদা’ হায়রিবসি ফোঙখ্রে। মহাক মমাঙদা সাহিত্য সেবা সমিতি, ককচীংগী স্পিসিয়েল এৱার্দ (মণিপুরী)-২০১৭ পীদুনা ইকায়খুম্নখ্রবনি।
ঙসি নহারোল সাহিত্য প্রেমী সমিতি, ইম্ফালনা শীন্দুনা জৱাহরলাল নেহেরু মণিপুর দান্স একাদেমি, ইম্ফালগী ওদিতোরিয়ামদা পাঙথোকখিবা সাহিত্য প্রেমী সমিতি অসিগী তোঙান-তোঙানবা মনা মঙা লান্থোকপগী থৌরমগী মনুং চন্না পদ্মা দেবী এৱার্দ-২০২২ অসি থৌরমগী চীফ গেস্ত ওইনা শরুক য়াখিবা মণিপুর হেন্দলুম এন্দ হেন্দিক্রাফটস দিবেলপমেন্তে কোর্পোরেসন লিমিতেটকী চেয়ারমেন এম এল এ খোবান্তাবম ইবোমচানা আর রোবিন্সন মোয়োনদা খূৎশিন্নখিবনি।
চহী অসিগী পদ্মা দেবী এৱার্দ-২০২২ ফংলবা অইবা আর রোবিন্সন মোয়োননা মহাক্কী থম্মোয়দা ফাওরকপা অদু থম্লদুনা হায়, লমদম অসিদা য়েলহৌঙৈদগী খুন্দামিন্নরিবা চীংমী-তম্মী ফুরুপশিংগী ফাওনা-লোল অসি মীতৈলোলনা ওইরি। ফুরুপ খুদীংমক্কী পাওন-লোল ওইবনা মণিপুরী খুদীংমক্কী লোল ‘মণিপুরীলোল’ হায়নসু খঙনৈ। লোল অসিবু য়োকখৎপদা খুন্দামিন্নরিবা ফুরুপ খুদিংগী থৌদাং লৈ।
‘মণিপুরী খোরিরোলদা ঐহাক্না ঙমজবা খুদোল তমজবা অসিদা শকখঙবীদুনা এৱার্দ অসিবু কৎপীরক্লিবা ইমুং-মনুং অমসুং নহারোল সাহিত্য প্রেমী সমিতি, ইম্ফালনা মনা অসি পীবীরকপা অসিদা অদুক্কী মতীক নুংঙাইবা অমসুং অপেন্বা পোকই’ হায়না রোবিন্সন মোয়োননা ফোঙদোক্লি।
‘পদ্মা এৱার্দ ফংবা অসিনা ঐঙোন্দা অনৌবা থৌনা অমা হাপ্পীরে। মণিপুরী খোরিরোলদা ঐহাক্না ঙমজবা খুদোল খরা তৌজবা অসিদা মখা তানা হেন্না কন্ত্রিব্যুত তৌনিংবগী ঈনোৎ হাপ্পীরে। ঐখোয়গী ফাওনা-লোল অসি খুন্দামিন্নরিবা ফুরুপ খুদীংমক্না য়োকখৎমিন্নসি অমসুং হেন্না চাওখৎনবা হোৎনমিন্নসি’ হায়না অইবা রোবিন্সন মোয়ননা ফোংদোকখি।
মনা অসিবু কৎলিবা ইমুং-মনুঙদগী শামুরাইলাৎপম গৌতম (বোবী) শর্ম্মানা হায়, মনা অসি মহাকপু পোকপীরম্বা লৈখিদ্রবা এসঐচ গোপাল শর্ম্মা অমসুং অহলশিংনা মণিপুরী খোরিরোল চাওখৎনবা অমসুং মণিপুরগী অপূনবা শক্তম অসি কন্নবা হোৎনবীরিবা অইবা-অইবীশিংদা তমজবা ঙমজবা খুদোলনি। মণিপুরী লোল অসি লমদম অসিগী তোঙান-তোঙানবা কমুনিটিশিংগী ফাওনা-লোল ওইদুনা লাক্লি। মরম অদুনা লোল অসি চাওখৎহনবদা খুন্দামিন্নরিবা কম্যুনিটিশিংগী ফাওনা-লোল ওইদুনা লাক্লি। মরম অদুনা লোল অসি চাওখৎহনবদা খুন্দামিন্নরিবা কম্যুনিটি খুদীংমক্না হোৎনমিন্নবা চঙই। ৱাখল্লোন অসিনা মাঙদা থম্লগা মহাক্কী অপোকপা অমসুং অহলশিংনা মনা অসি পীনবা লেপ্পীরম্বনি।
থৌরম অদুগী চীফ গেস্তকী ৱারোল পীরদুনা এম এল এ ইবোমচানা, খুন্নাই অসিগী অশোয়বা অমসুং অরানবাশিং চুমথোক্তুনা অচুম্বা মায়ওন অমদা পুবদা অইবা-অইবীশিংনা লৌরিবা থৌদাং অদুক্কী মতীক চাউই হায়না শীংথাখি। ঙসিগী থৌরম অদুদা নহারোল সাহিত্য প্রেমী সমিতি, ইম্ফালগী খাইদেম প্রমোদিনী মনা-২০২২ না অইবী ৱাহেংবম কুমারী চনুদা, ‘জননেতা হিজম ইরাবত মনা-২০২২ না মাইবম নবকিশোর সিংহদা, তায়েঞ্জম জয়ন্ত পোইট্রি এৱার্দ-২০২২ না অইবী অরাম্বম ওংবী মেমচৌবীদা অমসুং সনসম ওংবী মোইরাংথেম মাইপাকপী সাহিত্য মনা-২০২২ না অইবী নেপ্রম মায়াদা লান্থোক্তুনা ইকায়খুম্নখি।
নহারোল সাহিত্য প্রেমী সমিতি, ইম্ফালগী প্রেসিদেন্ট নাওরোইবম ইন্দ্রমণিনা প্রিসাইদ তৌদুনা পাঙথোকখিবা থৌরম অদুদা গুরু সৌগাইজম থানিল সিংহ (পদ্মশ্রী) দা কৎচবা ‘মণিপুরী সঙ্কীর্ত্তনগী হৌরকফম অমসুং মশক’ হায়বা লাইরিক অমসুং ফোঙখি। অমরোমদা নহারোল সাহিত্য প্রেমী সমিতি, ইম্ফালনা শীন্দুনা শ্রীবীরেননা কৎচবা ‘কবি কীর্ত্তন (ৱাকমা হোংবা) অমসু পাঙথোক্তুনা লমদম অসিগী তোঙান-তোঙানবা অইবা-অইবীশিংনা মাগী-মাগী শৈরেংশিং পাথোকখি। সমিতি অসিগী প্রেসিদেন্ট নাওরোইবম ইন্দ্রমণিনা প্রিসাইদা তৌদুনা পাঙথোকখিবা থৌরম অদুদা মণিপুরী সাহিত্য পরিষদ, ইম্ফালগী প্রেসিদেন্ট লোংজম জয়চন্দ্রনা চীফ গেস্ত অমসুং দি কালচারেল ফোরাম মণিপুরগী প্রেসিদেন্ট প্রোফেসার হুইরেম বিহারী সিংহনা গেস্ত ওব ওনার ওইনা শরুক য়াখি।
সোর্স: পোক্নফম
0 কমেন্ট:
কমেন্ট তৌবিয়ু