শ্যাম শর্ম্মাদা ‘গোল্ডন বিভর এৱার্দ’ পীদুনা ইকায়খুম্নখ্রে
ইম্ফাল, ওক্তোবর ১৪: অলবর্তাগী ৱীন্সপিয়র সেন্তর, ইদমোন্তনদা পাঙথোকখিবা ইন্দিয়ান ফিল্ম ফেস্তিবেল ওব অলবর্তা (আই এফ এফ এ), ২০২৫ দা লমদমসিগী শক্নায়রবা ফিল্ম মেকর অরিবম শ্যাম শর্ম্মাদা ‘গোল্ডন বিভর এৱার্দ’ পীদুনা ইকায়খুম্নখ্রে।
মমাঙ থা সেপ্তেম্বর ২৮ দা পাঙথোকখিবা ফেস্তিবেল অদুদা তামিল ফিল্মগী শক্নায়রবা এক্তর/ দিরেক্তর কমল হাসন্না অরিবম শ্যাম শর্ম্মানা ইন্দিয়ান সিনেমাদা পীরিবা খূদোল অদুগীদমক ইকায় খুম্নবা উৎতুনা মহাক্কী মহুৎ শীন্দুনা লাকখিবা মীওই অদুদা এৱার্দ অদু খূৎশিন্নখি।
‘গোল্তন বিভর এৱার্দ’ হায়রিবা এৱার্দ অসি চহী অসিদা হৌদোকপগা লোয়ননা ইন্দিয়ান সিনেমাবু হেন্না থাক ৱাংবা ফীবমদা চিংখৎনবা হোৎনবা অচৌবা থৌদাং লৌরম্বা ইন্দিয়ান ফিল্ম মেকরশিং দা লান্থোকপা এৱার্দনি। চহী অসিগী ওইনা পাঙথোক্লিবা আই এফ এফ এ, ২০২৫ অসি ভারতকী অৱাং নোংপোক্কী স্তেতশিংগী ফিল্মশিংদা অখন্নবা মীৎয়েং থম্বনি। লোয়ননা লমদম অসিগী ফজরবা আর্তিস্তিক অমসুং কলচরেল লিগেসি অদু মালেমগী মীয়ামদা খঙহন্নবা হোৎনবনি।
এৱার্দ অসি খূৎশিন্নবগা লোয়ননা আই এফ এফ এগী ইকজিক্যুতিব দিরেক্তর মধন সেলভারাজনা অরিবম শ্যাম শর্ম্মাদা পীবা পাউজেলদা হায়, শক্নায়রবা ফিল্ম মেকর অসিনা অৱাং নোংপোক্কী ৱারী শিংবুল অমসুং কলচরেল আইদেন্তিতিবু হেন্না পাকথোক-চাউথোক্না ভাবকশিংদা উহন্নবা হোৎনবাদা লৌখিবা থৌদাং অদুবু শকখঙদুনা এৱার্দ অসি পীবনি। ‘নহাক্কী ফিল্ম অসিনা ভারতকী সিনেমাগী লোন পাঙথোক-চাওথোকহনবদা নত্তনা লমদম অসিগী অমসুং মীয়ামগী খোল্লাও অদুবুসু ফোঙদোকই। মসিনা তুংদা লাক্কদবা ফিল্ম মেকরশিংগী মীরোলদা অচৌবা ইথিল অমা পীরি’ হায়খি।
মশা ঙমদবদগী ফেস্তিবেল অসিদা হকথেংননা শরুক য়াবা ঙমদ্রবসু এৱার্দ অসিবু লৌশিল্লদুনা অরিবম শ্যাম শর্ম্মানসু থাগৎপা অমদি ফেস্তিবেল অসি মায়পাক্না পাঙথোক্নবগীদমক য়াইফ-পাউজেল পীখি। এৱার্দ অসি অরিবম শ্যাম শর্ম্মাগী মহুৎ শীন্দুনা ফিল্ম হিস্তরিয়ান অমসুং ফিল্ম মেকর পার্থজিৎ বরুৱানা লৌখি। এৱার্দ খূৎশিন্নবগী থৌরম অদুদা ভেনকোভরদা কন্সুল জেনরেল ওব ইন্দিয়া ওইনা লৈরিবা মাসকুই রুং সুংশু শরুক য়াখি।
পনবা য়াবদি, অরিবম শ্যাম শর্ম্মাগী ফিল্ম ‘ইমাগী নিংথেম’ অমসুং ‘ইশানৌ’ না মণিপুরী সিনেমাবু মালেমগী সিনেমাগী ফম্বাক্তা পুথোক্তুনা লমদমসিবু শকখঙহনবা হৌহনখিবনি। মহাক্কী ফিল্মশিং অসিনা অৱাং নোংপোক ভারতকী কলচর অমদি খুন্নাইসিগী লৈরিবা ফজরোলশিং অদু মালেমগী সিনেমাগী ভাবোকশিংদা অঙকপা অমগা লোয়ননা উহনবা ঙম্বদা নৎতনা মণিপুরী সিনেমাগী মশক অদু ঊৎপা ঙমখি।
ইন্দিয়ান ফিল্ম ফেস্তিবেল ওব অলবর্তা অসি ইং ২০১৫ দগী হৌখিবনি। ফেস্তিবেল অসি ইন্দিয়া, কানাদা অমদি অতৈ লৈবাকশিংগী ইন্দিপেন্দেন্ত ফিল্ম মেকরশিং গী মশক নাইবা প্লেতফোর্ম অমা ওইরক্লি। চহী অসিগী থিম ওইরিবা ‘স্পোতলাইত ওন নোর্থ ইস্ত ইন্দিয়া’ হায়বা অসি অৱাং নোংপোক ভারতকী আইকোন, আর্তিস্ত অমসুং স্তোরিতেল্লরশিংদা ইকায়খুম্নবা ঊৎপনি।
সোর্স: পোক্নফম
0 কমেন্ট:
কমেন্ট তৌবিয়ু