রাজর্ষি ভাগ্যচন্দ্রগা মরী লৈননা ইন্তরনেসনেল কনফরেন্স পাঙথোক্কদৌরি
ইম্ফাল, আগস্ত ১৭ : রাজর্ষি ভাগ্যচন্দ্র কলচরেল ফাউন্দেশন মণিপুরনা শীন্দুনা রাজর্ষি ভাগ্যচন্দ্রনা লৈখিদবা চহী ২২৭ শুবা কুমওন থৌরমগা মরী লৈননা মণিপুর য়ুনিবর্সিতিদা রাজর্ষি ভাগ্যচন্দ্র এন্দ শেপিং ওব মণিপুর কলচরেল হোরাইজন হায়বা হীরম অসিদা ইন্তরনেসনেল কনফরেন্স অমা নুমিৎ নীনি চূপ্না পাঙথোক্লগনি হায়রি।
রাজর্ষি ভাগ্যচন্দ্র কলচরেল ফাউন্দেসন মণিপুরগী থৌদা ভাবক লৈকায়দা লৈবা ওফিসতা পাউমীশিংগা উনবা অমদা ফাউন্দেসন অসিগী স্পোক্সপার্সন তখেল্লম্বম ইরাবতনা হায়, রাজর্ষি ভাগ্যচন্দ্রগী চহী ২২৭ শুবা লৈখিদবগী কুমওন থৌরমগা মরী লৈননা ফাউদেন্সন অসিনা কলেজ দিবেলপমেন্ত কাউন্সিল মণিপুর য়ুনিবর্সিতি, দিপার্তমেন্ত ওব সঙ্কীর্ত্তন, মণিপুর য়ুনিবর্সিতি ওব কলচর, রাজর্ষি ভাগ্যচন্দ্র কলচরেল রিসার্ছ সেন্তর মণিপুর য়ুনিবর্সিতি, একাদেমি ফোর মণিপুর কলচর এন্দ আর্তস, সিলেত বাংলাদেশ, ভারতিয়া ইতিহাস সঙ্কলন সমিতি মণিপুর প্রান্ত, ইন্তেলেকচুএল ফোরাম নোর্থ ইস্ত মণিপুরগা পূন্না খুৎশম্নরগা মালেমগী থাক্তা চহী অসিগী সেপ্তেম্বর ২৪ অমসুং ২৫ দা নুমিৎ নীনি চুপ্না মণিপুর য়ুনিবর্সিতিদা পাঙথোক্লগনি।
নুমিৎ নীনি চূপ্না পাঙথোক্কদৌরিবা কনফরেন্স অসিদা রাজর্ষি ভাগ্যচন্দ্রগী মরমদা অমদি মহাক্না শেমগৎপীরম্বা জগোয়-ঈশৈ, নাৎকী, লাইনিংগী য়াওনা তোঙান তোঙানবা হীরমশিংদা অখঙ-অহৈ, রিসার্ছ স্কোলর কয়ানা চে পাথোকপগা লোয়ননা খন্ন-নৈনমিন্নগনি। কনফরেন্স অসিগী মতুংদা ফাউন্দেসন অসিনা অন্ধ্র প্রদেশকী মমিং লৈরবা লাইফম্লেন তিরুপতিদা মৈদিঙু রাজর্ষি ভাগ্যচন্দ্রগী চহী ২২৭ শুবা লৈখিদবগী কুমওন থৌরম সেপ্তেম্বর ২৭ তগী ওক্তোবর ২ ফাওবা নুমিৎ তরুক্নি চূপ্না পাঙথোক্কনি। থৌরমশিং অসিগী অকুপ্পা মরোল ফাউন্দেসনগী ওফিসতা লাক্লগা খঙবা য়াগনি হায়নসু ইরাবতনা ফোঙদোকখি।
সোর্স: পোক্নফম
0 কমেন্ট:
কমেন্ট তৌবিয়ু