মীলাল অমসুং ৱামানা শীন্দুনা মালেমগী মমালোল নুমিৎকী থৌরম পাঙথোকখ্রে
ইমা লোলগীদমক হিংগদবনি: মোইরাংথেম নাওখম্বা
ইম্ফাল, ফেব্রুয়ারি ২১ : ইমা লোল চাওখৎহন্নবা হোৎনবা হায়বসি ঐখোয় খুদিমক্কী থৌদাংনি। ইমা লোলগীদমক ঐখোয় খুদিংমক্না হিংগদবনি অমদি মুৎশিল্লক্লবা ইমা লোলবু অমুক হন্না হিঙ্গৎহনবদা খুদিংমক্না থৌদাং লৌমীন্নসি হায়না ৱামাগী প্রেসিডেন্ট মোইরাংথেম নাওখম্বা মীতৈনা ফোঙদোরক্লি।
মিলাল অমসুং ৱামা অনিনা খুৎশম্নদুনা ঙসি মেজোর খুলদা লৈবা মণিপুর প্রেস ক্লাবতা পাঙথোকখিবা মালেমগী মমা লোলগী নুমিৎ থৌরমগা মরী লৈননা নাওখম্বা মীতৈনা ৱাফম অসি ফোঙদোকখিবগা লোয়ননা মখা তানা হায়, মালেমগী মফম খরদা মমা লোল ঙাংবা ঙমদবা মীওই কয়া লৈতবা নত্তে। লমদমসিগী ওইনসু ঐখোয়গী লোল অসিবু ময়েক শেংনা ঙাংবা ঙমদবা কয়া লৈরি। অতোপ্পা লোলশিং মরু ওইনা ইংলিশতা থৱাই য়াওশিন্নখিবনা মরম ওইরগা মমা লোলবু কাউশিল্লকপগী অচৌবা মরম অমা ওইরক্লি। মরম অদুনা ঐখোয় খুদিংমক্না ইমা লোলবু য়োকখৎনবা হোৎনগদবনি।
ঐখোয়গী ইমা লোল য়োকখৎপা হায়বসি ঐখোয়গী থৌদাংনি। অতোপ্পা মীওইশিংনা ঐখোয়গী ইমা লোল য়োকখৎলকলগদবা নত্তে। মরম অদুনা হিরম অসিগী মতাংদা ঐখোয়না অহেনবা মীৎয়েং চঙবগী তঙাইফদবা লৈ হায়খি।
মিলালগী প্রেসিদেন্ট খাইদেম ইঙোচা, ৱামাগী প্রেসিডেন্ট মোইরাংথেম নাওখম্বা মীতৈ, মীলালগী এদভাইজর এদভোকেট প্রেমকুমার, শাদোকপম তোম্বা সনা কোনুং উত্রা শঙলেনগী মাইচৌ পুরেল প্রোফেসর এন জি কাংজিয়া মঙাং, লিপুনগী প্রেসিডেন্দ থোকচোম সোমরেন্দ্র অমদি মিলালগী পাউতাকলোই মোইরাংথেম নাওদালেনখোম্বনা মরু ওইবা মীওইশিং ওইনা শরুক য়াদুনা পাঙথোকখিবা ঙসিগী থৌরম অদুগী নুংগী ওইবা ৱারোল পীরদুনা মিলালগী সেক্রেটারি জেনারেল এন নোংমাইলেম্বীন হায়, ইরোল-ইয়েক হায়বসি ফুরুপ অমগী মশক তাকপদা য়াম্না মরু ওইবা মচাক অমনি। ইরোল-ইয়েক চাওখৎলিবমখৈ ফুরুপ অদুগী শক্তম হেন্না ইনাকখুল্লি হায়নরিবনি।
মালেমগী ওইনা লোল লিশিং তরেৎলোম লৈরিবা অসিগী মনুঙদা চাদ ৪৩ দি মাংশিল্লক্লবা লোল ওইরে হায়না য়ুনেস্কোগী রিপোর্টতা পল্লি। অসিগুম্বা ফিবম অসিদা মালেমগী ওইনা ফুরুপ মচা-মচাশিং অসিগী লোলশিং য়োকখত্তুনা মখোয়গী শক্তম ঙাক্না থমজবা ঙম্নবগী পান্দমদা হৌখিবা কুমজা ১৯৯৯ দা য়ুনেস্কোনা মারেমগী মমা লোলগী নুমিৎ অসি পাঙথোক্নবা লাউথোকখিবনি।
