মণিপুরীশিংগী পুৱারীগা তৎন-থানবা য়াদ্রবা লেং ওন্দবী পাৎ হায়না খঙনবা মফম দুধপাটিলদা চৎতুনা এম ৱাই এফ এ অমসুং এ আই পি পি সীনা য়েংশিনখ্রে
ইম্ফাল, দিসেম্বর ২৬ : মণিপুরী য়ুথস ফ্রন্ট ওফ আসাম ইন্দিজিনাস পিপল প্রোটেক্সন কম্মিটি (এ আই পি পি সী) গী টিম অমনা ঙসি মণিপুরীশিংগী পুৱারীগা তৎন-থানবা য়াদ্রবা মফম অমা ওইরিবা লেং ওন্দবী পাৎ (নর বিল) হায়না খঙনরিবা মফম দুধপাটিলদা চৎতুনা য়েংশিনখ্রে। মণিপুরবু অৱানা খুদুম চনখ্রবা মতুং ইনিংথৌশিংনা কাছারদা লৈদুনা মণিপুরবু করম্না অৱাগী মথুৎতগী কনবা ঙমগদগে হায়না খন্নরকপদা ইনিংথৌ নরসিংহ, গম্ভীর সিংহ মচিন মনাও অনীনা দুধপাটিলগী মনুংদা লৈবা পাৎ অমবু লেং ওন্দুনা শিৎপা ঙম্লবদি মণিপুরী অমুক হঞ্জিনবা ঙমগনি হায়না শিৎখিবা পাৎ-অসি ঙসিসু মফম অসিদা লৈংদনা লৈরি।
এ আই পি পি সী অমদি এম ৱাই এফ এগী টিমনা চৎখিবা য়েংশিন খোঙচৎ অদুদা এ আই পি পি সীগী জেনারেল সেক্রেটারি সেরাম হেরাজিৎনা ফোঙদোকখিবদা, ঐখোয়না আসামদা য়েলহৌমী অমা ওইনা খুন্দারিবা অসিসু পুৱারীগী তাঙ্কক কয়াদা ঐখোয় মফম অসিদা খুন্দা-লৈতাখিবনি। চহী তরেৎ খুন্তাকপা মতমদা মণিপুরগী ইনিংথৌ অহুম চৌরজিৎ, মার্জিৎ অমদি গম্ভীর সিংহ কোনুং ওইরম্বা মখোয়না মফমসিদা মনিং তম্না পাল্লম্বগী মফম কয়ামরুমসু লৈরি। মফমশিং অসিবু মণিপুর লৈঙাক্না অমদি সী এস ওশিংনা মীৎয়েং চঙবীদুনা শেমজিন শাজিন্নবা হোৎনবীয়ু হায়নসু ফোঙদোকখি।
য়েংশিন খোঙচৎ অদুদা সেরাম হেরাজিৎনা মখা তানা ফোঙদোকখিবদা, ঙসিগী মণিপুর অসি কাছার লৈরমদ্রবদি মণিপুর লৈরমদবসু য়াই। মরম অদুনা মণিপুরগী পুৱারী নৈনবদা কাছার য়াওদ্রবদি মণিপুরগী পুৱারীসু মপুং ফারোই। মরম অদুনা য়াম্না মরুওইরিবা লেং ওন্দবী পাৎ অসি শেমগৎ শাগৎনবগীদমক কম্মিটি অমা শেমদুনা মরী লৈনবা ওথোরিটিদা তকশিন্নবা হোৎনরগনি। লোয়ননা মণিপুর গভর্ণমেন্টনসু মফম অসিগীদমক খন্নবীনবা আপীল তৌজরি হায়খি।
য়েংশিন খোঙচৎ অদুদা শরুক য়াখিবা এম ৱাই এফ এগী প্রেসিদেন্ট থাংজম ব্রোজেননা ফোঙদোকখিবদা, মৈতৈ অমা ওইনা ঐখৈায়গী পুৱারীগা মরী লৈনবা মফমশিং শেমজিন্দুনা চহীগী হৈকৎ-লৈকৎ তৌবা মথৌ তারক্লে। ফুরুপ অমা শক্তাকপা হায়বসি ঐখোয়গী পুৱারীবু হৌরক্লিবা ইচা-ইনাওশিংদা খঙহন্নবা হোৎনবা মথৌ তাই। মরম অদুনা লৈঙাক্না শেমগৎ শাগৎপদা অচৌবা থৌদাং লৌহন্নিংই হায়খি। য়েংশিন খোঙচৎ অদুদা এ আই পিপিসীগী প্রেসিদেন্ট সহদেব রাজবংশি, ফাইনান্স সেক্রেটারি জসিমউদ্দিন লাস্কর, এম ৱাই এফ এগী জেনারেল সেক্রেটারি তম্পাকময়ুম সালাউদ্দিনসু শরুক য়াখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু