ত্রিপুরাদা লিংখৎখিবা মণিপুরী সাহিত্য পরিষদকী মপোক কুমওন পাঙথোকখ্রে
ইম্ফাল, দিসেম্বর ২৬ : কুমজা ১৯৬৩ গী দিসেম্বর ২৫দা মণিপুরী সাহিত্য পরিষদ ইম্ফালগী ব্রাঞ্চ ওইনা ত্রিপুরাদা লিংখৎখিবা মণিপুরী সাহিত্য পরিষদকী চহী ৫৯ শুবা মপোক কুমওন আগরতলাগী রাধানগর শ্রীশ্রী রাধা মান্দপতা পাঙথোকখ্রে। মণিপুরী সাহিত্য পরিষদকী চহী ৫৯ শুবা মপোক কুমওন থৌরম অদুগা মরী লৈননা পরিষদ অসিগী ফাউন্দার সেক্রেটারি ওইরম্বা লৈখিদ্রবা আর কে কমলজিৎ সিংহ, অইবা অনী গুরুময়ুম রাজেশ্বর শর্ম্মা অমসুং কৈথেল্লাকপম চন্দ্রকুমারগী মফমদ হৈকৎ-লৈকৎ তমদুনা ঈকায়খুম্নবা উৎখি।
ত্রিপুরাদা মণিপুরী লোল, সাহিত্য অমদি সংস্কৃতি চাউখৎহনবদা অচৌবা থৌদাং লৌখিবা লময়ানবা অহুমগী মফমদা ঈকায়খুম্নবা উৎপগী থৌরম অদুদা মণিপুরী সাহিত্য পরিষদকী প্রেসিদেন্ট এন দিলিপকুমারনা থৌরম মপু, ওল ইন্দিয়া রেদিও আগরতলাগী নিউজ এদিটর রিনা নোংমাইথেম, এন প্রফুল্ল বিজয়, এম বিভাস কান্তি, এন হেমন্ত কুমার দত্ত না চিংবনা গেষ্ট ওফ ওনার ওইনা শরুক য়াখি।
লোয়ননা মণিপুরী সাহিত্য পরিষদ ত্রিপুরাগী মপোক কুমওন থৌরম অদুদা পরিষদ অসিগী জেনারেল সেক্রেটারি থৌদাম নিলকুমারনা ওয়েলকাম এদ্রেস পীখি। লোয়ননা থৌরম অদুগী মখা তারকপদা শক্নাইরবা লৈখিদ্রবা লুচিংবা অহুমগী মরমদা ৱাংখেম বিরমঙ্গোলনা ফোঙদোকখিবদা, আর কে কমলজিৎ, গুরুময়ুম রাজেশ্বর শর্ম্মা অমসুং কৈথেল্লাকপম চন্দ্রকুমার হায়রিবা মীওেই অহুম অসি ত্রিপুরাদা খুন্দাদুনা লৈরিবা মণিপুরী ফুরুপশিংগী য়াম্না খঞ্জবা অমদি ইমালোল ওইরিবা মণিপুরী লোল সাহিত্য অমদি সংস্কৃতিবু চাউখৎনবা হোৎনবদা কত্থোক্লম্বা মীশকশিংনি। মখোয়না হোৎনবীরম্বা অদুনা ঙসি ত্রিপুরাদা খুন্দারিবা মণিপুরীশিংনা লম খূদিংদা চাউথোকচনা হিংবা ঙম্লিবনি হায়খি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু