• 21
• ১৮ই অক্টোবর ২০২৫ ইং
• Share on:

ফেস্তিবেল ওব নেরেতিব আর্ত হৌখ্রে

                                           শুমাঙ লীলা অসি মীয়ামদা এদজুকেসন পীবা প্লেতফোর্ম অমনিঃ হেমন্ত

ইম্ফাল, ওক্তোবর ১৬ঃ মণিপুর স্তেত শুমাঙলীলা কাউন্সিলনা শীন্দুনা নুমিৎ নীনি চুপ্না চখগদবা ফেস্তিবেল ওব নেরেতিব আর্ত ঙসিদগী ইবোয়াইমা শুমাঙ লীলা শঙলেন্দা হৌদোকখে।
ফেস্তিবেল অদু হৌদোকপগী থৌরমদা আর্ত এন্দ কলচরগী রিতয়ার্দ কমিস্নার কে রাধাকুমার সিংহনা চীফ গেস্ত, মণিপুর স্তেত শুমাঙ লীলা কাউন্সিলগী প্রসিদেন্ত এল তোম্বা মীতৈনা প্রসিদেন্ত অমসুং রূপমহল থিএতরগী দিরেক্তর এল ব্রজমোহোননা গেস্ত ওব ওনর ওইখি।
মণিপুর স্তেত শুমাঙ লীলা কাউন্সিলগী লাইফতাইম জেনরেল সেক্রেতরি অমসুং সেনিয়ার এত্তর-দিরেক্তর শৌগ্রাকপম হেমন্তনা হায়, তুংদা হৌরক্কদৌরিবা নহাশিংদা য়েংহন্নবগীদমক, খঙহন্নবগীদমক নেরেতিব আর্ত ফেস্তিবেল হৌদোক্নবগী ৱাফম অসি লৈখিদ্রবা ওজা ৱারেপ্পা নবনা তাকপীরম্বদগী ২০০৭তগী হৌদুনা ঙসি ফাওবা লেপ্তনা পাঙথোক্লি। মণিপুরগী তোঙান তোঙানবা মফমশিংদসু চৎলগা পাঙথোক্নবসু লৈরে। ঙসিদি ওজা অসি লৈখিদ্রে অদুবু মহাক্না পামজরম্বা নেরেতিব আর্ত অসি মুৎখিদনবা অমদি কন্নবগী ৱাখল্লোন্দা অসিগুম্বা ৱাকশোপ অসি কাউন্সিল অসিনা চহী খুদীংগী পাঙথোকপা থৌরমশিংগী মনুংদা অমা ওইনা পাঙথোকপনি।
কলচর হায়বসি পাবা খক্তনা য়ারোই, উৎপা, য়েংহনবা অমা চঙই। শুমাঙ লীলা হায়বসি মীয়ামদা এদজুকেসন পীবা প্লেতফোর্ম অমনি। মসিদা পীরিবা মেসেজ অমদি পাউজেলশিং অসি লাইরিক্তগী লৌথোক্তবা য়াদবা য়াওই। মসিদা শীজিন্নরিবা দাইলোগশিং, ৱাহৈগী অনেম-অৱাং শিং লাইরিক থীবদগী লৌবসু য়াওরি। ঈশৈ অমত্তং নুংঙাইনবা হোৎনবদা খুল্লং ঈশৈ, খুবাক ঈশৈনচিংবদগী হাপ্পা য়াওরিবনি। ত্রেদিসনেল আর্ত ফোর্মশিং অসিদগী ইলিমেন্তশিং অসি লৌরগা লীলাদা শীজিন্নগদবনি হায়বসি ওজা নবনা তাকপীরম্বনি। মসিবু ঐখোয় খুদীংনা ইন্দুনা ঙসিগী ফেস্তিবেল অসি পাঙথোকপনি। শুমাঙ লীলা অসি মীয়ামদা এদজুকেসন পীবা অমসুং মপাঙ্গল কনবা আর্ত ফোর্ম অমনি হায়না হেমন্তনা ফোঙদোকখি।
সোর্স : পোক্নফম