আপডেট:
image

শক্নাইরবী এম কে বিনোদিনিগী মীতম অমা খিনবা চুমগনি: অরিবম শ্যাম

ইম্ফাল, নভেম্বর ২০ : লৈমারোল খোর্জৈকোল (লৈকোল) না শীন্দুনা চহী অমা চূপ্না চত্থরকপা লৈখিদ্রবী মহারাজ কুমারি বিনোদিনিগী চহী ১০০ শুবা মপোক কুমওন থৌরম চৎলিবা থা অসিগী ওইনা মুতুম রমনিনা স্পোন্সর তৌদুনা য়াইস্কুল পুলিশ লেনদা লৈবা মণিপুর দ্রামাটিক য়ুনিয়ন (এম দি য়ু) গী হোলদা পাঙথোকখ্রে। ঙসি পাঙথোকখিবা থৌরমগী মনুং চন্না লৈখিদ্রবী এম কে বিনোদিনিগী মফমদা শরুক য়ারখিবা পূম্নমক্না হৈকৎ লৈকৎ তমদুনা ইকায়খুম্নবা উৎখিবগা লোয়ননা লৈকোলগী মেম্বারশিং য়াওনা লৈখিদ্রবীনা ইরম্বা ঈশৈ কয়া শক্তুনা মীয়ামদা তাহনখি।

থৌরম অসিগী অথোইবা মীথুংলেন ওইখিবা মণিপুরগী শক্নাইরবা ফিল্ম মেকার পদ্মশ্রী অরিবম শ্যামনা ফোঙদোকখিবদা এম কে বিনোদিনিদি ঈশৈদা, দ্রামাদা, ফিল্মদা অমদি জগোয়গা নক্নরম্বা অমসুং অইবী অমসুনি। মহাক্না তৌরম্বা থবকশিং অদুনা ঙসি ঐখোয়না মহাকপু নীংশিংলিবনি। মহাক্কীদমক্তা লৈকোলনসু থৌরম অসি চহী অমা চূপ্না পাঙথোরকপদা নুংঙাইবা পোকই হায়খি। লোয়ননা মহাক্কী নীংশিং খুদম অমদি থমহন্নীংই। খুদুম অসি লাইব্রেরি/ মিউজিয়াম নৎত্রগনা মীতম খক্তা ওইরবসু থমহন্নীংই হায়না ফোঙদোকখি।

থৌরম অসিদা অখন্নবা মীথুং ওইখিবী শক্নাইরবী শৈশকপী অয়েকপম নিংঙোল চোংথাম ওংবী কমলানা ফোঙদোকখিবদা লৈকোলগা এম কে বিনোদিনিগা লৈনবা মরী অসি অমরোমদদি অতেনবা মতম ওইরি। অদুবু মহাক্কী পুন্সিদদি এম কে বিনোদিনিগী অহলশিং, নেতা ইরাবতনা লৌরিবা সানা ইবেম্মনচিংবদা য়াম্না অঙাং ওইরিঙৈদগী খঙজরক্লবা অমদি অঙাং অমা ওইনা নুংশিনা মখা থাবা ওইনা লোয়নবীরকপা কয়াদুগা ইরোয়ননা তোৎন-তিন্নজরকপা কয়াদু নৌহৌনা নীংশিংলকই হায়খি।

থৌরম মপু ওইখিবা লৈকোলগী প্রেসিদেন্ট ক্ষেত্রিময়ূম সুবদনিনা ফোঙদোকখিবদা লৈকোলগী ওইনা য়োৎশবী মখোঙ অহুমনি হায়না লৌজরিবশিংদি থোইবী দেবী, এম কে বিনোদিনি অমসুং খাইদেম প্রমোদিনিনি। মখোয় অহুম্মক লৈকোলগা থাদোক্নবা য়াদ্রবনি। মরম অসিনা এম কে বিনোদিনিগী চহী ১০০ শুরকপগী মপোক কুমওন থৌরম অসি চহী অমা চূপ্না পাঙথোকচরকপনি হায়খি।

হৌজিক লুরিবসি লৈকোলগী ওইবা লম লৈজদবা মরম্না মীতম খিন্নবা মফম লৈজদ্রি। অদুবু লৈকোলগী ওইনা খঞ্জবদি লমবু লৈরগদি মীঙোন্দগী খায়রুদ্রগসু লৈকোলগী মেম্বারশিংনা পুথোক্নরগা শক্নাইরবী অইবী অসিগী মীতম খিনবা য়াই। লোয়ননা লৈকোলগী মায়কৈদগীসু হোৎনবদি লেপখিরোই হায়খি।

সোর্স: হুইয়েন লানপাউ       

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু