• 609
• ২৬শে ফেব্ররুয়ারি ২০২৪ ইং
• Share on:

লৈকোলনা ‘ইমাসিগী নাচোম অমত্তং’ হায়বা ৱারেং লাইরিক ফোঙখ্রে

ইম্ফাল, ফেব্রুয়ারি ২৫ ‘ইমাসিগী নাচোম অমত্তং’ হায়না মীংথোনবা ৱারেং লাইরিক অমা লৈমরোল খোর্জৈকোল লৈকোলনা পুথোকপা এম কে বীনোদিনিদা কৎচবা লাইরিক ফোঙবগী থৌরম ঙসি জে এন মণিপুর দান্স একাদেমিগী ওদিটোরিয়াম হোলদা পাঙথোকখ্রে। লাইরিক ফোঙবগী থৌরম অদুদা শক্নাইরবা ফিল্ম মেকর অরিবম শ্যামনা অথোইবা মীথুংলেন, লৈকোলগী প্রেসিদেন্ট ক্ষেত্রিময়ুম সুবদনিনা থৌরম মপু অমসুং ইম্ফাল ইষ্টকী অধক্ষ্য পি বিমোলানা মীথুংলেন ওইনা শরুক য়াখি।

ইমাসিগী নাচোম অমত্তং হায়রিবা ৱারেং লাইরিক অসিগী ইদিটর ওইরিবী প্রোফেসর নহাকপম অরুনানা ফোঙদোকখিবদা নুপীশিংনা অইবগী লমদা লমদমসিদা মফম অমা কন্দুনা থম্বীরম্বা অমদি কৈরাক থাবীরম্বসি লৈখিদ্রবা থোইবী, এম কে বীনোদিনি অমসুং খাইদেম প্রমোদিনিননি। কুমজা ১৯২০ দা থোইবী তাইবংপানবা খোঙদারকখি অদুগা এম কে বিনোদিনিনা কুমজা ১৯২২ অমসুং খাইদেম প্রমোদিনিনা কুমজা ১৯২২ অমসুং খাইদেম প্রমোদিনিনা কুমজা ১৯২৪ দা মথং মথং তাইবংদা খোঙদারকখি।

                                 লাইরিক ফোঙবগী থৌরম

অইবী অহুম অসিনা লমদম অসিদা নুপী ওইবীশিংগী ওইবা অইবগী ফম্বাক অমা কনবীদুনা থম্বীরমখিবনি। ২০ শুবা চহী চাগী লোইরমদাইদা নুপীশিংগী ওইবা ইবগী লমদা থোরকখি। কুমজা ১৯৫০ দা ইমাসি বীনোদিনিনা খোমজিনবা লাইরিক কবি তরপোনগী ইদিটর ওইদুনা ফোঙখি অদুবু অইবী অমা ওইনা কুমজা ১৯৬৫ তা নুঙ্গাইরক্তা চন্দ্রমুখি অমদি থোইবীগী রাধা ফোঙখিবা অসিনা অইবী অনীসিনা অইবীশিংগী মশক তাকপা হৌরকখি।

হৌজিক লৈকোলনা ফোঙজরিবা ‘ইমাসিগী নাচোম অমত্তং’ হায়না মীংথোন্দুনা পুথোকচরিবা লাইরিক অসিদা পুন্না ৱারেং ১৯ য়াওরি। ৱারেং ১৯ অসিদা অনী থোক্না খায়দোক্তুনা নৈনরি। ইমাসিগা লোয়নরম্বা কয়াদগী লৌজরগা খোমজিন্দুনা পুথোকচবনি। লাইরিক অসিদা ইমাসিগী খূৎইদা নৈনদুনা পুথোকপা শরুক অমা য়াওরি। ফাইরেন থা অসি ইমাসি বিনোদিনিগী মপোক থা নি। মরম অসিনা মপোক থা অসিগী মনুংদা ঙসি ফোঙদুনা মীয়ামদা খূৎশিন্নরিবা লাইরিক অসি ইমাসিদা খুদোল তম্বা ওইনা পুথোকচবনি।

ইমাসিগা নক্ননা লোয়নবীরম্বশিংদগী ফংজবা কয়া অদু খোমজিঞ্জরগা পুথোকচবা লাইরিক অসিনা হৌরক্রিবা তুংগী অঙাংশিংনা লাইরিক অসি নৈনদুনা ইমাসিগী অশেংবা মশক অদু খঙবা ঙমগনি। হৌগলক্লিবা অঙাংশিংদা নত্তনা মীরোল অসিদসু ইমাসিগী মরমদা খঙদবা কয়া অমা লৈরি। মসিবু খঙননবগীদমক ইমাসিগা নক্না লোয়নহৌবা মীওইশিংদগী খোমজিল্লগা নাচোম ওইনা পুথোকচবা লাইরিকনি হায়খি।

সোর্স: হুইয়েন লানপাউ।