মোম্বতি থান্দুনা কেন্দেল ফোর পিছ থৌরম পাঙথোকখ্রে
আগরতলা, জুন ১২: থা অমা হেনখ্রবা ফাওবদা মণিপুরদা ইরাং নেমথদ্রি। মণিপুরদা শান্তি হঞ্জিল্লক্নবা ত্রিপুরাগী মফম কয়াদা মৈরা পায়বী নুপী লুপনচিংবা তোঙান তোঙানবা অতৈ লুপ সংস্থান কয়ানা খোইরু থাওমৈ থান্দুনা শান্তিগী খোঙচৎ থোকপগা লোয়ননা মণিপুরদা অৱাবা তারবা মীওইশিংগীদমক চানবা থক্নবা পোৎলম কয়াসু থানরি।
জুন ১১দা অভয়নগরদা পুথিবা ওয়েলফেয়ার এন্দ কালচারেল সোসাইতি অমসুং ওল ত্রিপুরা মৈতৈ কম্ম্যুনিটি অনিনা শিন্দুনা মোম্বতি থান্দুনা কেন্দল ফোর পিছ থৌরম অমা পাঙথোকখ্রে। থৌরম অদুদা অভয়নগর খুঞ্জাশিং অমসুং ত্রিপুরা মেডিকেল কলেজতা থবক তৌবা মীওই কয়াসু শরুক য়ারি।
থৌরম অদুদা মণিপুরদগী সোসিয়েল ৱার্কর ঙাঙোম ঙৌবী য়াওনা অভয়নগরগী ময়েংবম অভিরাম, নোংসাতাবম নিরঞ্জন দত্ত, সিনাম দিপক কুমার, এন প্রনয়, কোন্সম বিনয়নচিংবা মীওইশিংনা হৌজিক হৌজিক ওইরিবা মণিপুরগী ইরাং অসি শান্তি হঞ্জিল্লক্নবা হায়না প্রধানমন্ত্রী নরেন্দ্র মোদি, হোম মিনিষ্টার অমিট শাহ্, মণিপুরগী চীফ মিনিষ্টার এন বিরেন অমসুং নেদা চিয়ারমেন অমদি আসামগী চীফ মিনিষ্টারসু ওইরিবা হেমন্ত বিশ্ব শর্ম্মাগী মফমদা আপিল তৌখি।
তোঙানবা পাউ অমদা লাক্লিবা জুন ১৫, ত্রিপুরাগী তোঙান তোঙানবা লুপ মণিপুরী কাউন্সিল ত্রিপুরা, মণিপুরী সাহিত্য পরিষদ, ত্রিপুরা মণিপুরী স্টুদেন্টস য়ুথ কোওর্দিনেসন কম্মিটি অমসুং লময়ানবা, এ সোসিয়েল কালচারেল ওর্গানাইজেসন মরিনা খুৎশম্নরগা মাস দিপুটেসন অমদা ত্রিপুরাগী ওয়েষ্ট ডিষ্ট্রিক্ট মেজিষ্ট্রেটকী খুত্থাংদা প্রাইম মিনিষ্টারদা মেমোরেন্দম থাগনি হায়রি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু