‘ইমালম তেংবাঙ খোঙচৎ’ কী তেংবাঙশিং মণিপুর য়ৌরক্লে
ইম্ফাল, ফেব্রুয়ারি ১৫ : রাইটার্স ওফ মণিপুর গী মীদিয়া কোওর্দিনেটর পি শরতনা থাদোরকপা চেরোল অমনা বাংলাদেশকী অইবশিংনা ‘ইমালন তেংবাঙ খোঙচৎ’ হায়বা খোঙচৎসিগী মখাদা খোমজিল্লকপা শেনফমশিং রাইটার্স ওফ মণিপুর দা য়ৌরক্লে হায়রি।
চেরোলসিনা মখা তারদুনা, হৌখিবা চহী মে ৩দগী হৌরকখিবা লানসিদা অইবশিংসু ইমা লৈবাক্কীদমক লৌবা য়াবা থৌদাং লৌফম থোকই হায়দুনা রাইটার্স ওফ মণিপুরনা চীংখোঙ-চীংয়াদা খুল ঙাক্লিবা ইচা-ইনাওশিং অমদি লাঞ্জেন্নরবা ইফূরুপচাশিংদা অঙম্বা থাক্তা মতেং পাঙদুনা লাক্লি। অইবশিংগী তেংবাঙ খোঙচৎ লেপ্তন চৎলকপনা ৯৪ শুবা মতেং ফাওবা পীবা ঙমখ্রে।
তেংবাং খোঙচৎসিদা লমদমসিগী অইবা কয়া, মৈরা পায়বী অমসুং তোঙান-তোঙানবা শিনফমদা লৈবা মীওই কয়ানসু মতম-মতমগী লৌখৎলকপা থৌরাংশিংবু শৌগত্তুনা লাক্লি। মসিগী মথক্তা ত্রিপুরা, আসাম, দিল্লীনাচিংবদা লৈবা অইবা কয়া অমদি নিউ ইয়র্কতা লৈবা বাংলাদেশ মণিপুরী সোসাইটিনচিংবনা শেলগী মতেং পীরকখ্রে।
মী অমনা থা অমদা লুপা ১০০/১০০ পুখৎনবগী পূন্সি চেঙজেল মরুপ হায়বা অমসু হৌদোক্তুনা জানুয়ারি থাদগী মীওই কয়ানা খায়গৎনবা হৌরকখ্রে। লানসিগী ৱারোইশিংন অমা লৈত্রিবা ফাওবদি মতেং পাঙবগী থবক লেপ্তনা চত্থখিগনি। ইন্দিয়াগী ৱাংমদা বাংলাদেশতা লৈবা মণিপুরী অইবা সোসল এক্তিভিষ্ট সনাতোন হামোমনা মরু ওইবা থৌদাং লৌরগা বাংলাদেশতা ‘ইমালম তেংবাঙ খোঙচৎ’ হৌখিবা চহীগী নভেম্বর ২দা হৌদোক্তুনা মীয়ামদগী মতেং নীবা হৌখি। মীয়াম্না পীনরকপা শেলগী মতেং পুন্না লুপা ৩২,৬৫০ রাইটার্স ওফ মণিপুরগী খূৎতা ঙসি শীন্নরক্লে শেনফমসি অইবশিংগী তেংবাঙ খোঙচৎকী শরুক অমা ওইনা অথুবা মতমদা লানসিনা মরম ওইদুনা অৱা-অনা তারবশিংদা শীন্নরগনি হায়না ফোঙদোরক্লি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু