সিঙ্গেরবোন্দা চহী তরেৎ খুন্তাকপা নিংশিং থৌরম পাঙথোকখ্রে
ইম্ফাল, জানুয়ারি ৯ : ওল আসাম মণিপুরী মুসলিম ষ্টুদেন্ট য়ুনিয়ন (এ.এ.এম.এম.এস.য়ু.)না শীন্দুনা ঙসি মহারাজ গম্ভীর সিংহনা লৈখিদবা নুমিৎকা মরী লৈননা চহী তরেৎ খুন্তাকপা নিংশিং থৌরম কাছার ডিষ্ট্রিক্টকী সিঙ্গেরবোন্দা পাঙথোকখ্রে।
সিঙ্গেরবোন্দ ধোলুগ্রামদা লৈবা রোয়েল পাব্লিক হায়ার সেকেন্দারি স্কুলদা পাঙথোকখিবা থৌরম অদুদা লিলোং হাওরৈবী কলেজগী প্রিন্সিপাল ডাক্তার রহৈজউদ্দিন শৈখনা চীফ গেষ্ট, ওল আসাম মণিপুর মুসলিম ষ্টুদেন্টস য়ুনিয়নগী জেনারেল সেক্রেটারি আব্দুল হাবিব চৌধুরীনা থৌরম মপু, নোর্থ ইষ্ট পাঙল এসোসিয়েসন (নেপা) আসাম য়ুনিটকী বাসির আহমদ, মণিপুরী মুসলিম সিটিজেন ফোরাম (এমএমসিএফ) কী ভাইস চিয়ারমেন জিয়াউল ইসলাম চৌধুরিনা গেষ্ট ওফ ওনারশিং ওইনা শরুক য়াখি।
চীফ গেষ্টকী ৱারোল পীরদুনা ডাক্তর রহৈজুদিননা হায়, ইনিংথৌ খাগেম্বগী সনা হাক্তক্তা ১৬০৬ তা মণিপুরদা খুন্দাবা হৌখিবা পাঙলশিং অসি মৈতৈশিংগা লোয়ননা চহী ৭ খুন্তাকপগী মতম ইং ১৮১৯ দগী ১৮২৬ ফাওবদা মণিপুর থাদোক্তুনা কাছার লৈবাক্তা চেল্লকখি। ইনিংথৌ গম্ভীর সিংহনা মশাগী লান্মী ৫০০ লিংখৎতুনা থৌনা ফনা অৱাশিংগা লান্থেংনখি। অৱাগী মীওৎ মীনৈগী মণিপুরীশিং নিংখা তম্বা অমুক ফংহনখি। লান লোইরবা মতুংদা মৈতৈ অমদি পাঙলশিং অদু খরনা অমুক মণিপুরদা হল্লকখি। খরনা কাছার, ত্রিপুরা, বাংলাদেশনচিংবদা খুন্দাদুনা হৌজিক লৈরিবা অসিনি। ইনখৎলক্লিবা নহারোলশিং ঐখোয়গী পারি পুরিগী খোঙ্গুল লিদুনা লমদম তাম্না লৈনখ্রবসু থম্মোয়দদি নক্না লৈনবা ৱাফম ফোঙদোকখি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু