হোজাইগী খোঙ্গুল লিবা লাকখিবা ইমাশিং কাদানা তরাম্না ওকখ্রে
ইম্ফাল, ফেব্রুয়ারি ২২ : হৌরকফম থিবা, হৌরকফম খোঙ্গুল লিবগী পান্দমদা আসামগী হোজাই দিষ্ট্রিক্টতগী নুমিৎ ৫নিগী খোঙচৎতা ইম্ফালদা থুংলখিবা ইমা ১৪ অমদি নুপা অনিনা শাবা খোঙবু ঙসি কোলিজন এগেনষ্ট দ্রাগস্ এন্দ অলকহোল (কাদা), হেড ওফিস, পুরৈরোম্বা খোংনাং মখোং, কোনুং মমাং, ইম্ফাল ইষ্টতা তরাম্না ওকখ্রে হায়রি।
অপুনবা মৈরা পায়বী লুপ, হোজাই দিষ্ট্রিক্টকী প্রেসিদেন্ট ইমা ব্রহ্মচারিময়ুম পদ্মাবতি শর্ম্মানা লুচিংবা খোঙবু অদু কাদা, হেড ওফিসকী প্রেসিদেন্ট হিজম প্রিয়োকুমার না লুচিংবা কাংবুনা তরাম্না ওকখি। থৌরমদুদা ইমা য়ুম্লেম্বম মেমা, প্রেসিদেন্ট, নোংপোক লৈঙাক অপুনবা নুপী লুপ, ইমা ঙাংখম প্রভাবতি, সেক্রেটারি জেনারেল, অপুনবা মণিপুর কনবা ইমা লুপ (অমকিল) সু শরুক য়াখি।
হোজাইদগী লাকখিবা ইমাশিংনা কাদানা ঙসি ঐখোয়বু তরাম্না ওকপীবা অসি য়াম্না নুংঙাইবা পোকই। নিশা থিংবগী খোঙজং অসি মমাংঙৈদগী হৌনা ইমাশিংনা নিশা বন্দ/মৈরা পায়বীগী খোঙজং চঙশিন্দুনা লাক্লি। মসিদা মরু ওইনা নুপাশিং য়াওশিন্দুনা কদানা মণিপুরদা নিশাগী অকনবা খোঙজং চঙশিনবসি য়াম্না থাগৎলি। হোজাই দিষ্ট্রিক্টতসু হৌগৎলক্রিবা নহারোলশিং নিশাগী ঈপাক্তা তাওবা হৌরক্লে। মসিদা কাদানা মীৎয়েং চঙবীদুনা মফম অদোমদসু ব্রাঞ্জ কুম্বা অমা হাংদোক্তুনা নিশা থিংনিংই হায়বা ৱাফমশিং ফোঙদোক্লমখি।
হিজম প্রিয়োকুমার, প্রেসিদেন্ট, কাদানা হায়, ঈগী হৌরকফম থিবা লাক্লিবা ইমাশিং কাদানা তরাম্না ওকপগী তাঞ্জা ফংবসি য়াম্না নুংঙাই। নিশাগী অকনবা শাফুনা মণিপুর খুনাই অসি মরু ফংনা মুথৎখিবা য়াবগী অকিবা লৈরে। মণিপুর খক্তা নত্তনা মপান লমদা তারিবা মণিপুরীশিং নিশাগী ঈপাক্তা তাওরকপা অসি য়াম্না অকিবা তাঙ্কক অমনি। ঐখোয় মশেল পুনশিন্দুনা অমত্তা ওইনা থেংনহৌদ্রগদি ঐখোয়গী মীরোল অসি মুৎখিবা য়াই। হোজইগী ইমাশিংনা ঐখোয়গী মীরোলগীদমক হোৎনবা য়াবা হোৎনবীয়ু হায়না ফোঙদোকখি।
সোর্স: পোক্নফম
0 কমেন্ট:
কমেন্ট তৌবিয়ু