দাঃ কে শান্তিবালা সাহিত্য একাদেমি এৱার্দ ফংলে
ইম্ফাল, দিসেম্বর ২২ : সাহিত্য একাদেমি, নিউ দিল্লীনা চহী খুদিংগী লৈবাক অসিগী অইবা-অইবীশিংদা লান্থোকপা লেমজনিংঙাই ওইরবা সাহিত্য একাদেমি এৱার্দ-২০২২ ফংলবশিংগী মমিং ঙসি লাউথোকখ্রে। মণিপুরগী অইবী দাঃ কোইজম শান্তিবালাসু চহী অসিগী সাহিত্য একাদেমি এৱার্দ ফংলবশিংগী মনুংদা য়াওরে।
মণিপুরগী অইবী দাঃ কোইজম শান্তিবালানা ইবা ‘লৈরোন্নুং’ হায়না মিংথোনবা শৈরেং লাইরিক অমদা লেমজনিংঙাই ওইরবা সাহিত্য একাদিম এৱার্দ অসি পীরকখিবনি। অইবী অসি ইং ১৯৬০ দা ইম্ফাল ইস্ত দিস্ত্রিক্তকী খুরায় লম্লোং বাজারদা পোকপনি।
দাঃ কোইজম শান্তিবালা দেবী, হৌজিক মণিপুর য়ুনিভার্সিতিগী মণিপুরী দিপার্টমেন্ততা এসিন্তেন্ত প্রোফেসার ওইনা লৈদুনা মহৈরোয়শিং তাকপী-তম্বীদুনা খুন্নাই অসিগী তুংলমচৎ শেম্বদা অচৌবা থৌদাং অমসু লৌরি। মহাক্কী শৈরৈং কয়া মণিপুরী (বাংলা ময়েক), হিন্দী অমসুং ইংলিশতা ফোঙখ্রে। য়ু এস এগী কেম্ব্রিয়া প্রেসনা ফোঙবা দি বোর্দালেন্দস ওব এসিয়া, দি সিৱবস মণিপুরনা ফোঙবা থান্ডার, উইন্দ ইন রিদস, দেলতা, লৈকোল মণিপুরনা ফোঙবা দেজলিং দিউদ্রোপস, বাংলাদেশত ফোঙবা অন্যস্বর, নিউ দিল্লীগী জনসাহিত্যগী চেফোঙ যুদ্ধরত, আম আদমী অসিনচিংবদা মহাক্কী শৈরেং কয়া ফোঙখ্রে।
অইবী অসিগী ফোঙখ্রবা লাইরিক খরা পল্লবদা, অমুবা মীৎখুমফি (শৈরেং), তল তরেৎ (অঙাংগী লীলা মচা), থিয়েতার অমদি সাহিত্যগী ৱারেং খরা (নৈন-ৱারেং), থোইবী দেবী, পল্লোন ৱাংমা (শৈরেং), মণিপুরী শৈরেংদা নেসনেলিজম অমসুং অতৈ ৱারেং খরা হায়রিবশিং অসিনি।
অইবী অসি হৌজিক সাহিত্য একাদেমি, নিউ দিল্লীগী লেঙ্গুয়েজ এদভাইজরি বোর্দকী মেম্বারসু ওইবদা নত্তনা দি কালচারেল ফোরামগী ত্রেজারার ওইনা থৌ পুরি। মহাক মণিপুরী সাহিত্যগী লূপ কয়াগা পূন্দুনা মণিপুরী সাহিত্যবু চাওখৎনবা হোৎনরিবা খোরিরোলবু য়াম্না নুংশিজবা মীশক অমসুনি। মমাঙদা মহাক মণিপুরী লিতরেরি সোসাইতিগী জেনারেল সেক্রেটারি অমসুং দি কালচারেল ফোরাম, মণিপুরগী জোইন্ত সেক্রেটারিসু ওইরম্মী।
পনবা য়াবদি, তোঙান-তোঙানবা লোল ২৩ দা পীরিবা মনা অসি মাগী-মাগী লোলশিংগী জুরি মেম্বারশিংনা রিকমেন্দ তৌরক্লবা মতুং একাদেমি অসিগী প্রেসিদেন্ট দাঃ চন্দ্রশেখর কম্বারনা চেয়ারমেন ওইবা একজিক্যুটিব বোর্দনা অয়াবা পীদুনা ঙসি নুংথিল লাউথোকখিবনি। মণিপুরী লোলগী ওইনা বি এস রাজকুমার, কোঞ্জেংবম হেমচন্দ্র সিংহ অমসুং প্রোফেসার রাজেন তোইজাম্বনা জুরি মেম্বারশিং ওইখি।
সোর্স: পোক্নফম
0 কমেন্ট:
কমেন্ট তৌবিয়ু