লাইশ্রম সমরেন্দ্রগী ১০০ শুবা মপোক কুমওন হৌদোকখ্রে
ইম্ফাল, জুলাই ২০: লৈখিদ্রবা শক্নাইরবা কবিরত্ন লাইশ্রম সমরেন্দ্রগী চহী অমা চূপ্না চত্থগদবা বার্থ সেন্তিনরি সেলেব্রসন ঙসি মণিপুর প্রেস ক্লবতা হৌদোকখ্রে।
লাইশ্রম সমরেন্দ্র বার্থ সেন্তিনরি সেলেব্রেসন কমিতিনা শীনবা লৈখিদ্রবা শক্নাইরবা কবি অসিগী চহী ১০০ শুবা মপোক কুমওনগী চহী অমা চূপ্না চত্থগদবা থৌরম অদু হৌদোকপদা মণিপুরী সাহিত্য পরিষদ, আসামগী প্রেসিদেন্ত দাঃ ফুরিৎশাবম বীরমণিনা চীফ গেস্ত; শক্নাইরবা কবি, সাহিত্য একাদেমি এৱার্দি য়ূমলেম্বম ইবোমচানা গেস্ত ওব ওনর অমদি মণিপুর য়ুনিবার্সিতিগী স্কুল ওব হ্যুমেনিতিজগী হান্নগী দিন প্রোফেসার পেলেম নবচন্দ্র সিংহনা প্রেসিদেন্ত ওইখি।
চীফ গেস্ত ওইখিবা দাঃ ফুরিৎশাবম বীরমণিনা হায়, লৈখিদ্রবা লাইশ্রম সমরেন্দ্র অসি মমা লৈবাকপু য়াম্না নুংশিজবা কবিনি। মহাক মণিপুরগী অচৌ-অচৌবা ঈহৌ কয়াদা শরুক য়াখিবা মীশক অমসুনি। কবি অসিনা ঊৎপীরম্বা থৌনা অমসুং নোক্না-নোক্না থেংনরিবা ফীবমশিং মায়োক্নগদবনি হায়বা মহাক্কী অদুগম্লবা ৱাখল্লোনশিং দু হৌরক্লিবা মীরোল অসিনা তমজনিংঙাইনি।
হৌজিক লৈরিবা ফীবম অসিদা লৈখিদ্রবা কবিশিংবু নীংশিংবা অসিনা মখোয়না পীরম্বা থৌনা অমদি ঊৎলম্বা লম্বীশিং হৌগৎলক্লিবা সাহিত্যকারশিং, সোসিএল এক্তিভিস্তশিংদবু ওইরগসু নহাশিংগী অচৌবা লম্বীশিং অমা ওই হায়না দাঃ বীরমণিনা ফোঙদোকখি।
দাঃ বীরমণিনা চৎলিবা থা অসিদগী আসাম লৈঙাক্না স্তেত অসিদা প্রাইমারিগী থাক্তা ক্লাস ৱানদগী মীতৈ ময়েক তম্বদা অয়াবা পীখ্রৈ। মণিপুরদা সাহিত্য অমসুং লোল চাওখৎনবা লৈঙাক্না শেনফম খরা কাইথোকই হায়বা ৱাফম লৈখি। মদুদা মণিপুরী মশীং য়াম্না তারিবা আসাম অমসুং ত্রিপুরাদা মণিপুরী সাহিত্য অমসুং লোল অসি চাওখৎনবা মণিপুর লৈঙাক্না মীৎয়েং থম্বীবা মথৌ তাই। আসাম অমসুং ত্রিপুরাদা খুন্দারিবশিংদা মণিপুরী লোল চাওখৎনবা শেনফম খরদং ওইরবসু কাইথোকহন্নিংই।
আসামদা খুন্দারিবা বেঙ্গলিশিংনা করিগুম্বা অমা হেক থোকপদা বেঙ্গল লৈঙাক্না মথৌ তাবা শেনফম পুবগুম্বা তৌই। মরম অদুনা আসাম অমসুং ত্রিপুরাদা তারিবা মণিপুরীশিংগীদমক্তসু মণিপুর লৈঙাক্না করিগুম্বা শেনফমশিং পুহন্নিংবগী অপাম্বসু মণিপুরী সাহিত্য পরিষদ, আসামগী প্রেসিদেন্ত দাঃ বীরমণিনা ফোঙদোকখি।
থৌরমগী গেস্ত ওব ওনর ওইখিবা কবি য়ূমলেম্বম ইবোমচানা মহাক্কী ৱারোলদা হায়খি, ‘লৈখ্রিদবনা (কবি সমরেন্দ্র) ইরম্বা শৈরেংশিংদা নোক্নিংবা কয়া অমা য়াওই, অদুগা মদুগী মনুঙদা চৈরিবা, শাওরিবা, য়ানিংদ্রিবা, পেন্দ্রিবা কয়াশিং য়াওরি। মণিপুরগীদমক য়াম্না ৱাজবা কয়া অমা য়াওরিবশিং অদু ৱাহন্থোক লৈরক্কনি। মহাক্কী শৈরেংগী লাইরিক অসি পাবীয়ু। মহাক্কী শৈরেং হায়রিবশিংদু চুম্নবগী নোক্নবা খক্তগীরা হায়বসি খন্থহন্নিংই।
সাহিত্য একাদেমি এৱার্দি য়ূমলেম্বম ইবোমচানা লৈখিদ্রবা কবিরত্ন সমরেন্দ্রনা কোলকাতাদা কবিতা উৎসব অমা চৎমিন্নরুবগী খোঙচৎ অদু নীংশিংলদুনা মহাক্না হায়, বেঙ্গলদা শৈরেং থীবা অসি পারফোর্মিং আর্ত ওইনা লৌনবগুম তৌই। মমিং লৈরবা কবিশিংগী শৈরেংশিং অসি আর্তিস্তশিংনা থী। শৈরেং তানবগীদবমক তিকেত কক্নৈ। মী কৃক-কৃক ইন্নৈ। শৈরেং থীরিঙৈ মনুং ৱা অমত্তা ঙাঙদনা তাবগী কলচর অমা লৈ।
মণিপুরদদি স্কুল, কলেজগুম্বদা খরা তৌবা নত্তনা মদুমক্কী কলচর অদুমক্তি লৈত্রি। অদুমকপু ঙসিগী থৌরম অসিদা মণিপুরী মমিং লৈরবা ফিল্মগী অমসুং ঈশৈগী আর্তিস্তশিংনা কবি সমরেন্দ্রনা ইরম্বা শৈরেংশিং পাবা উবদা য়াম্না নুংঙাই হায়নসু কবি য়ুমলেম্বম ইবোমচানা ফোঙদোকখি।
সেলেব্রেসন কমিতিগী কনভেনর ওইরিবা সাহিত্য একাদিমী এৱার্দি শরতচান্দ থিয়ামনা হায়খি, লাইশ্রম সমরেন্দ্র পোকখিবা চহী ১০০ শুবা অসিদা মহাক্কুম্বা কবি অমা মণিপুরদা পোকখি হায়বসি চাউথোকচৈ। মহাক্না কদায়দা করি তৌরম্মী হায়বসি খঙহন্নবগী মণিপুরগী মপান অমসুং মনুঙদা চহী অমা চূপ্না থৌরম অসি পাঙথোক্কনি। সেলেব্রেসন কমিতিনা হকথেংননা চৎপা ঙমদ্রবসু মফমদুগী মীশিংগা খূৎশম্নরগা থৌরমশিং পাঙথোক্তুনা খঙহনগনি। কবি অসিগী মতাঙদা শক্তাকপা অচৌবা লাইরিক অমসু ফোঙনবগীদমক শেম-শারি।
‘মণিপুরদা ২০০১ দা থোকখিবা জুন ১৮ গী থৌদোক্তুদা কত্থোকখিবশিংদুগী হকচাংনা য়াতাখিবা কেক্রপাৎকী মফম অদুমক্তদা লৈখিদ্রবা ওজা (লাইশ্রম সমরেন্দ্র) অসিনা ২০১৫ গী জুন ১৮ গী থৌরম ঐখোয় হায়না কৌবা শৈরেং অমা পাখি। মদুদা তিনখিবা মীয়াম অদু তুমিন্না লৈখি। ওজাদা য়াওরিবা মতীক-মগুনশিং শীংথাদুনা লোইবা নাইরোই’ হায়না শরতচান্দ থিয়ামনা ফোঙদোকখি।
থৌরম অদুদা লাইশ্রম সমরেন্দ্রগী চহী অমা চূপ্না চত্থগদবা বার্থ সেন্তিনরি সেলেব্রেসনগী নীংশি চেফোঙ অমা অমসুং ‘স্বর্গদা অৱাবা অমসুং নুংঙাইবা’ (মীতৈ ময়েক এদিসন) ফোঙখি।
থৌরম অদুদা লোইতোংবম দোরেন্দ্র, আর কে হেমাবতি, খ্বাইরাকপম বিশ্বমিত্র, লানবোই কবুই, কোন্থৌজম বোবিন, রহৈজুদ্দিন শৈখ, লাইশ্রম রোমোলা, ভৱানী অধিকারী, থৌদাম নেত্রজিৎ, ৱাংলেম্বম নিরঞ্জনা, মঙ্কা ময়াংলম্বম, এলিয়া কৈথেল্লাকপম য়েংখোম শিজ অমসুং এথেনা থিয়ামনা লাইশ্রম সমরেন্দ্রনা ইরম্বা মমিং লৈরবা শৈরেংশিংসু পাথোক্তুনা লৈখিদ্রবা কবি অসিগী মফমদা ইকায়খুম্নবা ঊৎখি।
সোর্স: পোক্নফম
0 কমেন্ট:
কমেন্ট তৌবিয়ু