৭শুবা খুন্দোংবম ব্রোজেন্দ্রো থিএতর ফেস্তিবেল – ২০২৬
ইম্ফাল, জনুৱারী ২১ঃ থাসিগী ১৮ দগী হৌরগা নুমিৎ ৪ নি চুপ্না চত্থরকখিবা থিএতর ফেস্তিবেল অসিগী অরোয়বা প্লে ওইনা ঙসি লাইওইথ্রবা খুন্দোংবম ব্রোজেন্দ্রোনা ইরম্বা 'কৈশুমশঙদা রাধা' হায়রিবা প্লে অসি উৎখিবগা লোয়ননা ৭শুবা খুন্দোংবম ব্রোজেন্দ্রো থিএতর ফেস্তিবেল ২০২৬ কী অরোয়বা ফীজংসু চিংশিনখ্রে।
[ floral tribute to the portrait of the late Khundongbam Brojendro ]
দাঃ এস থানিল্লৈমনা দিজাইন অমদি দিরেক্সন তৌদুনা খেঞ্জোংলাংনা ঙসি পুথোরকখিবা 'কৈশুমশঙদা রাধা' হায়রিবা প্লেসি হন্দক্কী ফেম্ভিবেল অসিদা উৎখ্রিবা প্লেশিং অসিদগী ইতোপ তোপ্পনি। হান্না মমাণ্ডদা উৎখ্রিবা প্লে ৩ অদুনা প্লেরাইত অসিগী লিতরেরি তেক্স অমদি দাইলোগশিং অদুদা ইম্ফেসিস পীরগা পুথোরকপা প্লেশিংনি। অদুগা ঙসি অরোয়বর্গী প্লে অসিনা প্লেরাইত অসিগী লিতরেরি তেক্স অমদি দাইলোগশিং অসিগা লোয়ননা দিজাইন্নচিংবা কয়া শীজিন্নদুনা প্লেসিগী অনৌবা ইন্তরপ্রিতেসন অমা থিরকপনি। প্লেসিদা দিরেক্তর থানিল্লৈমনা সেত অমদি লাইতিং দিজাইন্দা অহেনবা মীৎয়েং থম্লকই। মসিসু অনৌবা মহাও অমনি। প্লেসিগী তোপ-তোপ্পা মশক অমনি। দিরেক্তরনা প্লেসিদা তৌরক্লিবা এতেম্পসি মায়সু পাকখি। য়েংবা নুংঙাই।
খুন্দোংবম ব্রোজেন্দ্রোগী ফেমিলী প্লেসি ইচম চমজরবসু প্লেসিগী নুংদা হংলিবা ৱাহং অমদি চেল্লিবা ঈচেলদু দিরেক্তরনা চিংথোক্তনা হান্নগী কনভেন্সনেল প্লেগী মচৎ অদুদগী সেত অমদি অতৈ ভিজুএল দিজাইনশিং শীজিন্নদুনা প্রেসিগী অনৌবা ইন্তরপ্রিতেসন অমা থিরকপনি। থিএতরদা প্লে অমগী অনৌবা ইন্তরপ্রিতেসন হায়বসি এক্সপরিমেন্তনি। মসিদা ক্রিএতিব দিজাইন কয়া অমসু য়াওরিবনি। মসি হেক্তা অরায়বদি নত্তে। খুদীংমকসি খঙনা দিরেক্তর থানিল্লৈমনা চেকশীন্না মহাক্কী 'কৈশুমশঙদা রাধা' হায়রিবা প্লেসিদা খুৎ থারকই। ঙসিগী অরোয়বা নুমিৎকী প্লেসিসু ফেস্তিবেল অসিগী অমদি প্রেরাইত অসিগী প্লেসিগী অনৌবা মহাও অমনি।
দিরেক্তর দাঃ এস থানিল্লৈমা
