লিসিপ্রিয়া কাঙুজমনা য়ুকেগী নিংথৌ চার্লসকা উনখ্রে
ইম্ফাল, মার্চ ৩০ : শক্নাইরবী ক্লাইমেট এন্ড এনবাইরনমেন্টেল এক্টিভিষ্ট লিসিপ্রিয়া কাঙুজমনা য়ুকেগী নিংথৌ চার্লস থ্রিগা উনখ্রে। মহাক্না মণিপুরগী পুৱারীদা বৃটিশকী নিংথৌ উনবা অহানবা মৈতৈ মচা ওইরে। লিসিপ্রিয়ানা নিংথৌ চার্লস থ্রিগা উনবা অদুদা মণিপুর অমদি ক্লাইমেট চেঞ্জগী মরমদা ৱাফম কয়া খন্নখি হায়রি।
লিসিপ্রিয়াগী নুমিৎ হুমনিগী বার্লিন খোঙচৎ মনুঙদা জার্মানিগী প্রেসিদেন্ট ফ্রেঙ্ক-ৱাল্টর অমদি কেনিয়াগী প্রেসিদেন্ট উইল্লিয়াম রুটোগসু উনদুনা লাইরবা লৈবাকশিংদা জার্মানিনা লুচিংদুনা ক্লাইমেট কম্পেন্সেসন পীনবা তকশিনখি। মহাক জার্মানি গবর্ণমেন্টকী মিনিষ্ট্রি ওফ ফোরেন এফিয়ার্সনা অখন্ননা বার্লিন ইনার্জি ট্রাঞ্জিসন ডাইলোগ ২০২৩ গী হৌদোকপগী থৌরমদা মালেমগী লুচিংবা কয়াদা কিনোট এড্রেস পীনবা হায়দুনা বার্ত্তন তৌরকখিবনি হায়রি।
লিসিপ্রিয়ানা জার্মানিদা হেক থুংবগা জার্মান ফোরেন মিনিষ্টার অন্নালেনা বেরবোকনা বার্লিন সিটিদা তরাম্না ওকখি। ফোরেন মিনিষ্টি ওফিসতা কোইনা পুদুনা মীওই কয়াদা মহাকপু মশক তাকখি অমদি তরাম্না ওকপগী ভিআইপি লাঞ্চ অমসু শীল্লমখি। লিসিপ্রিয়ানা বার্লিন ইনার্জি ট্রাঞ্জিসন ডাইলোগ হৌদোকপগী থৌরম অদুদা হায়, ‘মালেমগী লুচিংবশিংনা ঙাইহাক ঙাইহাক্কী ভাবোক্তগী খুবাক খরা খুরক্নবা প্রোগ্রাম খুদিংগী ৱা পংঙাংদা ঙাংবগী হৈনবী অদু থাদোকপীরো। নখোয়না মালেম অসি কন্নবা অশেংবা থবক থৌবা ওইনা পাম্মী।’
‘চহি লিশাং শিৎনা মালেমগী লুচিংবশিংনা ওইদবা কয়া ঙাংদুনা লাক্লি। মসিনা মরম ওইদুনা ঐখোয়গী মালেম অসি ঙসিদি মাঙ তাকহনবা হেনমনখিবনা অমুক হন্না শেমজিন শাজিনবা য়াররোইদবা অরুবা ফিবম অমদা লৈরে’ হায়নসু ফোঙদোকখি। ‘নখোয়না থবক তৌবা ঙমদ্রগা ঐহাক্কুম্বা চহি নৌরিবা অঙাং কয়াগী পুন্সি ক্লাইমেট চেঞ্জনা মরম ওইদুনা পিখম্নহল্লিবা অসি মীয়াম্না য়াফম থোক্তে। লান তৌদুনা ডোল্লর বিল্লিয়ন কয়া মাঙহনবগী মহুৎতা মালেমদা লাইরবা কোক্নবা, অঙাংশিং লাইরিক তমহনবদা অমদি ক্লাইমেট চেঞ্জ থেংনবদা শীজিন্নরবদি ঐখোয়গী মালেম অসি কয়াদা নিংথিবা মালেম অমা ওইগনি’ হায়না মহাক্না লুচিংবা কয়াদা ৱাহং হংখি।
মদুদা কেনিয়াগী প্রেসিদেন্ট উইলিয়াম রুটোনা লিসিপ্রিয়াগী স্পিচ তারবা মতুংদা পেনবীরদুনা মহাক্না ফম্লম্বা চৌক্রি অদুদগী হৌগৎলক্তুনা লিসিপ্রিয়াগী ৱা ঙাংফম ষ্টেজ ফাওবা কাখৎলক্তুনা খুৎ শোকখি। অদুগা তারিবা মীওই কয়ানা মীৎলু পিরাং শীন্থবা ফাওবা য়াওখি হায়রি। মথংগী নুমিত্তা মহাক্না জার্মানিগী প্রেসিডেন্ট ফ্রেঙ্ক-ৱাল্টর অমদি য়ুকেগী নিংথৌ চার্লস থ্রিগা জার্মানগী প্রেসিডেন্সিয়েল পেলেসতা উনখি। লিসিপ্রিয়ানা তৌরিবা থবক খরা অসিদা কিং চার্লসনা অপেনবা ফোঙদোকখি অমদি জার্মানিগী প্রেসিডেন্টনা থাগৎখি। লিসিপ্রিয়াগী খোঙচৎ অসিদা মহাক্কী অপোকপি মমাসু লোইনখি।
মহাক্না অরোইবদা মেডিয়াশিংদা হায়, ‘ঐহাক্কী জার্মান খোঙচৎ অসিনা ঐগী ক্লাইমেট চেঞ্জগী ঈহৈৗ অসি হেন্না মপাঙ্গল কনখৎহল্লগনি। মসিনা অনৌবা থৌনা অমা ঐঙোন্দা হাপ্পিরে। ঐহাক্না লাক্লিবসি মালেমগী অঙাংশি, মালেমগী য়েলহৌমীশিং অমদি ক্লাইমেট চেঞ্জনা অৱাবা পীরিবা লায়রবা লৈবাক কয়াগী মহুৎ শিল্লিবনি। লুচিংবশিংনা ঐঙোন্দা পীরিবা থাজবা কয়া অসি মাঙহন্দবা চুমগনি।’
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু