২০২৬ গী বিধানসভাদা মীতৈ মীহুৎ অমা থাগৎসি-দিল্লী মীতৈ পিপলস কনভেনশনদা ৱারেপ
আগরতলা, জুন ১৯ : মালেমগী তোঙান তোঙানবা মফম কয়াদা চোইজাইননা তারিবা মীতৈ শিংগী আইডেন্টিটি নচিংবা ইস্যু কয়াদা নৈনদুনা কনভেনশন অমা হন্দক্তা সাউথ দিল্লীদা পাঙথোকখ্রে। চৎখিবা জুন ১৫, দিল্লীদা মীতৈ কো-অর্ডিনেটিং কমিটিনা শীন্দুনা পাঙথোকখিবা মীতৈ পিপলস কনভেনশন অদুদা মণিপুর, আসাম, দিল্লী নচিংবা মফমদগী শক্নাইরবা মীওই কয়া শরুক য়াখি। কনভেনশনদা লেপ্নখিবা ৱারেপ ডিক্লারেশন ১০ গী মনুঙদা মীতৈ ঐখোয় পুল্লসি, চোইজাইননা তারিবা মীতৈ ঐখৈায় অমগা অমগা মতেং পাংমিন্নদুনা থবক তৌমিন্নরসি। চাদা মীশীং ০.৫ খক্তা লৈবা ত্রিপুরাগী মীতৈশিংনা ইং ১৯৬৯ দা এস. টিগী দাবী তৌদুনা খোঙজং চত্থবা হৌখিবগী ৱাফমসু ডিক্লারেশন অদুদা পল্লি। কনভেনশন অদুদা লৌখিবা অতৈ অতৈ ৱারেপশিংগী মনুংদা মীতৈ খুন্নাইদা থকসি-খাসি, য়ুম্বালোন ঙাক্না চৎপা, নুপী অনী লোইবা থিংবা অমসুং আসাম বিধানসভাদা মীতৈ এম. এল. এ অমা কাহনবা অসিনচিংবা ৱারেপশিং লৌখি।
কনভেনশন অদুগী অহানবগী সেসন্দা কো-অর্ডিনেটিং কমিটিগী প্রেসিডেন্ট ড. সেরাম রোজেশনা থৌরম মপু ওইরগা গেষ্ট অব ওনার ওইনা আসামদগী শক্নাইরবা সোসেল এক্টিভিষ্ট ড. মাইমোম শান্তিকুমার, মণিপুরদগী শক্নাইরবা এ্যক্টর, সিংগার হামোম সদানন্দ নচিংবা শরুক য়াখি।
নুংথিলগী সেসন্দা মীতৈ য়ূম্ফম চেরিটেবল ট্রাষ্টকী প্রেসিডেন্ট হিজম রাজেননা থৌরম মপু ওইরগা জে. এন. ইউগী প্রোঃ আর. কে ব্রজেন সিংহনা গেষ্ট অব অনার ওইখি। কনভেনশন্দা আসামগী মণিপুরীশিংনা থেংনরিবা ৱাফম কয়াগী মতাংদসু নৈনখি। থৌরমগী অথোইবা মীথুং ওইনা শরুক য়াখিবা সোসেল এক্টিভিষ্ট ড. এম শান্তিকুমার সিংহনা হায়খি, ঐখোয়গী হৌরকফম মণিপুরবু কন্দবা য়াদে। মণিপুর লৈত্রবদি মালেম গী অতোপ্পা মফমদা চোইজাইননা তারিবা মীতৈশিংগী আইডেন্টিটিসু অতৈ লৈররোই। ইতিহাসকী অদুঙৈ মতম চহী তরেৎ খুন্তাকলুরবা মতুং মণিপুরগী ফম্বাল হঞ্জিলহন্নবা হোৎনবদা আসাম কাছাড়গী মীতৈশিংনা লৌখিবা থৌদাং কয়াগী ৱাফম প।ল্লদুনা মহাক্না মখাতানা হায়খি, ঙসিসু মণিপুর অৱাবগী ফীভমদা লৈরি। মণিপুরবু কন্নবা হোৎনবদা ঙসিদি আসামতা নত্তনা মারেমগী অতৈ মফম কয়াদা তারিবা মীতৈশিংগী থৌদাংসু য়াম্না চাওনা লৈরিবনি। অদুবু আসামদা লৈবা মীতৈ কাঙলুপশিং ঙসিদি হিরম খুদিংদা শোত্থদুনা ডিপ্রাইভ ওইদুনা লৈরি।
আসাম বিধানসভাদা মীতৈ অমত্তা য়াওরক্তবনা চহী য়াংকৈ চুপ্না ঐখোয়গী ফংফম থোকপা হক কয়া ফংদনা লৈরিবনি। বিধানসভাদা ঐখোয়গী মীহুৎ লৈতবনা ঐখোয়গী ৱা তাবিদ্রে। লাক্লিবা ইং ২০২৬ আসাম বিধানসভা মীখলদা মীতৈ অমা এম. এল. এ ওইনা থাগৎনবা হোৎনবদা মহাক্না দিল্লী কো অর্ডিনেটিং কমিটিনসু মতেং পাংবীয়ূ হায়বা ৱাফমসু পনখি। পনবা য়াবদি আসাম বিধানসভাদা নোংথোম্বম বিদ্যাপতি, লাইশ্রম মেরা চাউবা মথংদা ইং ১৯৭২ দা কংগ্রেসকী ৱাংখেম শুভঙ্কর সিংহগী মতুং চহী ৪৬ মনুংসিদা ঙসি ফাওবা মৈতৈ মচা অমত্তা এম. এল. এ ওইনা কারকপা ঙমদ্রি।
কনভেনশন অদুদা লেপ্নখিবা ৱারেপ শিংগী মনুংদা মথং চহী ২০২৬ দা আসাম বিধানসভাদা মীতৈ এম. এল. এ অমা কাহন্নবা, ত্রিপুরা, বাংলাদেশ অমসুং আসামগী মীতৈশিংগী য়াইফা থৌরম কয়া পায়খৎপা হায়বা কোঅর্ডিনেটিং কনভেনর শেরাম রোজেশ না ফোঙদোকখি। থৌরমদা মরু ওইনা হিজম রাজেন, অতৈ মীওই কয়াসু ৱা ঙাংখি হায়রি।
সোর্স: মরূপ
0 কমেন্ট:
কমেন্ট তৌবিয়ু