ফেম্ভিবেল অসিগী অরোয়বা খুদোল ওইখিবা খেঞ্জোংলাংগী 'কৈশুমশঙদা রাধা' হায়রিবা প্লে অসিদা ওন-স্তেজদা লৈখিবশিংনা মথং শীৎনা ঐচ মঙাল্লৈমা (রাধা), ঐচ জদুমনি (রাজেন), ৱাই চাউয়াইমা (রাধাগী মচানুপা রামেস), এম মহেস (মনি), সি ঐচ সঙ্গীতা (পুলিস অমা), কে লৈশেম্বা (নহা অমা) অমসুং থৌঙম্বা হাওবম (অতোপ্পা নহা অমা) লোয়ননা কোরসতনা ভেলেন্তিনা, এল বেবেসনা, তি ঐচ লনচেনবী, এম লিংজেলথোই, বেমবেম অমদি এল স্তেসিনি।
প্লেসিগী ওফ-স্তেজদা লৈখিবশিংনা এল নিমাই (সেত), রাহুল (লাইত), রিঙ্গো অমদি রোমেন (ম্যুজিক), এস সঙ্গীতা (কোস্ত্যুম), কে ঐচ রতনকুমার (প্রদক্সন মেনেজর) অমসুং ঐচ মঙাল্লৈমা (এসিস্তেন্ত দিরেত্তর) নি।
প্লেরাইত খুন্দোংবম ব্রোজেন্দ্রোগুম্বা মীওই অমা ঐখোয়গী খুন্নাইসিদা পোক্লম্বা লাইবক ফবনি। মহাক্কী প্লেশিং অসিগী মহাও অসি ঐখোয়গী ইরক্তা অদুম নৈশিন্দুনা লৈহনবগী মহুৎতা হেন্না পাকথোক-চাউথোকহন্নবাখুন্দোংবম ব্রোজেন্দ্রো কলচরেল ত্রস্তনা হোৎনরক্লিবা খোঙথাং অসি মায় পাকপা ওইসনু। ঐখোয় অতৈদগী করিসু তাবা নত্তে। অপীকপা ঈশিংদা লৈরুবগী হৌনবা ঐখোয়গী ইতীং অসি ফুদোকপা ঙমদবনি। ফুদোকপা ঙমদ্রিবসি ঙম্নবা হোৎনবা তঙায়ফদে। ত্রস্তনা হোৎনরিবা অসি হেন্না-হেন্না পাকথোক চাউথোকহন্নবা হোৎনবা হায়বসিদা ঐখোয়গী মোরেল সপোর্তসু চঙই।
হৌজিক মনিপুরী প্রোসিনিয়ম থিএতরনা শিথরক্লিবা অসি হিংগৎহনগে, মপাঙ্গল কনখৎহনগে হায়রবদি খ্বাইদগী মরুওইনা অয়েংবশিংদা স্তেজ প্লে য়েংবগী নুংঙাইবা মহাও অদু ফংহনবা তাই। মতমসিগী ক্রেন্দনি, এক্সপরিমেন্ত তৌরিবনি হায়দুনা ঐগী-ঐগী
ইন্তরপ্রিতেসন অমদা প্লেশিং পুথোরক্লবসু মদু ভাবোকশিংদা য়ৌহনবা ঙমদ্রবা অমদি ভাবোকশিংনা খঙদ্রবদি মশানা ভাবোক লৈফম থোক্তে। মসি হৌজিক মণিপুরী প্রোসিনিয়ম থিএতরদা থোক্লি। ঐখোয়না খঙগদবদি ভাবোক হায়বসি পরফোর্মিং আর্ত ফোর্ম অমগীদি থৱায়নি হায়বসিনি। ভাবোক য়াওদ্রবা নৎত্রগা লৈত্রবা পরফোর্মিং আর্ত ফোর্মদু শিরবনি। মরম অদুনা এক্সপরিমেন্ত তৌরবসু থৱায় ওইরিবা ভাবোক হায়বসি লৈহনবা য়াম্নমক তঙায়ফদে।
শিথরক্লিবা মণিপুরী প্রোসিনিয়ম থিএতর অসি হেন্না মপাঙ্গল কনখৎহন্নবা হোৎনবদা খুন্দোংবম ব্রোজেন্দ্রোগী প্লেশিং অসিসু নৌনা হিংগৎহনবা মথৌ তারক্লি। মহাক্কী প্লেশিং অসি নৈনবা মথৌ তারক্লি।
সোর্স : পোক্নফম
0 কমেন্ট:
কমেন্ট তৌবিয়ু