মহাক্না মখা তানা ফোঙদোকখিবদা, হৌজিক হৌজিক মহয় তম্লিবা মহৈরোয়শিং খক্তা নত্তনা লাইরিক তম্বা লোইরবা, অচৌবা শিনফম পায়দুনা লৈরিবা ঈরৈচাশিংনসু ঐখোয়গী ইরোল ঙাংবগী মহুত্তা ইংলিস নৎত্রগা হিন্দিনচিংবা অচৌবা ফুরুপকী লোলশিং শীজিন্নবনা হেন্না লেমজবগী মওং অমদা লৌনরি। অসিগুম্বা চৎনবী অসিনুস ঐখোয়গী ইরোন অসিবু শিথহন্নবগী অচৌবা মচাক অমা ওইরক্লি। গ্লোবেলাইজেসনগী অচৌবা শাফু মরক অসিদা ইশাগী ইরোন অসি য়োকখৎচনবগীদমক ইশা-ইশানা ইশাগী ইরোন শীজিন্নবদা চাওথোকচবগী ইহুল অমা চেনমীন্নবা মথৌ তাই হায়খি।
ঙসিগী থৌরম অসি ককচীং অমসুং থৌবাল দিস্ট্রিক্টকী মফম কয়াদসু পাঙথোকখি। সাহিত্য সেবা সম্মিটি, ককচীংনা শিন্দুনা নুমিৎ অসিগী থৌরম ককচীং শুমাং লৈকায় লৈরক অচৌবা পরেংদা লৈবা সালাম চন্দ্রাবলি অমসুং সলাম সুবোল অনীগী শুমাংদা পাঙথোকখি।
অমরোমদা ৱাই কে কোলেজ, ৱাংজিংগী ইন্টারনেল ক্বালিটি এসুরেন্স সেলনা রিসার্স কম্মিটি অমসুং মণিপুরী দিপার্টমেন্টকা খূৎশম্নদুনা ‘মণিপুরী লেংগুয়েজ; এসপেক্ট ওফ হিষ্ট্রি, পোলিসি, এদ্যুকেসন এন্দ ত্রাইবেল লেঙ্গুয়েজ’ হায়বগী পান্দমদা মঙাশুবা নেসনেল সেমিনার ওইনা পাঙথোকখি।
ৱাইখোম মনি গার্লস কোলেজদসু ঙসিগী থৌরম অসিগী ‘মাল্টি লিঙ্গুয়েল এদ্যুকেসন: এ নেসেসিটি টু ত্রান্সফোর্ম এদ্যুকেসন’ হায়বা থিমদা পাঙথোকখি। ৱাংজিংগী খোরিরোল শন্দোক লূপনসু মসিগী শঙলেন্দা নুমিৎ অসিগী থৌরম পাঙথোকখি।
থৌরম অসি মণিপুরী সাহিত্য পরিষদ, থৌবাল দিষ্ট্রিক্ট ব্রাঞ্চ অমসুং নিংঙোল খুৎ মণিপুরনা পূন্না খুৎশম্নদুনা শিনবনি। ঙসিগী থৌরম অসিগা মরী লৈননা মহৈরোয়শিংগী লূপ তরুক্না লৌখিবা ৱারেপশিংনা য়ুপিএসসী এগজামিনসেনদা মণিপুরী পেপারবু মীতৈ ময়েক্না থাবা য়াদবা হায়বসি লৈঙাক্না থৌশাদবগীনি হায়বগা লোয়ননা থৌওং অসি য়ুপিএস সীগী এগজামিনসেনশিং থাগদবশিংগী হক মৎপনি হায়রদুনা অথুবদা লৈঙাক্কী মায়কৈদগী য়ু পি এস সীগী এগজামিনেসনগী মণিপুরী ওপশনেল পেপার অসি মীতৈ ময়েক্না থাবা য়াহনবীনবা তকশিনবা, মণিপুরগী ষ্টেট লেঙ্গুয়েজ পোলিসি শেম্বগা লোয়ননা ষ্টেট লেঙ্গুয়েজ কম্মিশন লৈহন্নবা অমুক্কসু তকশিনবা, হায়ার এদুকেসনদা তম্নরিবা মণিপুরী পেপারগী রিফরেন্স বুকশিং মীতৈ ময়েক্তা ফংহন্নবা অখন্নবা ত্রান্সলিটরেসন কম্মিটি শেমদুনা ফংহনবীনবা তকশিনবা অমসুং ইমালোলদা মহৈ তমহন্নবা লৈঙাক্না হৌজিক ফাওবা হোৎনদবা থৌওং অসি মহৈরোয় লুপ তরুক্না পেন্দে হায়বগা লোয়ননা অথুবা মতমদা ইমালোলদা মহৈ তমহনবা হৌহন্নবা খোঙথাং পায়খৎপীয়ু হায়না মখা তানা তকশিনবা হায়বনচিংবা ৱারেপ ৪ লৌখি।
সোর্স: হুইয়েন লানপাউ।
0 কমেন্ট:
কমেন্ট তৌবিয়ু