লোল তরেৎ তম্বী তাকপীনবা থা অনী মণিপুরদা ল্যাঙ্গুয়েজ ট্রেনিং প্রোগ্রাম
আগরতলা, দিসেম্বর ১০: মৈতৈ লোল খক্তা নত্তনা অতৈ লোলসু খঙদোকসি তমথোকসি হায়বগী পান্দমদা মণিপুরদা ঙাংনরিবা শক্নারিবা লোল ৩৪গী মনুংদা খনগৎলবা লোল তরেৎ তম্বী তাকপীনবা ট্রেনিং অমা চত্থবা হৌখ্রে। হায়রিবা ট্রেনিংদা শরুক য়ারিবা মহৈরোই ২৮০ না তম্লিবা লোলশিং অদুদি তাঙ্খুল, পাওমাই, পাইতে, অনাল, রোংমৈ, থাদৌ অমসুং মৈতৈ লোলনি।
মণিপুর লৈঙাক্কী ডিরেক্টররেট অব ল্যাঙ্গুয়েজ প্লানিং এন্ড ইমপ্লিমেন্টেশননা শীন্দুনা ‘লোকেল লেঙ্গুয়েজ ট্রেনিং প্রোগ্রাম অব সেভেনথ’ হায়দুনা থা অনী চুপ্পা ট্রেনিং প্রোগ্রাম অসি চৎখিবা ডিসেম্বর তাং ২দা মুখ্যমন্ত্রী এন বীরেননা হৌদোকপীখি। ট্রেনিং প্রোগ্রামসি হৌদোকপীদুনা মুখ্যমন্ত্রী এন বীরেননা লৈঙাক্কী থবক্কী ইন্টারভিউ লৌবদা লোল য়াম্না খঙবশিংবু হেন্না খুদোং চাবা পীগনি হায়না লাওথোকখি। য়ামদ্রবদা লোল মঙা নত্রগা তরুক খঙবা কেন্ডিডেট মীদা সরকারগী থবক লৌবদা প্রাইওরিটি পীগনি।
লোল মশীং য়াম্না খঙবা সরকারগী থবক ফংদুনা পোষ্টিং চৎপা মফমদুগী মীওইশিংগা লোকেল লোল ফাওনদুনা চাওখৎপগী থবক থৌরাংসু মাঙজিল থানা চঙশিনবা য়াই। ফুরূপ খুদিংমক অমত্তা ওইবগী ৱাখল্লোন শাগৎনবা হোৎনবদা ফুরূপশিংগী লোল খঙবা অসিসু য়াম্না মরু ওই হায়না ফোঙদোকখি। অহল নহা অঙাং খায়দনা লোল য়াম্না তমশিনবা খঙদোকপা হায়বসি মাঙজগদবা নত্তে।
মহাক্না হায়খি, ষ্টেট অসিদা তম্লিবা সিলেবাসতা মণিপুরগী পুৱারী ময়েক শেঙনা হাপসি। চহী তরেৎ খুন্তাকপা, এঙ্গলো-মণিপুর ৱারদা লান্না ৱাহন্থোক পীনরিবসি মখাতানা অতৈ থোক্তনবা তুংগী মীরোলদা ময়েক শেংনা খঙহল্লমসি। থৌরম অদুগী ময়াই তাংবল লৌখিবা শিক্ষামন্ত্রী থৌনাওজম বসন্ত কুমারনা তোঙান তোঙানবা ফুরূপশিংগী লোল তম্বা হায়বসি পুৱারীগী মশক অমনি হায়না ফোঙদোকখি।
কর্টেসি - মরূপ
0 কমেন্ট:
কমেন্ট তৌবিয়ু